General Vidadi Mirkamal İlyas İsmayılovu haqlı sayır

Deputat, “Ədalət” partiyasının sədri İlyas İsmayılov bu günlərdə Konstitusiya Məhkəməsinə bəzi deputatların mandatlarının ləğv olunması ilə bağlı müraciət edib. 

Buna səbəb 20-yə qədər deputatın deputat mandatı ilə yanaşı, icra qurumlarında konkret vəzifə tutmalarıdır. İ.İsmayılova görə, qanunverici səlahiyyətə malik deputat eyni zamanda icra qurumunda vəzifə tuta bilməz. Çünki bu, həm Konstitusiyanın, həm də seçki qanunvericiliyinin tələblərinə ziddir. Partiya sədri parlamentdə 20-yə yaxın belə deputat olmasına diqqət çəkib. İ.İsmayılov icra qurumlarında çalışan deputatların ya deputat mandatından, ya da icra qurumlarındakı vəzifələrindən məhrum olunmalarını diqqət mərkəzinə çəkib. 

Belə deputatlardan biri Bakı Dövlət Universitetinin (BDU) rektoru Abel Məhərrəmov, digəri Memarlıq və İnşaat Universitetinin rektoru Gülçöhrə Məmmədovadır. “Odlar Yurdu” universitetinin rektoru Əhməd Vəliyev və s. var. 

Bundan əlavə, parlament üzvü olan deputatların, demək olar ki, əksəriyyəti qeyri-leqal biznes qurumlarına malikdir. Bu qurumlar ona görə qeyri-leqal adlandırılır ki, onlar deputatların öz adlarına yox, qohum-əqrəbalarının adlarına olur. Amma bu gerçəkiliyi də hamı bilir ki, yüksək post tutan şəxs postdan gedən kimi həmin biznes strukturları da sıradan çıxarılır. Bu mənada Azərbaycan parlamenti sırf parlamentarilərdən yox, icraçı-parlamentari, biznesmen-parlamentari və s. sintezlərdən ibarətdir.    

Milli Şuranın üzvü, ədliyyə generalı Vidadi Mirkamal Turan-ın müxbirilə söhbətində deputat İlyas İsmayılovun təşəbbüsünü birmənalı dəstəkləyərək, tam haqlı sayıb. Konstitusiyanın uyğun maddələrinin qanunverici oqran təmsilçilərinin icra qurumlarında vəzifə sahibi olmasını qadağan etməsi xatırladılıb. Amma buna baxmayaraq, 20 ildir ki, təcrübədə Konstitusiya və seçki qanunvericiliyi tələblərinin pozulmasının davam etdiyi vurğulanıb. V.Mirkamal bu mənada İ.İsmayılovun narahatlığını əsaslı adlandırıb. Onun fikrincə, Konstitusiya və seçki qanunvericiliyi tələblərinin bu şəkildə pozulması ölkədə hüquqi nihilizmdən və hüquqi dövlət qurmaqdan uzaq olmaqdan xəbər verir. -05B-