GÜRCÜSTAN VƏ RUMINİYA PREZİDENTLƏRİ SENTYABRIN 13-DƏ BAKIYA GƏLİR

    Gürcüstan və Rumıniya prezidentləri - Mixail Saakaşvili və Trayan Basesku sentyabrın 13-də Bakıya səfər edəcəklər. Səfərin məqsədi AGRİ (Azerbaijan-Georgia-Romania Interconnector) qaz nəqliyyatı layihəsinin həyata keçirilməsinə həsr olunmuş Azərbaycan, Gürcüstan və Rumıniya prezidentlərinin sammitində iştirak etməkdir.
     Sentyabrın 13-də prezidentlərin qeyri-rəsmi görüş keçirəcəyi və Bakının tarixi mərkəzində gəzintiyə çıxacaqları gözlənilir. Sentyabrın 13-də həmçinin energetika nazirləri səviyyəsində üçtərəfli danışıqlar aparılacaq. Bundan əvvəl sammitdə Avropa Komissiyasının rəhbəri Joze Manuel Barrozonun da iştirak edəcəyi bildirilmişdi. Avropa İttifaqındakı mənbələrin məlumatına görə, hələlik Avropa Komissiyası rəhbərinin səfəri təsdiqlənmir. Lakin Avropa Komissiyasının energetika üzrə direktorluğunun rəhbəri Filip Lovenin səfəri məlumdur.
     Qarşıdakı tədbirlə əlaqədar Bakıda təhlükəsilzik tədbirləri gücləndirilib.
     Qeyd edək ki, maye qazın emalı və nəqli sahəsində əməkdaşlıq haqqında AGRI layihəsi üzrə memorandum 2010-cu il aprelin 13-də Buxarestdə imzalanıb.
     Bu məqsədlə bərabər paylarla üçtərəfli BM-in yaradılması nəzərdə tutulur. İlin sonuna qədər layihə üzrə ilkin TİƏ-nin hazırlanması planlaşdırılır. Layihəyə əsasən, Azərbaycan qazı
    Gürcüstanın Qara dəniz sahilinə ixrac olunacaq. Burada qaz sıxılacaq,
    daha sonra tankerlərlə Rumıniyanın Konstansa limanına göndəriləcək və
    mövcud infrastrukturla Rumıniyaya və digər Avropa ölkələrinə daxil
    olacaq.
     Gələcəkdə həmçinin Konstansadan Bolqarıstan və Macarıstana iki qaz kəmərinin çəkilməsi nəzərdə tutulur.