Elmar Məmmədyarov inandırmağa çalışır, polis dağıdır

Ötən gün Vyanada Avropa Şurası Nazirlər Komitəsinin 124-cü sessiyasında Azərbaycan qarşıdakı 6 ay müddətinə bu quruma sədrliyi qəbul edib.

Bununla bağlı Azərbaycan XİN rəhbəri Elmar Məmmədyarov Azərbaycan sədrliyinin prioritetlərini təqdim edib.

“Azərbaycan  Avropa Şurasının üç əsas sütunu – insan hüquqları, qanunun aliliyi və demokratiyaya güclü dəstəyin göstərilməsində səylərini əsirgəməyəcək. Avropa Şurasının əsas dəyərlərinin dəstəklənməsi və təşviqi bizim bütün fəaliyyət və öhdəliklərimizin mərkəzində olacaq”, - nazir bildirib.

  Azərbaycan üzv dövlətlərdən demokratiya, təhlükəsizlik və stabillik sahəsindəki mövcud problemlərə təcili və qəti reaksiyası məsələsinə ciddi diqqət ayıracaq.

Korrupsiyaya qarşı  mübarizə məsələsi  Azərbaycanın sədrliyinin əsas prioritetlərindən biri olacaq.

  Belə ki, Beynəlxalq Antikorrupsiya Akademiyası ilə birgə Bakıda yüksək səviyyəli konfrans təşkil olunacaq. Konfrans antikorrupsiya qanunlarının tətbiqinə böyük əhəmiyyət verərək ən yaxşı praktikalar üzrə fikir mübadilələrinə imkan yaradacaq.

Həmçinin Azərbaycan mədəniyyətlərarası dialoqa böyük əhəmiyyət verəcək və Avropa Şurasının bu mövzu üzrə  illik mübadiləsini təşkil edəcək.

Azərbaycan diqqəti sosial həmrəylik və əhalinin   zəif müdafiə olunan təbəqələrinə dəstək  məsələsinə yönəldəcək.

Eyni zamanda Azərbaycan gənclər siyasətinə diqqət yetirəcək, Avropa ali təhsil sahəsinin həyata keçirilməsi üzrə 4-cü regional nazirlər iclası və Gənclər Siyasəti üzrə BMT-nin Qlobal Forumu kimi iki əhəmiyyətli tədbirə ev sahibliyi edəcək.

Bakıda Avropa İnsan Hüquqları Konvensiyanın  həyata keçirilməsində yerli hakimlərin rolu barədə yüksək səviyyəli konfrans keçiriləcək.

   Azərbaycan  Avropa İttifaqı, ATƏT və BMT kimi təşkilatlarla əməkdaşlığın daha da möhkəmləndirilməsinə dəstək göstərəcək.

Bundan əlavə, 2014-cü ilin sentyabrında Bakıda Avropa Şurasının qonşuluq siyasətinə həsr olunmuş yüksək səviyyəli nazirlər konfransı keçiriləcək.

  Azərbaycan Avropa Şurasının baş katiblik, Parlament Assambleyası,Yerli və Regional hakimiyyət orqanları Konqresi və digər qurumlarla yaxından əməkdaşlıq edəcək.

Qarşıdakı 6 aylıq müddətdə Azərbaycanda 18 tədbir keçiriləcək.

Qeyd edək ki, Elmar Məmmədyarovun insan hüquqlarına və qanunun aliliyinə sadiqlik barədə təntənəli çıxışından bir neçə saat əvvəl NİDA fəallarına qarşı hökm oxunub, onları dəstəkləyənlər amansızlıqla dağıdılıb, 20-dən çox aksiya iştirakçısı saxlanaraq məhkəmə qarşısına çıxarılıb.

Odur ki, insan hüquqlarını hər şeydən yüksək tutan Avropa Şurasında Azərbaycanın sədrliyə başlaması yalnış atılan addıma bənzəyir.06D--