İlqar Məmmədovun azadlığa buraxılması məsələsi necə həll oluna olar?

Bakı/08.12.17/Turan: REAL Hərəkatının lideri İlqar Məmmədovun işilə bağlı Avropa İnsan Hüquqları Məhkəməsinin (AİHM) qərarının icra edilməməsi ətrafında vəziyyət Azərbaycanla Avropa Şurası arasında münasibətlərdə böhranın yaranmasına səbəb olub.

AŞ Nazirlər Komitəsi Azərbaycana qarşı Avropa konvensiyasının 46.4-cü maddəsində nəzərdə tutulan prosedura başlayıb. Bu maddəyə əsasən AİHM-in qərarlarını yerinə yetirmədiyinə görə Bakıya qarşı sanksiyalar tətbiq edilə bilər.

Rəsmi Bakı uzun müddət özünü elə apardı ki, guya Avropa məhkəməsinin qərarını tanımır, ancaq son günlər vəziyyət dəyişib.

Belə ki, ötən gün Azərbaycan prezidentinin xarici siyasət üzrə köməkçisi Novruz Məmmədov İ.Məmmədovun cəzasının üçdə iki hissəsini çəkdiyinə görə azadlığa buraxılmasına işarə edərək bu problemin həllinin mümkünlüyünü bildirib.

O əlavə edib ki, hakimiyyət məsələnin başqa həll yollarının axtarışı üzrə konstruktiv danışıqlara hazırdır.

Ancaq müdafiə tərəfi bildirib ki, İ.Məmmədov vaxtından əvvəl azadlığa buraxılmaq üçün müraciət etməyəcək.

Hüquqşünas Ələsgər Məmmədli problemin həllinin mümkünlüyünü Turan-a şərh edərkən bir neçə variant göstərib.

Vaxtından əvvəl azadlığa buraxılma ilə yanaşı, əfv də ola bilər. Düzdür, İ.Məmmədov dəfələrlə bildirib ki əfv ərizəsi yazmayacaq. Ancaq qanun məhkumun xahişi olmadan da əfvi istisna etmir.

Digər variant isə Baş Prokurorluğun Ali Məhkəməyə təqdimatıdır

Dekabrın 1-dən qüvvəyə minən qanunvericiliyə dəyişikliklərə görə, ağır cinayət törədən və cəzasının böyük hissəsini çəkənlər şərti olaraq azadlığa buraxıla bilər.

Ali Məhkəmə İ.Məmmədovu vaxtından əvvəl şərti azadlığa buraxa bilər, ya da cəza müddətini azaldaraq həbsdən azad edə bilər.

Hüquq müdafiəçisi İnqitam Əliyevin azad edilməsi zamanı da oxşar hal baş vermişdi.

Nəhayət, Ali Məhkəmə AİHM-in qərarını yerinə yetirmək üçün İ.Məmmədovu bəraətverici əsaslarla azad edə bilər. Ancaq bu ssenari real görünmür.

Hüquq müdafiəçisi Rəsul Cəfərov hesab edir ki, azadlığa buraxılma ilə bağlı bəzi mexanizmlər var. Yuxarıda sadalananlar ilə yanaşı bu, koloniya rəhbərliyinin müraciəti və ya əfv ola bilər.

Bütün variantlarda (reabilitasiyadan başqa) İ.Məmmədov 2018-ci il prezident seçkilərində namizədliyini irəli sürə bilməyəcək. Düzdür, nəzəri baxımdan bu, mümkündür, əgər məhkumluğunun götürülməsi üçün məhkəməyə müraciət edərsə. Ancaq indiki siyasi reallıqda bu, mümkün deyil.06B--