İntiqam Əliyev 7,5 il müddətinə azadlıqdan məhrum edilib (YENİLƏNİB)

Aprelin 22-də axşam Bakı Ağır Cinayətlər Məhkəməsi hüquq müdafiəçisi İntiqam Əliyev barəsində hökm çıxarıb. O, qanunsuz sahibkarlıq, mənimsəmə, vergilərdən yayınma, vəzifə səlahiyyətlərindən sui-istifadə və vəzifə saxtakarlığında təqsirli bilinib və cəzasını ümumi rejimli cəzaçəkmə müəssisəsində çəkməklə 7,5 il müddətinə azadlıqdan məhrum edilib.

Bundan başqa, Əliyev azadlığa çıxdıqdan sonra 3 il ərzində dövlət və bələdiyyə idarələrində rəhbər vəzifələr tutmaq hüququndan məhrum edilir.

Müdafiə tərəfi hökmü qanunsuz və siyasi motivli hesab edir və ondan şikayət vermək niyyətindədir. -03B06-

2015 Aprel 22 (Çərşənbə) 17:17:32

Bu gün hüquq müdafiəçisi İntiqam Əliyevin işi üzrə prosesdə müttəhim son sözlə çıxış edib.

Əliyev cinayət işinin tamamilə saxtalaşdırıldığını və təqibinin siyasi motivli olduğunu bildirib.

O qeyd edib ki, dörd aya yaxın davam edən məhkəmə prosesi həbsimin hüquqi deyil, siyasi motivlərlə - vəkillik və ictimai fəaliyyətimlə bağlı olduğunu bir daha sübuta yetirib

Əliyev bildirib ki, siyasi işlər üzrə vəkil olub və 25 illik vəkillik fəaliyyəti dövründə yüzlərlə prosesdə çıxış edib.

O, Avropa İnsan Hüquqları Məhkəməsinə 200-dən çox şikayət göndərib, onlardan 40-ı uğurla nəticələnib.

14 iş 2005-ci il parlament seçkilərində namizədlərin hüquqlarının pozulması ilə bağlı olub, həmçinin, ifadə, birləşmək azadlıqlarının, ədalətli məhkəmə təhqiqatı, işgəncələrin qadağan edilməsi hüququnun pozulması ilə bağlı işlər olub.

AİHM-yə göndərilmiş şikayətlərin əksəriyyəti parlament seçkiləri zamanı yol verilən pozuntularla bağlı olub və onların 30-u üzrə kommunikasiya başlayıb. Məhz buna görə hökumət bu prosesi dayandırmağa çalışıb.

Hökümət birtərəfli bəyanatla üzərinə öhdəliklər götürməklə, bir sıra mühüm şikayətlərin Avropa

Məhkəməsinin baxdığı işlərin siyahısından çıxarılmasına nail olmuşdu. Sonradan hökümət həmin öhdəlikləri yerinə yetirməkdən imtina etdi. “Biz Avropa Şurası Nazirlər Komitəsinə hökumətin öz öhdəliklərini yerinə yetirmədiyi barədə məlumat verirdik”, deyə Əliyev bildirib.

“Bizim digər partnyorlarımızla birgə apardığımız uğurlu işin nəticəsi olaraq AŞNK 2014-cü ilin İyun ayındakı iclasında Azərbaycan Hökümətinin seçki işləri ilə bağlı Avropa Məhkəməsinin qərarlarının icrası üzrə təqdim etdiyi Fəaliyyət Planını qəbul etmədi və Hökümətə yeni Plan təqdim etmək üçün vaxt verdi. Bu fəaliyyətim Hökümətdə çox qıcıq doğururdu və bunun mənim və təşkilatımız üçün arzuolunmaz nəticələrə səbəb ola biləcəyi dəfələrlə diqqətimə çatdırılmışdı”, deyə Əliyev əlavə edib.

İntiqam Əliyevin ofisində axtarış zamanı prokurorluq AİHM-ə 200-dən çox şikayət üzrə materialları müsadirə edib. AİHM rəhbərinin müdaxiləsindən sonra işlərin bir hissəsi qaytarılıb. Lakin 2010-cu il parlament seçkilərində pozuntular və aparıcı QHT-lərin qeydiyyatından imtina ilə bağlı şikayətlər hələ də qaytarılmayıb.

Daha sonra Əliyev 2014-cü ilin iyununda AŞPA-da Azərbaycan prezidenti İlham Əliyevin çıxışı ərəfəsində keçirilmiş dinləmələrə diqqət çəkib.

