Moskvadan Paşinyana ilk siqnal

Moskva/01.08.18/Turan: Ermənistanda baş verən hadisələr ölkənin yeni rəhbərliyinin öz siyasi sələflərini təqib etməməsi barədə bəyanatları ilə ziddir. Bunu Rusiya XİN rəhbəri Sergey Lavrov bildirib, RİA-Novosti məlumat yayıb.

"Yerevanın müttəfiqi olan Rusiya hər zaman erməni dövlətinin sabitliyində maraqlı olub, odur ki, baş verənlər bizi narahat etməyə bilməz. Bu, həm də MDB məkanında Ermənistanın iştirak etdiyi təşkilatların normal işinin təminatı baxımından da vacibdir", - o bildirib.

"Son günlər bir neçə dəfə öz narahatlığımızı Ermənistan rəhbərliyinin diqqətinə çatdırmışıq. Vəziyyətin konstruktiv məcrada inkişaf edəcəyinə ümid edirik", - S.Lavrov vurğulayıb.

Onun sözlərinə görə, bu ilin mayında Ermənistanda siyasi böhranın baş verdiyi dönəmdə Moskvada "böyük razılıqla qeyd edirdilər ki, sonda bütün aparıcı partiyaların iştiakı ilə kompromis əsasında böhranın həlli yolu tapıldı". "Biz ümid edirdik ki, belə nəticəyə əsaslanaraq bütün siyasi qüvvələr, ilk növbədə Ermənistanın yeni rəhbərliyi, yeni hakimiyyət bundan sonra da birləşdirici yanaşmalar irəli sürəcək, milli barışı möhkəmləndirəcəklər", - S.Lavrov bildirib.

"Ancaq son günlərin hadisələri belə müsbət ovqatı pozur, öz sələflərini siyasi motivlərlə təqib etmək niyyətində olmaması ilə bağlı Ermənistanın yeni rəhbərliyinin bəyanatları ilə ziddiyyət təşkil edir", - S.Lavrov vurğulayıb.

RF XİN rəhbərinin narazılığını bu cür açıq formada ifadə etməsi Ermənistan hakimiyyəti üçün ciddi siqnaldır. Bundan sonra Paşinyan hökuməti deyə bilməz ki, Moskva ilə münasibətlərində heç bir problem yoxdur.

S.Lavrovun bəyanatı ondan xəbər verir ki, Moskva Ermənistandakı adamlarını asanlıqla təslim etməyəcək.

Xəbər verildiyi kimi, Ermmənisanın keçmiş prezidenti Robert Köçəryan 1-2 mart 2008-ci il hadisələri üzrə iş çərçivəsində hakimiyyətin ələ

keçirilməsi və dövlət quruluşunun dəyişdirilməsi ittihamı ilə həbs edilib.

Ermənistanın keçmiş müdafiə naziri Mikael Arutyunyan və KTMT baş katibi Yuri Xaçaturova qarşı Ermənistan CM-in 300.1-ci maddəsinin 1-ci bəndi (konstitusiya quruluşunu devirmək məqsəlilə bir qrup şəxslə qabaqcadan əlbir olmaq) ilə ittiham irəli sürülüb.

M. Arutyunyanın barəsində axtarış elan edilib.

Y. Xaçaturov 5 mln. dramın müqabilində zaminə buraxılıb.-02D-