BTQ-də durğunluq davam edir

Bakı-Tbilisi-Qars (BTQ) dəmir yolunun inşasının mayda bərpa olunacağı vəd edilsə də, baş tutmayıb. Hələlik daxil olan ziddiyyətli məlumatlar işlərin davam etdirilməsində problemin olduğunu bildirir. Plana görə, işlər 2014-cü ilin sonlarında başa çatmalıdır.

Layihə 2012-ci ilin sonundan, Gürcüstanda Bidzina İvanişvili koalisiyasının hakimiyyətə gəlişindən sonra ləngiməyə başlayıb. Yeni hökumət layihənin $220 mln.-dan  $775 mln.-dək bahalaşmasını şübhə altına alıb. Bu məsələ ötən ilin sonlarında baş nazir İvanişvilinin prezident İlham Əliyevlə görüşündə də qaldırılıb. 

Azərbaycan Gürcüstan hissəsinin tikintisi üçün 2007-ci ilin fevralında Dövlət Neft Fondundan  $775 mln. məbləğində kredit nəzərdə tutub. 2012-ci ilin oktyabrında “Gürcü arzusu” koalisiyası hakimiyyətə gəlməzdən öncə bu kreditdən $431,3 mln. ayrılıb.

Layihə 124 km. uzunluğunda dəmir yolunun inşasını nəzərdə tutur. Bunun 92 km.-i Türkiyə hissəsinin, 32 km-i Gürcüstanın payına düşür. Yolun uzunluğunda fərqin və Türkiyə hissəsində relyefin daha mürəkkəb olmasına baxmayaraq layihənin dəyəri əvvəlcədən hər tərəf üzrə $200 mln. təşkil edib.

Gürcüstan mənbələrinin məlumatına görə, yeni hökumət xəbərdarlıq edib ki, layihəyə real olaraq sərf edilən vəsaiti qaytarmağa hazırdır. Prezidentlər Əliyev və Saakaşvili layihənin detalları, əsasən onun bahalaşması ilə bağlı razılığa gəldikdən sonra Gürcüstan hissəsinin inşası üçün vəsaiti Azərbaycan kredit kimi ayırıb. 

Yaranmış vəziyyətdə Saakaşvili özünü çox əsəbi aparır. O, İvanişvilinin yeni yanaşması nəticəsində yaranmış maliyyə məsələlərini yoluna qoymaq üçün bir neçə dəfə Bakıya gəlib. Sonuncu səfər mayın 7-də olub.

Layihənin bahalaşması yolun Türkiyə hissəsində də qeydə alınıb ki, bu da müxalifətin qınağına səbəb olub. Hər iki tərəf üzrə layihənin bahalaşması mürəkkəb relyeflə əlaqələndirilir və layihələndirmə zamanı bu barədə məlum olmadığı qeyd edilir.

Türkiyənin Rayhaber portalının məlumatına görə, müxalifətdə olan Cümhuriyyət  Xalq Partiyasından deputat Ensar Öğüt bildirib ki, 2013-cü ildə dəmir yolunun bərpası proqramı baş tutmayıb və bunun hətta 2014-2015-ci illərdə mümkün ola biləcəyi də şübhəli görünür. -0--