C.Uorlik: Əliyev və Sarkisyanın siyasi iradəsi həlledici amildir

Vaşinqton Qarabağ nizamlanması üzrə sülh danışıqlarında “yeni səylərə və etimada” ümid edir, bu barədə ATƏT-in Minsk qrupunun amerikalı həmsədri Ceyms Uorlik Turan-ın Vaşinqton müxbiri ilə söhbətində bidirib.

Həmsədrlərin regiona gözlənilən səfərinə toxunan həmsədr qeyd edib ki, işinin mənasını hər iki ölkənin xalqları və hökumətləri tərəfindən regionda uzunmüddətli sülhü təmin edən qərarlar qəbul edilməsində görür.

“Regionla tanışlığım təsdiq edir ki, insanlar münaqişənin tənzimlənməsini istəyir və itkilər olacağını dərk edir... Münaqişə həll edilsə, əminəm ki, Qafqaza çiçəklənmə gətirəcək. Buna görə biz insanlara və hökumətlərə bu məqsədlərə nail olmaq imkanı verən yollar axtarmalı və tapmalıyıq”, deyə o bildirib.

Regiondakı vəziyyəti “təhlükəli” adlandıran Uorlik qeyd edib ki, Ermənistan və Azərbaycan silahlanmağa davam edir, baxmayaraq ki, hər iki lider sülh variantını və Minsk qrupu formatını seçərsə, münaqişə “alternativ imkanlara” malikdir. 

Bu gün vasitəçilərin uzun müddət sonra ilk dəfə iki ölkə liderini bir masa arxasına əyləşdirməyə çalışdığını nəzərə alsaq, “tərəflərin bir-birinə etimadı həyati əhəmiyyət kəsb etməyə başlayır”, deyə o qeyd edib.

“Gələn həftə biz hər iki prezidentlə görüşmək üçün regiona səfərə hazırlaşırıq və ümid edirik ki, onlar bir-biri ilə görüşmək qərarı verəcəklər... Qapıları açıq qoymaq və əlaqə saxlamaq, irəliləmək haqqında səmərəli danışıqlar aparmaq mühümdür. Ümid edirəm ki, Minsk qrupu bu məsələdə kömək edə biləcək”, deyə Uorlik vurğulayıb.

Gələcək görüşün vaxtı və yeri haqqında suala cavab verən diplomat deyib ki, “bu, prezidentlərin özlərindən asılı olacaq”.

“Ümid edirəm ki, bu, tezliklə olacaq, amma onların özlərindən asılıdır”, deyə həmsədr bildirib.

Danışıqların detallarına və müzakirə olunan mövzulara gəlincə, diplomat qeyd edib ki, “irəliyə real baxmaq lazımdır”.

“İndi tammiqyaslı danışıqlar aparılması və qərar əldə edilməsi üçün zəruri olan təcrübi addımlar atılmalıdır... Ermənistan və Azərbaycan xalqları məhz bunu gözləyir”, deyə o bildirib.

Çərşənbə günü Ceyms Uorlik Corctaun Universitetində Rusiya, ABŞ və İranın Cənubi Qafqazdakı siyasətinə həsr olunmuş konfransda çıxış edib.

“Dağlıq Qarabağ münaqişəsi dondurulmuş münaqişə deyil, baxmayaraq ki, onu unudulmuş münaqişə adlandırmaq olar”, deyə o, çıxışında qeyd edib. -25В-