ABŞ-ın siyasəti erməni lobbisinin təsirindən xilas olmalıdır

Azərbaycan regional təhlükəsizliyin təmin olunmasında və ABŞ-ın bu məsələyə yanaşmasında konstruktivlik nümayiş etdirir. Ölkəmiz indiyədək dünyanın aparıcı transmilli şirkətləri ilə birlikdə bir sıra iri geoiqtisadi layihələr – Bakı-Tbilisi-Geyhan, Bakı-Tbilisi-Ərzurum neft və qaz kəmərlərinin tikintisini reallaşdıraraq, həm Azərbaycanın, həm də Gürcüstanın davamlı inkişafını təmin edib. Bu barədə prezidenti yanında Strateji Araşdırmalar Mərkəzinin direktoru Fərhad Məmmədov “Regional sülh və təhlükəsizliyin bərqərar olunmasında Azərbaycan-Amerika əməkdaşlığının rolu” mövzusunda keçirilən konfransda çıxışı zamanı bildirib.

Azərbaycan eyni zamanda, ABŞ-ın yaxın müttəfiqlərindən olan Türkiyə, Gürcüstan, İsrail, İtaliya və digərlərinin enerji təhlükəsizliyini təmin edir və Cənub enerji dəhlizinin formalaşmasında fəallıq göstərir.

Azərbaycan və Amerika arasında yaranmış praqmatik qarşılıqlı əlaqələr ABŞ-ın Mərkəzi Asiyadakı türkdilli dövlətlərlə əlaqələrinin qurulmasında model kimi dəyərləndirilməsi istisna edilməməlidir.

Azərbaycanın artan iqtisadi qüdrəti Qara dəniz hövzəsini də əhatə edir. Azərbaycanın bu regiona qoyduğu sərmayələrin miqdarı yaxın gələcəkdə 15 milyard dollar həddini keçəcək.

Hazırda Cənubi Qafqazın təhlükəsizliyi üçün başlıca təhdid  regionda həll edilməmiş münaqişələrin qalmasıdır. Dağlıq Qarabağın işğalı, Abxaziya və Cənubi Osetiya separatizmi regionda inteqrasiya prosesinə, Cənubi Qafqazın yeni və təhlükəsiz obrazının formalaşmasına qarşı yönəldilən əsas maneələrdir. 

Azərbaycan dünyanın güclü və nüfuzlu dövlətləri olan ABŞ, Rusiya və Fransanın BMT-nin Təhlükəsizlik Şurasında daimi üzvlüyünü nəzərə alaraq, onların ATƏT-in Minsk Qrupunda həmsədrliyinə öz razılığını verib. Lakin, Azərbaycan hələ də ümid edir ki, hər üç həmsədr dövlət BMT Təhlükəsizlik Şurasının dörd məlum qətnamələrinə əsasən çıxardıqları qərarlara əvvəl-axır hörmətlə yanaşacaqlar. Hər üç ölkənin işğalçı dövlətə təzyiq imkanları olsa da, təəssüf ki, heç biri mövcud təsir mexanizmlərindən istifadə etmir.

Narahatlıq doğuran məsələlərdən biri də regional təhlükəsizlik və ABŞ-ın Cənubi Qafqaz siyasətinin Birləşmiş Ştatlardakı bəzi kiçik qrupların təsirindən asılı olmasıdır. Həmin səbəb Birləşmiş Ştatların Asiya və Avropa arasında nəqliyyat arteriyası olan Bakı-Tbilisi-Qars dəmiryolu xəttinin çəkilişinə rəsmi yardım etməməsi ilə nəticələnib.

Amerika Birləşmiş Ştatları dünyanın ən güclü dövləti olaraq, münaqişənin nizamlanması prosesində əsas rol oynaya bilər və bunu etməlidir.

Amerikanın təşəbbüsü və dəstəyi ilə Türkiyə-Ermənistan münasibətlərinin normallaşdırılması səyləri də ABŞ-ın Cənubi Qafqaza dair qüsurlu və uzaqgörən olmayan siyasətinin təzahürüdür. Onun Ermənistanda öz nüfuzunun möhkəmləndirmək səyləri isə uğursuzluğa düçar olub. Erməni diasporunun təsiri nəticəsində Vaşinqton Cənubi Qafqazda sülhə və təhlükəsizliyə başlıca təhdidin –  Dağlıq Qarabağ münaqişəsinin obyektiv həllində fəal iştirak etmək imkanına malik deyil.   —06D-