İlham Əliyev türk ölkələrinin qarşılıqlı investisiyaları artırmasının tərəfdarıdır

Bakı/15.10.19/Turan: Çərşənbə axşamı Bakıda Türkdilli Dövlətlərin Əməkdaşlıq Şurasının sammitində Türkiyə prezidenti Erdoğanın təşəbbüsü ilə Qazaxıstanın keçmiş prezidenti Nursultan Nazarbayev təşkilatın fəxri prezidenti seçilib.

Öz növbəsində, Azərbaycan prezidenti İlham Əliyev Nazarbayevə Türk Şurasının ali ordenini təqdim edib.

Əliyev Özbəkistan prezidentinin Türk Şurasına qoşulmaq qərarını alqışlayıb, bu addımın Türk dünyasında əlaqələrin möhkəmlənməsinə xidmət edəcəyini qeyd edib. "Macarıstan baş nazirinin tədbirdə müşahidəçi qismində iştirak etmək qərarı isə coğrafiyamızı genişləndirir", deyə Əliyev bildirib.

O xatırladıb ki, 10 il əvvəl Naxçıvanda türkdilli ölkələrin sammitində Türk Şurasının yaradılması ilə bağlı mühüm qərarlar qəbul edilib.

"Təəssüf ki, vaxtilə qəbul edilmiş Zəngəzurun Azərbaycandan alınıb Ermənistana verilməsi qərarı türk dünyasında əlaqələri və yolları ayırıb", deyə Əliyev qeyd edib.

O vurğulayıb ki, sammitin əsas mövzusu kiçik və orta biznesin inkişafına həsr olunub. Azərbaycanda təkcə ölkədə deyil, onun hüdudlarından kənarda da işləyə bilən möhkəm orta və kiçik biznes sinfi formalaşıb.

Ölkəyə qoyulan 270 mlrd. dollar investisiyanın yarısı xarici investisiyalardır. Türkdilli ölkələr arasında investisiyalar da artır. Məsələn, Azərbaycan Türkiyəyə 15 mlrd. dollar, Türkiyə isə Azərbaycana 12 mlrd. dollar investisiya qoyub.

Azərbaycan üçün Dağlıq Qarabağ münaqişəsi qlobal problemdir. Ermənistanın destruktiv mövqeyi ilə əlaqədar danışıqlar prosesində irəliləyiş yoxdur. Hazırda Ermənistan müsəlman ölkələri ilə dostluq etməyə çalışır. Amma əraziləri işğal edərək, oradakı məscidləri məhv edən ölkə müsəlman ölkəsinin dostu ola bilməz, deyə Əliyev qeyd edib. -71C-