MİRZƏ SAKİT AZADLIĞA ÇIXDI

    Aprelin 9-u səhər tezdən satirik-şair, «Azadlıq» qəzetinin əməkdaşı Mirzə Sakit (Sakit Zahidov) azadlığa çıxıb. Bu barədə Turana Mirzə Sakitin qızı Zülfiyə Zahidova bildirib. Mirzə Sakitin martın 18-19-da Novruz bayramı ərəfəsində azadlığa çıxacağı gözlənilirdi. Lakin şairin saxlandığı cəzaçəkmə müəssisəsinin rəhbərliyi amnistiyanın növbəlilik prinsipi əsasında icra edildiyini bildirib. Buna etiraz olaraq, Mirzə Sakit amnistiyadan imtina haqqında ərizə yazıb. Martın 30-da satirikin vəkili İsaxan Aşurov ona baş çəkib. O, Mirzə Sakitin amnistiya aktını icra etmədiyinə görə müəssisə rəisini məhkəməyə vermək niyyətində olduğunu bildirib.
    Mirzə Sakit 23 iyun 2006-cı ildə narkotik saxlamaq ittihamı ilə həbs edilib.
    Şair özü və həmkarları ilk gündən onun satirik şerlərində hakimiyyəti tənqid etdiyinə görə həbs edildiyini bildiriblər.
    Mirzə Sakitin həbsindən sonra Reportyorların Azadlığı və Təhlükəsizliyi İnstitutunun direktoru Emin Hüseynovun rəhbərliyi ilə jurnalistlərin hüquqlarını Müdafiə İctimai Komitəsi yaradılıb. Komitə paralel araşdırmalar aparığ, nəticədə müəyyən edib ki, 10 qr. heroini şairin cibinə polis atıb.
    2006-cı il oktyabrın 4-də Ağır Cinayətlərə dair İşlər üzrə Məhkəmə Mirzə Sakitin 3 il müddətinə azadlıqdan məhrum edilməsi haqda qərar qəbul edib.
    Hakim Azər Orucov elan edib ki, Zahidov CM-in 234.1 (qanunsuz olaraq şəxsi istehlak normasını aşan həcmdə narkotik saxlama) maddəsi ilə təqsirli bilinib.
    Zahidovun vəkili Vüqar Xasayev məhkəmənin qərarını «ədalətsiz» və «sifarişli» adlandırıb. Məhkəmədə heç bir sübut təqdim olunmayıb, lakin hakim notarius rolunu oynayıb və sadəcə olaraq, dövlət ittihamçısının irəli sürdüyü ittihamı təsdiq edib. Hakim Zahidovun 5 övladı olduğunu və ilk dəfə işinin məhkəməyə düşdüyünü nəzərə almayıb.
    Məhkəmənin qərarı beynəlxalq jurnalist təşkilatlarının etirazına səbəb olub.
    Sonradan bir çox digər beynəlxalq təşkilatlar da Mirzə Sakitin həbsini pisləyiblər və onun azad olunmasını tələb ediblər. ATƏT-in KİV azadlığı üzrə nümayəndəsi Mikloş Haraşti, Aİ və AŞ-ın müxtəlif səviyyəli rəsmiləri bir neçə dəfə rəsmi Bakını satirik-şairi azad etməyə çağırıblar.
    Azadlıq qəzetinin rəhbərliyinə bir neçə dəfə qeyri-rəsmi olaraq kəskin tənqidi nəşrlərə son qoymazsa xoşagəlməzliklərlə üzləşəcəyi xəbərdarlığı edilmişdi.
    Belə də oldu. 2007-ci ilin noyabrında Mirzə Sakitin qardaşı, «Azadlıq» qəzetinin baş redaktoru Qənimət Zahidov həbs edildi. O, xuliqanlıq və sağlamlığa az ağır zərər vurmaq ittihamı ilə 4 il müddətinə azadlıqdan məhrum edilib.
    Lakin Zahidovun həmkarları və hüquq müdafiəçiləri əmindirlər ki, jurnalistə qarşı təxribat hazırlanıb və o, saxta ittihamla həbs edilib.