Batareya udan fəal həbsxana xəstəxanasının karserinə salınıb

Xalq Cəbhəsi Partiyasının fəalı Elxan Əliyev həbsxana xəstəxanasının karserinə salınıb. Həkim onun həyat yoldaşına bildirib ki, onun udduğu batareya təbii yolla orqanizmdən xaric olunub. Lakin müxalifətçi özü bunu təkzib edib.

Mayın 27-də Apellyasiya Məhkəməsində Əliyev əsassız cinayət təqibinə qarşı etiraz əlaməti olaraq televizorun pultunun batareyasını udduğunu bildirib. Bundan sonra o, Penitensiar Xidmətin müalicə müəssisəsinə yerləşdirilib. 

Mayın 28-də onun həyat yoldaşı Şahnaz Əliyeva hospitala gəlib, lakin onu əri ilə görüşdürməyiblər. Həkim onunla görüşüb və Elxan Əliyevin vəziyyəti haqqında məlumat verib. Mayın 29-da axşam həyat yoldaşı ona zəng edib və həkimin batareyanın orqanizmdən xaric olduğu haqqında sözlərini təkzib edib. O, həmçinin hospitalda karserə salındığını, bunun ona çox əziyyət verdiyini bildirib. 

Udulmuş batareya insan üçün ölüm təhlükəsi yarada bilər, belə ki, onun tərkibində zərərli kimyəvi maddələr var, deyə Azərbaycan Həkimlər Birliyinin sədr müavini, radioloq Aydın Əliyev Turan-ın müxbirinə bildirib. 

Batareya orqanizmdə qida borusunda, - adətən uşaqlarda belə olur, - həmçinin mədədə ilişib qala bilər. Eyni zamanda, o, incə bağırsaqdan qalın bağırsağa keçiddə ilişib qala bilər.

Mədə turşusunun təsiri batareyanın tərkibindəki maddələrin orqanizmə sızmasına və ciddi zəhərlənməyə səbəb ola bilər. Mümkün variantlardan biri də peritonit - orqanizmin funksiyalarını pozan qarın boşluğunun infeksion iltihabıdır, bu da təcili əməliyyat tələb edir, deyə həkim qeyd edib.

Həkim hamar əşyanın təbii fizioloji yolla orqanizmdən xaric ola biləcəyini istisna etməyib, lakin bir neçə gün ərzində bu baş vermirsə, tibbi müdaxiləyə ehtiyac var.

Penitensiar Xidmətdən şərh almaq mümkün olmayıb.

* Elxan Əliyev 2023-cü ilin iyulunda "dələduzluq" və "saxta sənəd hazırlama və istifadə etmə" ittihamı ilə həbs olunub. Fəal ittihamları uydurma adlandırıb. Hüquq müdafiəçiləri onu siyasi məhbus kimi tanıyıblar.

Aprelin 1-də Bakı Ağır Cinayətlər Məhkəməsi onu 5 il azadlıqdan məhrumetmə cəzasına məhkum edib. Mayın 13-də apellyasiya şikayətinə baxılması zamanı Əliyev quru aclığa başlamaq niyyətində olduğunu bildirib. 

Ombudsman Aparatının mətbuat xidmətindən Turanın sorğusuna cavab olaraq bildiriblər ki,  “2024-cü il 18 may tarixində Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın tapşırığı əsasında Milli Preventiv Qrupun üzvləri tərəfindən Penitensiar Xidmətin Umbakı Penitensiar Kompleksində Elxan Əliyev konfidensial qaydada qəbul edilib”. “Onunla söhbət aparılıb, saxlama şəraiti və rəftar məsələləri araşdırılıb. Ardınca isə E.Əliyev Penitensiar Xidmətin Müalicə Müəssisəsinə köçürülüb. Həmin şəxsin sağlamlıq vəziyyəti hazırda normaldır. Elxan Əliyevin hüquqlarının təmini və sağlamlıq vəziyyəti diqqətdə saxlanılır”, - daha sonra mətbuat xidmətindən bildiriblər.