Azərbaycanın sərhəd nəzarətinin gücləndirilməsi üçün Avropa İttifaqının yardımına ehtiyacı var

Avropa İttifaqı (Aİ) və Beynəlxalq Miqrasiya Təşkilatı (BMqT)  “Azərbaycanda miqrasiya və sərhəd idarəçiliyi üzrə potensialların gücləndirilməsi” layihəsini həyata keçirməyə başlayıblar.

Oktyabrın 22-də Hyatt Regency otelində Azərbaycan hökumət nümayəndələrinin iştirakı ilə layihənin təqdimatı keçirilib.

Dövlət Miqrasiya Xidməti rəisinin müavini Pərviz Musayev bildirib ki, layihə Aİ və Azərbaycan arasında viza rejiminin sadələşdirilməsi və readmissiya haqqında sazişlərin reallaşmasına yardım edir. Bu sazişlər sentyabrın 1-də qüvvəyə minib.

Aİ-nin Azərbaycan nümayəndəliyinin rəhbəri Malena Mard bildirib ki, 2014-17-ci illər üçün nəzərdə tutulan layihənin ümumi dəyəri 3,2 mln. avro təşkil edir və bunun 2,6 mln.-nı Aİ ödəyir.

Layihənin reallaşmasına Azərbaycanın bir sıra hökumət orqanları – XİN, DMX, DSX, Əmək və Əhalinin Sosial Müdafiəsi Nazirliyi və DİN cəlb edilib.

Layihə sərhəd və miqrasiya nəzarəti, bu sahədə idarələrarası əməkdaşlıq, texniki yardımın göstərilməsi üzrə potensialın gücləndirilməsini, qeyri-leqal miqrasiyanın və insan alverinin qarşısının alınması üzrə mexanizmlərin effektivliyinin artırılmasını nəzərdə tutur.

Öz növbəsində BMqT-nin Azərbaycandakı nümayəndələyinin rəhbəri Serhan Aktorpak bildirib ki, layihə çərçivəsində sərhəd xidmətinin yeni avadanlıqla təchiz edilməsi, polis və sərhədçilər üçün qeyri-leqal miqrasiya, insan alveri və transərhəd cinayətkarlığının dgər növlərinə dair xüsusi kurslatın keçirilməsi nəzərdə tutulur.

Həmçinin readmissiya çərçivəsində miqrantların qayıdışının monitorinqi sisteminin yaradılması və onların cəmiyyətə reinteqrasiyasına yardım nəzərdə tutulur.

Azərbaycan XİN Humanitar Məsələlər İdarəsinin rəisi Marat Kəngərlinski bildirib ki, layihə miqrasiya, immiqrasiya, tranzit və sığınacaqla təminetmə məsələlərinin və prosedurlarının effektiv idarə olunmasna yardım göstərəcək.

Layihə institusional islahatlar proqramının plan-2 çərçivəsində həyata keçirilir. Aİ bunun reallaşmasına 7,5 mln. avro ayırıb.

Qeyd edək ki, bu layihənin reallaşması Azərbaycanın artıq beynəlxalq yardıma ehtiyacının olmaması barədə bəzi deputatların və məmurların bəyanatlarına ziddir. Belə ki, onlar bu cür bəyanatlarla vətəndaş cəmiyyətini dəstəkləyən xarici donorların ölkədən sıxışdırılmasına haqq qazandırmaq istəyirlər.—06С-