Gürcüstan və Azərbaycan dövlət sərhədinin 34%-ni razılaşdırmayıb

Bakı/02.04.19/Turan: Gürcüstan və Azərbaycan hələlik dövlət sərhədinin 34%-ni razılaşdırmayıb, bu barədə Gürcüstan XİN-in məlumatında deyilir.

"Delimitasiya üzrə dövlət komissiyaları səviyyəsində sərhədin 66%-i razılaşdırılıb və qalan seqmentlərin razılaşdırılması məqsədilə danışıqlar davam etdirilir", deyə apsny.ge XİN-dən sitat gətirir.

"Hazırda tərəflər komissiyaların tərkibini yeniləyir və yaxın gələcəkdə proses bərpa ediləcək (komissiyaların konkret görüş tarixi müəyyən edilməyib).

Delimitasiya tamamilə yekunlaşana qədər SSRİ dövründə mövcud olan, keçmiş respublika/inzibati sərhəd xətti dövlət sərhədi hesab olunur və buna uyğun olaraq sərhədin mühafizəsi həyata keçirilir.

Dövlət sərhədinin delimitasiyası işləri 1995-ci ildən etibarən aparılır. Sərhəd perimetrinin 66%-i delimitasiya üzrə dövlət komissiyaları səviyyəsində razılaşdırılıb və qalan seqmentlərin razılaşdırılması məqsədilə danışıqlar davam etdirilir", deyə XİN bildirir.

Gürcüstan-Azərbaycan sərhədinin delimitasiyası məsələsi Gürcüstan və Azərbaycan prezidentlərinin görüşündən sonra fəallaşıb. Salome Zurabişvili İlham Əliyevlə görüşündə bildirib ki, illər sonra sərhəd məsələsinin həllini yekunlaşdırmağın vaxtı çatıb.

Qeyd edək ki, qismən Azərbaycanda olan David Qareci kilsəsinin bir hissəsi əsas maneədir. Bakı Gürcüstan tərəfin bu sahəni başqa ərazi ilə mübadilə etmək təklifini qəbul etmir. -02D-