Müdafiə naziri: Ermənistanın qeyri-konstruktiv mövqeyi nizamlanmaya maneədir

Bakı/30.07.18/Turan: "Ermənistanın qeyri-konstruktiv mövqeyi münaqişənin nizamlanması ilə bağlı danışıqlarda tərəqqinin əldə edilməsinə başlıca maneədir". Azərbaycanın müafiə naziri Zakir Həsənov bunu iyulun 30-da Azərbaycanda səfərdə olan Avropa İttifaqının (Aİ) Cənubi Qafqaz üzrə xüsusi nümayəndəsi Toivo Klaarın başçılıq etdiyi nümayəndə heyəti ilə görüşündə bildirib. Bu barədə Müdafiə Nazirliyinin iyulun 30-da yaydığı məlumatda deyilir.

Məlumata görə, T.Klaar da öz növbəsində Cənubi Qafqaz regionunda sabitliyin təmin olunması üçün münaqişənin tezliklə sülh yolu ilə həllinin vacibliyini qeyd edib: "Ermənistanın yeni baş naziri Nikol Paşinyanın hazırda yürütdüyü siyasətin münaqişənin sülh yolu ilə həllinə yönəldiyinə ümidvar am", deyə T. Klaar bildirib.

Diplomat həmçinin bildirib ki, Aİ bu istiqamətdə danışıqların davam etdirilməsinin tərəfdarı kimi çıxış edir.

Müdafiə naziri Ermənistanın yeni rəhbərliyinin Azərbaycanın əleyhinə yönəlmiş hərbi ritorikalı çıxışlarını, baş nazir və müdafiə nazirinin öz övladlarını Azərbaycanın işğal olunmuş ərazilərinə hərbi xidmətə göndərmələrini münaqişənin sülh yolu ilə həllində maraqlı olmamasının sübutu kimi dəyərləndirib.

Müdafiə naziri münaqişənin tezliklə həllini Ermənistanın beynəlxalq hüququn norma və prinsiplərinə əməl edərək, ordu bölmələrini Azrbaycan torpaqlarından dərhal və qeyd-şərtsiz çıxarmasında gördüyünü bildirib. -05D-