ABŞ Helsinki komissiyası Azərbaycanda vətəndaş cəmiyyətinə son hücumları pisləyir

ABŞ Konqresinin Avropada təhlükəsizlik və əməkdaşlıq komissiyası (Helsinki komissiyası kimi tanınır) çərşənbə axşamı Azərbaycan hökumətini qanunun aliliyinə və insan hüquqları sahəsində öz öhdəliklərinə hörmətlə yanaşmağa çağırıb.

 Helsinki komissiyasına rəhbərlik edən senator Ben Kardin NİDA fəallarına  hökmün oxunması ilə bağlı bildirib: “Bu iş üzrə həbslərin və ittihamların siyasi motivli olması, hökuməti tənqid edən səslərin susdurulması məqsədi daşıması barədə səhih məlumatlar var.

Mən uzunmüddətli həbs cəzasından, aclıq edən gənclərin səhhətlərindən  çox narahatam və onlara dəstək olmaq istəyirəm. Mən hökuməti onların işinə qanunun aliliyi və ədalət çərçivəsində yenidən baxmağa çağırıram”.

Konqresmen Kris Smit Ermənistanın xeyrinə casusluqda ittiham olunaraq həbs edilən jurnalist Rauf Mirqədirovun həbsi, həmçinin Leyla Yunusun və onun həyat yoldaşı Arif Yunusun saxlanması, onlara qarşı istintaq ilə bağlı narahatlığını bildirib.

“Hökuməti tənqid edənlərin saxlanması və onlara qarşı ittihamların  irəli sürülməsi həyəcanlı siqnaldır”.

K.Smit Azərbaycan hökumətini işə yenidən baxmağa və qanunun aliliyinə əməl etməyə çağırıb.

Bəyanat müəllifləri qeyd ediblər ki, R.Mirqədirov Azərbaycan hakimiyyəti də daxil olmaqla, bir çox hökumətləri tənqid  edən nüfuzlu jurnalistdir.

Azərbaycanda mətbuatın vəziyyəti pisləşir, böhtana görə cinayət təqibi qalır. KİV və QHT-lər müxtəlif təzyiq formalarına məruz qalır, informasiya əldə etmək imkanları məhdudlaşdırılır, jurnalistlərə qarşı cinayət işləri açılır, - bəyanatda deyilir. -25В-