Uşaqlara yardım etmək üçün rəsm əsərlərini alın!

Dekabrın 20-27-də Bakıda Müasir Təsviri İncəsənət Muzeyində Azərbaycan rəssamlarının əsərlərindən ibarət sərgi keçiriləcək.

“Həyata ümid” adlı sərginin fərqli özəlliyi odur ki, ziyarətçilərə bütün rəsmləri  almaq imkanları yaradılacaq. Rəsm satışından toplanan vəsait ağır xəstə bir qızın müalicəsinə sərf ediləcək. Sərgini Milena Nəbiyeva təşkil edib. Nərminə Kiçibəyovanı ölümdən xilas etmək üçün onun da əsərlərini əldə etmək mümkündür. Nərminənin müalicəsi üçün lazım olduğundan daha çox pul toplanarsa M. Nəbiyeva ehtiyacı olan digər uşaqlara da kömək edə bilər.

M.Nəbiyeva ilə əlaqə yaratmadan öncə onun Facebook səhifəsinə baxdım. Suriya əsirliyində qalan 360-dan çox soydaşımızın (onlardan 250-dən çox günahsız uşaqdır) xilas etmək üçün çağırışı diqqətimi çəkdi.

“Bu uşaqlardan 38-i yetimdir, qapalı düşərgələrdə qeyri-insani şəraitdə saxlanılır. Nə olursa olsun! Uşaqlar heç bir şeydə günahkar deyil! Xahiş edirəm, müharibədən sonra yetim qalanların Vətənə gətirilməsinə kömək edək”, - Milena çağırış edir.

Ötən ilin noyabrında Muzey Mərkəzində M.Nəbiyevanın “Mənim payızımın çalarları” adlı ikinci fərdi sərgisi keçirilib. O, iki sərgidə 110 rəsmini nümayiş etdirib.

Milena Nəbiyeva Turan-ın suallarını cavablandırıb.

- Müasir İncəsənət Muzeyində hansı rəssamların əsərləri sərgilənəcək? Rəsmləri xeyriyyə satışına təqdim etmək üçün onları razı salmaq asan oldumu? Çünki müəlliflər bir qəpik də almayacaqlar.

- Etiraf edim ki, başladığım işin uğurundan əmin deyildim, ancaq Kiçibəyovlar ailəsinin problemləri barədə danışdıqdan sonra məlum oldu ki, müraciət etdiyim bütün rəssamlar - kasıblar və zənginlər öz rəsmlərindən ayrılmağa hazırdır.

Nərminə xərçəng xəstəsidir, metastaz yoxdur, onu xilas etmək olar. Böyük qardaşı hamamda dəm qazından ölüb. Həyatları ağır keçir.

35 rəssam 75-ə yaxın əsər verib. İlkin qiymət 1000 manat müəyyən etdik, amma əsərlərin alınması və Nərminənin müalicəsini ödəyə bilmək üçün endirim etməyə hazırıq.

Sərgidə Altay Sadıqzadə, Nigar Nərimanbəyova, Müseyib Əmirov, Səlhab Məmmədov, Vüqar Muradov, İnna Kostina, Səbinə Şıxlinskaya, Yelena Haqverdiyeva, Azad Əliyev, Rəşad Babayev, Məlik Ağamalov, Mir Azər Abdullayev, Arif Hüseynov, Rəşad Mehdiyev, Sübhan Məmmədov və digər tanınmış rəssamların işləri satışa çıxarılacaq.

- Siz rəssamsınız. Hansı janrda işləyirsiniz, nəyi təsvir etməyə üstünlük verirsiniz və azərbaycanlı həmkarlarınızın sürrealist üslubuna münasibətiniz necədir?

- Hesab edirəm ki, incəsənət gözəl və yaddaqalan olmalıdır. Ancaq butılkalar, qutular və müasir incəsənət adı altında sərgilənən digər şeylər  ciddi deyil. Əlbəttə, bəzən müəlliflər yaxşı mənada təəccübləndirə bilər..