Bu dinləmələrdə İntiqam Əliyev insan hüquqlarının pozulması, hökumətin vətəndaş cəmiyyətinə təzyiqi ilə bağlı ciddi problemlər haqqında danışıb. Sessiyadan dərhal sonra Azərbaycan vətəndaş cəmiyyətinə qarşı repressiyalar başlayıb.

Rəsul Cəfərov həbs edilib, QHT fəalı Gülnarə Axundova cinayət təqibindən qurtulmaq üçün ölkəni tərk edib. Emin Hüseynov İsveçrənin Bakıdakı səfirliyində gizlənmək məcburiyyətində qalıb.

““Bu gün Azərbaycanın uğurlu inkişafını heç də hər kəs qəbul etmir. Ölkə daxilində də milli satqınlar var ki, onlar xarici antiazərbaycan dairələrinə öz vicdanlarını satıblar. Biz bunu bilirik. Mən bir prezident kimi gündəlik fəaliyyətimdə bu satqınlara qarşı mübarizə aparıram” – hakimiyyətin İlham Əliyevin Beyləqanda gənclər qarşısında çıxış edərkən ifadə etdiyi siyasəti budur, deyə müttəhim bildirib.

Administrasiya rəhbəri Ramiz Mehdiyev isə “Vestnik Kafkaza”ya müsahibəsində xarici qrantlarla anti-Azərbaycan kampaniyası təşkil edən bir sıra QHT-lərin adını çəkib. Onlar arasında Leyla Yunusun, Emin Hüseynovun, Anar Məmmədlinin və İntiqam Əliyevin QHT-ləri də var idi.

“Qərb, Avropa Azərbaycanın düşmənidirsə, niyə ölkəmiz Avropa Şurasının, ATƏT-in və digər beynəlxalq qurumların və konvensiyaların üzvü olaraq qalır; niyə dövlət büdcəsindən külli miqdarda vəsaitlər Avropada muzeylərin, tarixi abidələrin bərpasına və qeyri-tarixi abidələrin tikintisinə, Avropa “bayrağı” altında bahalı mahnı müsabiqələrinin, idman oyunlarının, müxtəlif çempionatların təşkilinə sərf olunur; niyə Avropaya neft və qaz satırıq; niyə valyuta ehtiyatlarımızın əhəmiyyətli hissəsini Avropanın

banklarında saxlayırıq?!”, deyə İntiqam Əliyev sual edib.

“Bu necə olur ki, Avropa, Qərb Azərbaycanda keçirilən saxta seçkiləri dəstəkləyəndə dostumuz, əzizimiz olur, insan haqları, demokratiya sahəsində öhdəliklərini Azərbaycan hakimiyyətinə xatırladanda, siyasi motivli həbslərə, vətəndaş cəmiyyətinə basqılara hətta yumşaq şəkildə (qətnamə və bəyanatlardan uzağa getməyən) reaksiya verəndə pis?!”, deyə o, sözünə davam edib.

“İndi əminliklə demək olar ki, ölkədə müstəqil vətəndaş cəmiyyəti yoxdur, o, məhv edilib, hər an həbs olunmaq təhlükəsi ilə üz-üzə qalaraq mübarizəni davam etdirən dissidentlər var”, deyə Əliyev qeyd edib.

“Həbslər bizim azadlığımızı əlimizdən ala bilər, azadlıq istəyimizi yox. Azad insan hər yerdə azaddır”, deyə İntiqam Əliyev bildirib.

Tofiq Yaqublu, İlqar Məmmədov, Yadigar Sadiqli, Xədicə İsmayılova azadlıqda olanda söylədiklərini, yazdıqlarını həbsxanada da söyləyirlər və yazırlar.

Mövsüm Səmədoğlunun, Abgül Süleymanovun, Taleh Bağırzadənin, Nemət Pənahlının haqq səslərini hətta Qobustanın Qapalı Təcridxanasının dəmir qapıları kəsə bilməz.

Hakimlərə və prokurora üz tutan İntiqam Əliyev deyib: “Belə hallarda adətən “başınıza gəlsin” deyirlər, amma mən sizə başqa bir şey deyəcəyəm: sizə insanların öz baxışlarına və əqidələrinə görə təqib olunmadığı ədalətli cəmiyyətdə yaşamağı arzu edirəm”.

Sonda Əliyev həmkarlarına, müstəqil mətbuata, beynəlxalq təşkilatlara, diplomatik korpusa dəstəyə görə təşəkkür edib və vəkillərinin cəsurluğunu vurğulayıb.

Bundan sonra məhkəmə hökmü elan etmək üçün müşavirəyə çəkilib. -06D-