Mətbuat Şurası haqda qanunun hazırlıqlarına başlanıb

Bakı/19.04.18/Turan: Mətbuat Şurası haqqında qanun layihəsi hazırlanacaq.

Bu haqda qərar Mətbuat Şurası İdarə Heyətinin yeni tərkibinin aprelin 18-də keçirilmiş ilk iclasında qəbul edilib.

Şuranın yeni tərkibdəki ilk iclasında şura sədri Əflatun Amaşovun müavinləri seçilib. İndiyədək olduğu kimi Beynəlxalq Avrasiya Mətbuat Fondunun rəhbəri Umud Mirzəyev və Jurnalistlərin Həmkarlar İttifaqının sədri Müşfiq Ələsgərli yenidən sədr müavini olublar.

Toplantıda şuranın komissiyalarının sədrləri və tərkibləri də təsdiqlənib.

Şuranın toplantısında müzakirə olunan diqqətçəkən mövzu Mətbuat Şurası haqqında qanun layihəsinin hazırlanması olub. Bununla bağlı işçi qrupun yaradılması məsələsinin müzakirə edildiyu, Milli Məclisin deputatı Çingiz Qənizadənin qrupa rəhbər seçildiyi bildirilir.

Mətbuat Şurasının fəaliyyətinin ayrıca qanunla tənzimlənməsi məsələsi indiyədək bir neçə dəfə gündəmə gətirilib. Ancaq bu istiqamətdə real addımlar atılmamışdı.

Qurumun mart ayında keçirilən qurultayında bir təklif yenidən gündəmə gətirilmişdi. Ardınca,

Mətbuat Şurasının sədri Əflatun Amaşov parlamentin yaz sessiyasının fevralın 1-də keçirilən ilk iclasındakı çıxışında Mətbuat Şurası haqda qanunun qəbulu məsələsini qaldırmışdı.

Əksər media ekspertləri ictimai qurum olan Mətbuat Şurasının fəaliyyətinin ayrıca qanunla tənzimlənməsinin, bu tip qurumların fəlsəfəsinə zidd olduğunu bildirirlər. Onlar deyirlər ki, əslində, şuralar ona görə yaradılır ki, medianın dövlət tərəfindən tənzimlənməsinə ehtiyac olmadığı nümayiş etdirilsin.

Ekspertlərə görə, qanunun qəbulu medianı dövlətin tənzimləməsinə gətirib çıxara bilər.

Mətbuat Şurası 2003-cü ilin martında, ölkə jurnalistlərinin birinci qurultayında 100-dən artıq informasiya vasitəsinin təsisçiliyi ilə yaradılıb. Həmin ilin aprelində Şura Ədliyyə Nazirliyində dövlət qeydiyyatına alınıb.

Mətbuat Şurasının məqsədinin jurnalistlərin öz peşə fəaliyyətlərində qanunvericiliyin tələblərinə, peşə prinsiplərinə əməl etməsinə ictimai nəzarətin həyata keçirilməsi olduğu bildirilir.

Dövlət orqanları, ictimaiyyətlə mətbuat arasında əlaqənin, etimadın möhkəmləndirilməsi, söz, fikir və məlumat azadlığına daha geniş imkanlar yaradılması da qurumun məqsədlərindəndir.

Şura həmçinin, media vasitələrinin fəaliyyət sahələrində baş verən münaqişələrin məhkəməyəqədər həlli variantlarının araşdırılmasına da məsul olduğunu bəyan edir.

Mətbuat Şurasının fəaliyyətinə yanaşma birmənalı deyil. Bir çox media ekspertləri, bəzi jurnalistlər qurumun fəaliyyətindən narazılıq edir. Onlar hesab edir ki, qurum fəaliyyətində öz nizamnaməsindən, missiyasından kənara çıxır.

Mətbuat Şurası 8 ildən artıqdır ki, "qara siyahı" hazırlayıb yayır. Həmin siyahıya, adətən, bərəsində şikayət olunan media quruluşlarının adları daxil edilir. Nəşriyyatlar həmin siyahıda adı olan qəzetlərin çapından imtina edir.

Bəzi ekspertlərin fikrincə, bu təşkilat söz azadlığının müdafiəsində yetərli fəaliyyət göstərə bilmir.