Mən əsasən meyvə və təbiəti çəkməyi xoşlayıram. Həmçinin Svarovski daşları ilə dekorativ işlər edirəm, kətan üzərində müxtəlif daşlardan buta naxışlarına üstünlük verirəm, çox gözəl alınır. Naxışların fonunda meyvələri təsvir edirəm.

- Keçək sizin digər, eyni dərəcədə vacib fəaliyyətinizə. Dövlət sığınacaqlarını necə qiymətləndirirsiniz?

- Hamısında olmuşam. Tədricən onlar daha da yaxşılaşıblar, hər şey yenilənib, uşaqlar yaxşı şəraitdə yaşayırlar, heç bir çatışmazlıq yoxdur. Əvvəllər ora ərzaq götürürdümsə, indi buna ehtiyac yoxdur. Uşaqların ancaq öz evlərinə və nəvazişə ehtiyacı var. Mən Bakıdakı sığınacağa yardım edirəm, çünki o, dövlət qurumu deyil, onu xeyirxah insanlar yaradıblar. Orada valideynlərini itirmiş və ya uşaqlarına baxa bilməyən ailələrin övladları yaşayır. Dövlət bu sığınacağa kömək etmir.

Oradan telefon edirlər, ərzaq, kommunal xidmətləri ödəməyi xahiş edirlər və bunu etməyə imkan tapıram. Mənim köməkçilərim var, onlar da öz vəsaitlərini və səylərini əsirgəmirlər.

Ehtiyacı olanların çoxuna  böyük köməklik göstərən Heydər Əliyev Fonduna təşəkkür edirəm. Ancaq Fond hamını əhatə etmək iqtidarında deyil,  buna görə də bizim, sadə vətəndaşların fəallığı lazımdır.

- Azərbaycanda daha iki gənc qadın var ki, hər biri ayrılıqda yoxsul insanlara kömək edir. Səylərinizi birləşdirmək düzgün olmazdımı?

- Mən hazıram və onlarla birlikdə işləmək üçün tanış olmaq istərdim. Birlikdə daha çox iş görə bilərik. Mənə deyirlər ki,  niyə öz işlərim barədə danışıram, axı “bu, savab deyil”, yaxşı işləri gizlətmək lazımdır. Mən isə hesab edirəm ki, qoy, mənə savab sayılmasın, amma insanlara yaxşılıq etməyi öyrətmək lazımdır. Biz öz problemlərimizə qapılmışıq, hər kəs özü və ya ailəsi üçün yaşayır, başqalarını düşünmür. Çox sayda laqeyd insanlar var, amma ehtiyacı olanlara  kiçik yardım etmək olar. Bəzən hətta bir təbəssüm ətrafdakıların əhval-ruhiyyəsini qaldırır. Davamlı olaraq ətrafımızdakı problemlərə yönəlməməliyik. Mənim üçün ən böyük problem uşaqlarımızdır, onların böyüməsi və ölkə üçün faydalı olması üçün normal şəraitdə yaşamalıdırlar.

- Yardım göstərdiyiniz fərdi sığınacaq barədə danışın və əlaqə məlumatlarını verin ki, oxucular da bu nəcib işdə iştirak edə bilsinlər.

- Bakı şəhəri, Binəqədi rayonu, Hüsü Hacıyev küçəsi, 23. Burada şəxsi villada qadınlar və uşaqlar üçün sığınacaq yerləşir. Villanın sahibi buranı müvəqqəti olaraq uşaqlara verib. Ancaq onlara daimi  yer lazımdır. Tikintiyə kömək edirəm,  artıq ikinci mərtəbədə iş gedir.

Ərzaq, tikinti materiallarının alınmasına kömək edirik. Sığınacaqda təxminən 30-50 uşaq var, onların sayı dəyişir. Qışda daha çox uşaq olur, yayda dağılışırlar. Bəzən polislər ora nəzarətsiz uşaqları gətirirlər. Birinin anası ölüb, atası baxmır. Başqa birinin valideynləri var, amma çox kasıbdırlar, uşaqlarına baxa bilmirlər, yalnız şənbə-bazar günləri evə aparırlar. Bu nömrədən  055-314-35-15 sığınacağa Müşfiqə telefon  etmək olar.