Abzas Media işinin fiqurantları İstintaq Təcridxanasında əsassız məhdidyyətlərə məruz qalmaqda davam edirlər

1 saylı Bakı İstintaq Təcridxanasında saxlanılan jurnalist Elnarə Qasımovaya qarşı da məhdudiyyətlər tətbiq edilib, bu barədə Abzas Media nəşrinin Facebook-da yaydığı məlumatda deyilir.

Jurnalistin anası Natavan Qasımova bildirib ki, parlament seçkilərindən sonra Elnarənin ailə üzvləri ilə "canlı" görüşlərini qadağan ediblər. "Əvvəllər görüşə qələm-kağız aparmaq, qeydlər tutmaq olardı. Lakin Abzas Media-nın direktoru Ülvi Həsənli İstintaq Təcridxanasında məhbus qadına qarşı işgəncə faktını ictimailəşdirdikdən sonra jurnalistlərin ailə üzvləri ilə "canlı" görüşləri qadağan edilib və yalnız şüşə arxasından görüşmək olur", deyə Qasımova qeyd edib.

Eyni zamanda, şüşə arakəsmə arxasından görüşlər nəzarətçilərin ciddi nəzarəti altında keçirilir.

"Oktyabrın 12-də görüşdə nəzarətçi görüşün əvvəlindən axırına qədər başımın üstündə dayandı. Etirazımı bildirdikdə nəzarətçilər dedilər ki, onlara belə tapşırılıb. Kağız-qələm gətirməyə niyə icazə verilmədiyini soruşdum, mənə cavab verdilər ki, kağız olar, qələm isə yox, bu da göstərişdir", deyə Qasımova bildirib.

Bir müddət əvvəl eyni iş üzrə həbs edilmiş Ülvi Həsənlinin və Sevinc Vaqifqızının ailə üzvləri də "canlı görüşlərin" qadağan edildiyini bildiriblər.

Abzas Media-nın redaksiyasında hesab edirlər ki, COP29 yaxınlaşdıqca bu nəşrin həbsdə olan jurnalistləri üçün çətinliklər yaradılır.

* Elnarə Qasımova 2023-cü ilin noyabr - 2024-cü ilin yanvar aylarında "Abzas Media"nın işi üzrə həbs edilmiş altı jurnalistdən biridir. Sonradan bu iş üzrə iqtisadçı Fərid Mehralızadə də həbs olunub.

Əvvəlcə onlar hamısı CM-in 206.3.2-ci maddəsi ilə (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ittiham olunub.

Lakin 16-19 avqust tarixlərində  jurnalistlərə qarşı daha ağır ittihamlar - CM-in 192.3.2 (qanunsuz sahibkarlıq, külli miqdarda gəlir əldə eetməklə törədildikdə), 193-1.3.1 və 193-1.3.2 (cinayət yolu ilə əldə edilmiş əmlakı leqallaşdırma, qabaqcadan əlbir olan bir qrup şəxs tərəfindən törədildikdə), 206.4 (qaçaqmalçılıq, mütəşəkkil dəstə tərəfindən törədildikdə), 320.1 və 320.2 (sənədləri saxtalaşdırma və saxta sənədlərdən istifadə etmə), 213.2.1 (vergilərdən yayınma, mütəşəkkil dəstə tərəfindən törədildikdə) maddələri ilə ittihamlar irəli sürülüb.

Bu ittihamlara görə 12 ilədək azadlıqdan məhrumetmə cəzası nəzərdə tutulub.

Jurnalistlər bütün ittihamları rədd edirlər.