İlham Əliyevin Brüssel səfərinin yekunlarına dair

İlham Əliyevin Brüsselə NATO-nun qərargah mənzilinə  qısa səfərinin ilkin yekunları və Alyansın baş katibi Foq Rasmussenlə danışıqlar Bakının Alyansla münasibətlərdə tutacağı xəttin müəyyən edildiyini göstərir.

Görüşdən sonra birgə mətbuat konfransında çıxışlardan göründüyü kimi, Əliyev və Rasmussen gələcək münasibətlərin ümumi platformasını formalaşdırıblar. Lakin hər bir tərəf öznü daha çox qane edən məqamları vurğulayıb.

Xüsusən, Əliyev dəfələrlə qeyd edib ki, Bakı bundan sonra da Əfqanıstana kömək etməyə və onun ordusunu və güc qurumlarını maliyyələşdirməyə hazırdır. Bakı həmçinin NATO qoşunlarının və yüklərinin Əfqanıstana tranzitində əməkdaşlıq edəcək ki, hazırda bu tranzit ümumi daşımaların 40%-ni təşkil edir.

Eyni zamanda, Əliyev NATO-nu Azərbaycandan Avropaya qaz nəql olunacaq enerji infrastrukturunun təhlükəsizliyinin təmin edilməsində iştirak etməyə çağırıb. Bakı üçün terrora qarşı mübarizə məhz bundan ibarətdir.

Öz növbəsində, Foq Rasmussen Əliyevin qeyd etdiyi bəndlərlə yanaşı, Azərbaycan SQ-də islahatlar aparılması və onların NATO standartlarına uyğunlaşdırılması məsələlərini vurğulayıb.

O, həmçinin demokratiya məsələləri, nəzərə alınmaqla, siyasi dialoqun davam etdirilməsi zərurətini qeyd edib.

Bu qeydləri qulaqardı edən Əliyev Azərbaycanın Alyans üçün əhəmiyyətini vurğulayaraq, təşkilatı Bakı ilə dostluğa dəyər verməyə çağırıb.

Rəsmi Bakının ev hazırlıqlarından həmçinin Azərbaycanın hökumətyönlü KİV nümayəndələrinin Bakı ilə münasibətlərdə ikili standartlara son qoyulması zərurəti haqqında fikirlərini qeyd etmək lazımdır. Bu KİV-lərin versiyasına görə, Qərb tərəfindən demokratiya normaları və insan hüquqlarının pozulmasının tez-tez tənqid edilməsi bu ikili standartları göstərir. Bu qiymətləndirmələri təkzib edən Rasmussen qeyd edib ki, Qərbdə ölkədən asılı olmayaraq, bütün hüquq və azadlıqların pozulması tənqid edilir və Azərbaycan özünü demokratik dünyanın bir hissəsi hesab edirsə, bu tənqiddən “qaça bilməyəcək”.

Bir müddət əvvəl Avropa Parlamentinin adının gizli saxlanılmasını istəyən nümayəndəsi Turan agentliyinə bildirib ki, Bakının strategiyası Qərblə əməkdaşlığı yalnız iqtisadiyyatla məhdudlaşdırmaq üzərində qurulur. “Sizin hakimiyyətiniz siyasi əməkdaşlıqdan qorxur və bunu istəmir, çünki bu, demokratiya və insan hüquqlarına riayət olunması deməkdir. Hakimiyyətin fikrincə, qərb diplomatiyası Azərbaycanda islahatlar aparmaq istəməyən hakim rejim üçün təhlükədir.

Bu məqsədlərin həyata keçirilməsi üçün Bakı öz neftindən, indi isə həm də qazından fəal şəkildə istifadə edir. O, ərəb dünyası ölkələri ilə eyni yoldan gedir – Qərbin susmasına qarşılıq neft. Lakin hökumətiniz Misirdə, Tunisdə, Liviyada bunun nəyə gətirib çıxardığını xatırlamamağa üstünlük verir və hesab edir ki, o belə bir təhlükə ilə üz-üzə deyil”, deyə mənbə bildirib.

Eyni mənbə qeyd edib ki, “kürü diplomatiyası” uğurludur, rəsmi Bakı neft gəlirləri və enerji resurslarının nəqli ilə bağlı şantajlar vasitəsilə AŞPA üzvlərinin səslərini manipulyasiya etməyə - qətnamələrin qəbuluna mane olmağa və seçkilərin saxtalaşdırılmasına bəraət qazandırmağa müvəffəq olur. “Təəssüf ki, korrupsiyaya uğramış məmurlar və siyasətçilər hər yerdə var”, deyə Avropa Parlamentinin nümayəndəsi qeyd edib. -02В-