Azərbaycan prezidenti Türkiyə baş naziri ilə görüşüb

Bakı/14.03.18/Turan: Prezident İlham Əliyev martın 14-də Türkiyənin baş naziri Binəli Yıldırım ilə görüşüb. Bu barədə Azərbaycan prezidentinin rəsmi saytı məlumat yayıb.

İlham Əliyev bildirib ki, Türkiyə-Azərbaycan dostluq, qardaşlıq münasibətləri bundan sonra da uğurla inkişaf edəcək.

"Bu gün biz siyasi, iqtisadi, bütün başqa sahələrdə çox yüksək səviyyəli əməkdaşlıq edirik. Siyasi əlaqələrimiz ən yüksək zirvədədir, iqtisadi sahədə yaxşı nəticələr var".

Əliyev bildirib ki, iki ölkə arasında qarşılıqlı sərmayələr 10 milyard dollardan çoxdur.

Dövlət başçısı iki ölkənin reginla layihələri uğyrla həyata keçirdiyini bildirib.

Baş nazir Binəli Yıldırım bildirib ki, Türkiyə və Azərbaycan bir millət, iki dövlətdir.

"Ölkələrimiz arasındakı münasibətlər gündən-günə daha da inkişaf edir. Həm Türkiyədə, həm də Azərbaycanda qarşılıqlı investisiyalarımız, ticarətimiz artır, turizm sahəsində əməkdaşlığımız inkişaf edir. Biz bununla kifayətlənmirik. Eyni zamanda, region ölkələrinin də inkişaf etməsi üçün Türkiyə və Azərbaycan olaraq birlikdə çalışırıq".

O Qafqaz regionunda Gürcüstanın, Azərbaycanın və Türkiyənin həyata keçirdiyi layihələrdən - Bakı-Tbilisi-Qars dəmir yolu, Bakı-Tbilisi-Ceyhan neft, TANAP, Bakı-Tbilisi-Ərzurum təbii qaz, Bakı-Tbilisi-Qars layihələrindən danışıb. -03D-