QHT-lərin müraciəti: Cənab prezident, qanunlara dəyişikliklər paketini imzalama!

Bu gün Beynəlxalq Mətbuat Mərkəzində Vətəndaş Cəmiyyəti Forumu keçirilib. Forum iştirakçıları Azərbaycan prezidentini Milli Məclisin 2013-cü il dekabrın 17-də qəbul etdiyi qanunlara qeyri -hökumət təşkilatlarının (QHT) fəaliyyətini məhdudlaşdıran dəyişikliklər paketini imzalamamağa çağırıb. 

Forumda onlarla QHT rəhbəri, ictimai xadimlər, diplomatik missiyaların rəhbərləri iştirak ediblər. Prezident Administrasiyası, Ədliyyə və Maliyyə nazirlikləri, digər hökumət qurumlarının nümayəndələri dəvətli olsalar da tədbirə qatılmayıblar. 

Milli Məclis 2013-cü il dekabrın 17-də vətəndaş cəmiyyətinin fəaliyyəti ilə bağlı “Hüquqi şəxslərin dövlət qeydiyyatı və dövlət reyestri haqqında”, “Qeyri- hökumət təşkilatları (ictimai birliklər və fondlar) haqqında”, “Qrant haqqında” qanunlara və “İnzibati Xətalar Məcəlləsi”nə 8 əlavə, 50-dək düzəliş edib. Əlavələrin 7-i cərimələrin artırılması, 1-i QHT-lərin fəaliyyətinin 1 il müddətinə dayandırılması ilə bağlıdır. Bu dəyişikliklərdə hüquqi şəxslər üçün müəyyən edilən cərimələrin ümumi məbləği 8 min, fiziki şəxslər üçün isə 3 min AZN olub.  

Düzəlişlər həmçinin vergi, qrant sənədləri, üzvlərin hüquqları, sənədləşmə və məsuliyyətə cəlb etmənin dairəsinin genişləndirilməsini nəzərdə tutur. Eyni zamanda xarici QHT-lərin fəaliyyətinə ciddi mane olacaq düzəlişlər edilib. Bu QHT-lər siyasi proseslər və mənəvi dəyərlərlə bağlı fəaliyyət göstərə bilməz.

“Biz Azərbaycan prezidentini bu dəyişikliklər paketini imzalamamağa, hökuməti vətəndaş cəmiyyəti ilə dialoqa çağırırıq. Hesab edirik ki, prezident qanunlara dəyişikliklər paketini  imzalayarsa, bu, vətəndaş cəmiyyətinin fəaliyyətini ciddi məhdudlaşdıracaq”, - foruma sədrlik edən Qubad İbadoğlu qeyd edib. 

Forum iştirakçıları qanunların vətəndaş cəmiyyəti ilə müzakirə edilmədən parlamentin gündəliyinə çıxarılmasını  qəbuledilməz sayırlar. “Dəyişikliklər paketi parlamentin müzakirəsindən cəmi bir gün qabaq Milli Məclisin saytında yerləşdirilib. Vətəndaş cəmiyyətinin sənədlərə rəy bildirmək imkanı belə olmayıb”, - Q.İbadoğlu vurğulayıb. 

Diplomatlar da hökuməti vətəndaş cəmiyyəti ilə dialoqa çağırıb və qanunvericiliyə edilən dəyişikliklərin müzakirəsini vacib sayıblar. 

ABŞ-ın Azərbaycandakı səfiri Riçard Morninqstar bildirib ki, onun hökuməti Azərbaycanda vətəndaş cəmiyyətinin rolunu dəstəkləyir. Azərbaycan hökuməti insan hüquqları və demokratiyanı genişləndirməli, ifadə və toplaşma azadlıqlarını təmin etməlidir.

O, dövlət katibi Con Kerrinin fikirlərinə istinadla deyib ki, insan inkişafı vətəndaş cəmiyyətindən qaynaqlanır. “Vətəndaş cəmiyyəti hüququn və insan ləyaqətinin qorunmasında önəmlidir. Demokratiya üçün həmçinin media azadlığı və birləşmək azadlığı da mühümdür. Vətəndaş cəmiyyəti ümumi maraqlar uğrunda çalışır, hökumətin fəaliyyətini monitorinq edir, korrupsiyaya qarşı mübarizə aparır, vətəndaşlarla birgə çalışan hökumətin qurulmasında mühüm rol oynayır”, - Morninqstar qeyd edib. 

Səfir həmçinin hesab edir ki, bir sıra yerlərdə vətəndaşların hökumətlərlə birgə işləməsini əngəlləyirlər. “Bu qanunlara dəyişikliklər həm yerli, həm də xarici QHT-lərin fəaliyyətini çətinləşdirəcək”, - o xatırladıb. 

Avropa Birliyinin Azərbaycandakı nümayəndəliyinin rəhbəri Malena Mard deyib ki, təşkilatın yeni kommunikasiya siyasətində ölkənin inkişafında vətəndaş cəmiyyətinin vacib rolu qeyd edilir. O, hökumətlə vətəndaş cəmiyyəti arasında dialoqun başlanmasını vacib sayır. “Avropa Birliyi Azərbaycan dövləti, vətəndaş cəmiyyətləri və vətəndaşlarla tərəfdaş olmaq istəyir. Çünki demokratiyanın inkişafında aktiv vətəndaş cəmiyyətinin rolu əvəzsizdir. Təəssüf ki, bəzən vətəndaş cəmiyyətinə sadəcə bir tənqidçi səs kimi baxırlar. Vətəndaş cəmiyyəti demokratiyanın özəyidir və demokratik dövlət üçün çox mühümdür”, - o qeyd edib. 

Səfirlər və beynəlxalq təşkilatların nümayəndələri Azərbaycanın vətəndaş cəmiyyətinə və hökumətə yardım etməyə hazır olduqlarını bildiriblər. 

“Dövlətlə vətəndaşlar arasında daimi dialoqun olmasında vətəndaş cəmiyyəti çox mühümdür. Biz ümid edirik ki, Azərbaycan hökumətinin vətəndaş cəmiyyəti ilə dialoq üçün gücü var. Amma təəssüf ki, indi onun fəaliyyətini məhdudlaşdıran addımlar atmaq istəyirlər”, - Böyük Britaniyanın Azərbaycandakı səfiri İrfan Siddiq qeyd edib. 

Ekspertlər də qanunvericiliyə dəyişiklikləri geniş şərh ediblər. Onların fikrincə, qanunlara dəyişiklik paketinin imzalanması QHT-lərin fəaliyyətinin ciddi məhdudlaşdırılmasına, qeydiyyatdan keçməyən QHT-lərin fəaliyyətinin tam dayandırılmasına, qrantların verilməsinə,   vətəndaş institutunun hökumətin təsir altına düşməsinə şərait yaradacaq. 

Bununla yanaşı, QHT nümayəndələri ötən il dekabrın 30-da Prezident Administrasiyasında ictimai siyasi şöbənin təmsilçisi ilə görüşüb, qanunun imzalanmaması üçün müraciətlərini təqdim ediblər. Bundan sonra qanunlara dəyişikliklərin QHT-lərin fəaliyyətinə göstərəcək təsirlərlə bağlı hüquqi şərh təqdim edilib. İndiyədək müraciətlərinə cavab verilməyib. 

QHT Forumu müzakirələrin yekunu olaraq bu gün də prezident İlham Əliyevə qanunlara dəyişiklik paketini imzalamamağa çağıran müraciət ünvanlayıb.-03C-