Beynəlxalq vasitəçilər Azərbaycan və Ermənistan prezidentlərinin görüşünü hazırlayırlar

Bakı /28.09.17/Turan: Oktyabrın əvvəlində ATƏT-in Minsk Qrupunun həmsədrləri regiona səfər edəcəklər. Onlar iki ölkə prezidentinin görüşünün hazırlanması məqsədilə Azərbaycan və Ermənistan rəhbərliyi ilə görüş keçirəcəklər.

Bu barədə sentyabrın 22-23-də Nyu-Yorkda BMT Baş Assambleyası çərçivəsində həmsədrlərin iki ölkə XİN rəhbəri ilə danışıqlarından sonra məlum olub.

"Ermənistan və Azərbaycan XİN rəhbərləri ilə görüşdə əsas məqsəd münaqişə zonasında vəziyyəti müzakirə etmək, danışıqlar prosesinin aktivləşdirilməsi yollarını öyrənmək və Ermənistan-Azərbaycan prezidentlərinin qarşıdakı sammitini hazırlamaqdır", - ATƏT-in Minsk Qrupu həmsədlərinin danışıqların yekunlarına dair bəyanatında deyilir.

Bunun ardınca BMT baş katibi Quterreş iki ölkə prezidentinin görüşünün mümkünlüyü barədə bəyanatla çıxış edib.

Ancaq görüşün harada və nə zaman keçiriləcəyi açıqlanmır. Tərəflərin ritorikasını nəzərə alsaq, hazırda belə görüş ideyası az ağlabatandır.

Azərbaycan prezidenti İlham Əliyev BMT Baş Assambleyasında çıxışında Ermənistan prezidentini hərbi cinayətkar adlandırıb.

Ermənistan XİN rəhbəri Nalbandyan isə Qarabağ ətrafında "təhlükə törətməyən" ərazilərin bir hissəsinin azad edilməsinin mümkünlüyü barədə bəyanat səsləndirib.

Görünür, tərəflər Moskvanın vasitəçiliyilə hansısa danışıqlar aparırlar. Tərəflərin Qarabağla bağlı sülh sazişini imzalamağa hazır olması barədə RF Dövlət Dumasının komitə rəhbəri Konstantin Kosaçevin bəyanatı da dolayısı ilə bunu təsdiq edir.

Belə gözləntilərin nə dərəcədə real olması yaxın zamanlarda bəlli olacaq. -02D-