Müxalifət partiyaları Rusiya ordusunun Azərbaycana qayıtmasından narazıdır

Bakı/10.11.20/Turan: Noyabrın 10-da gecə Qarabağ probleminin sülh yolu ilə həllinə dair imzalanmış üçtərəfli saziş Azərbaycanda siyasi partiyalar və ekspertlər tərəfindən müxtəlif cür qiymətləndirilir.

Müsavat Partiyasının sədri Arif Hacılı Turan-la söhbətində Azərbaycan ictimaiyyəti və partiyalarla məsləhətləşmələrin olmadığını qeyd edib.Qarabağa dair mühüm razılaşmadan öncə bunun olması gərəkirdi. “Azərbaycanlılar saziş haqda gecə saat dörddə biliblər, bu, yolverilməzdir”, - o deyib.

Ə.Hacılı ölkə ərazisinə xarici qoşunların yeridilməsini istisna edən Azərbaycan Konstitusiyasının və ölkənin müstəqilliyi haqda Bəyannamənin hakimiyyət tərəfindən pozulduğunu qeyd edib. Sazişə əsasən Qarabağa Rusiyanın sülhməramlı hərbi kontingenti yeridiləcək.

Müsavat Partiyası  Türkiyə sülhməramlı qüvvələrinin iştirakı ilə bağlı İ.Əliyevin şifahi bəyanatına baxmayaraq, gecə imzalanan müqavilədə Türkiyə və onun Silahlı Qüvvələrinin adının çəkilməməsindən narazılığını bildirib.

Arif Hacılı bu sazişin həyata keçiriləcəyinə şübhə ilə yanaşır, çünki Ermənistandan da Azərbaycanla sazişin şərtləri ilə bağlı siyasi qüvvələrin narazılığı barədə xəbərlər gəlir.

Ümid  Partiyasının sədri İqbal Ağazadə gecə sazişini Azərbaycanın qələbəsi adlandırmaqda çətinlik çəkib, çünki sənəd problemi 1988-ci il səviyyəsinə qaytarır. O zaman Qarabağı Moskvanın rəhbərlik etdiyi sovet komitəsi idarə edib.  O, sülh sazişini “yarımçıq” adlandırıb və Türkiyə hərbi kontingentinin nizamlanmada iştirakının aydın izahının olmamasına diqqəti çəkib.

Türklərin sülh prosesində iştirakı ilə bağlı dəqiq təsəvvürlər Qarabağda monitorinq qrupuna dair xüsusi Rusiya-Türkiyə sənədi imzalandıqdan sonra məlum olacaq.

Ümumilikdə İ.Ağazadə Rusiya ordusunun Qarabağa istənilən növ və əsasla qayıtmasının prinsipial olaraq əleyhinədir, - Ümid Partiyasının lideri Turan-a müsahibəsində bildirib.

Parlamentin deputatı və hakim Yeni Azərbaycan Partiyasının Siyasi Şurasının üzvü Aydın Mirzəzadə Turan-la söhbətində Ermənistanla sazişi “tarixi qələbə” adlandırıb. Belə ki, əsasən Azərbaycanın ərazi bütövlüyü bərpa olunacaq.

Azərbaycan Ordusu işğal olunmuş torpaqların bir hissəsini geri qaytardı, qalan hissəsi isə Ermənistan qoşunlarının çıxması ilə geri qaytarılacaq. Partiya bunu iki prezidentin- Heydər Əliyevin və İlham Əliyevin xidməti hesab edir.

Yeni Azərbaycan Partiyası Rusiya Silahlı Qüvvələrinin Azərbaycana qayıtmasını imzalanmış sazişdə nöqsan  hesab etmir, çünki Rusiya ordusunun Qarabağdakı bölmələrinin sayı və niyyəti razılaşdırılıb. O qeyd edib ki, sənədə əsasən, Rusiya Federasiyasının sülhməramlı qüvvələri beş il müddətinə yerləşdirilir.

Mirzəzadə qaçqınların ermənilər tərəfindən qovulduqları doğma torpaqlarına qayıtması üçün açılan imkanlara diqqəti yetirib.

“Real Partiyasında əldə edilmiş sazişin əhəmiyyəti barədə geniş bəyanat hazırlanır”, - Natiq Cəfərli Facebook-da bildirib. O, bəyanatın vacib yerlərini qeyd edib: 40 gün ərzində Azərbaycan qalib gəldi, Ermənistan məğlub oldu, bütün bunlardan isə 200 il ərzində olduğu kimi Rusiya fayda qazandı.

Azərbaycan Xalq Cəbhəsi Partiyasında da geniş bəyanat hazırlanır. Partiyanın sədr müavini Seymur Həzi bəyanatın əsas müddəalarını Turan-a açıqlayıb: AXCP Azərbaycan ordusunu dəstəkləyib, onu müharibədə qalib sayır. Lakin uzun müddətdən sonra Rusiya ordusunun bölgəyə qayıtması partiyanı narahat edir. Partiya RF ordsunun ölkə ərazisində olmasını  Azərbaycanın müstəqilliyi üçün təhlükəli amil hesab edir.  

Qarabağ Azadlıq Təşkilatında imzalanan müqavilədə Azərbaycan üçün təhlükəli məqamların olduğunu görürlər. Təşkilatın sədri Akif Nağı hesab edir ki, ermənilər sülhdən istifadə edərək cəmləşə, rusiyalı sülhməramlıların müdafiəsi altında silah toplaya və separatizm şüarı altında yeni müharibəyə başlaya bilər. Azərbaycan ermənilərin sülh sazişinin şərtlərindən bu cür istifadə etməsinə yol verməməlidir, - o deyib. O hesab edir ki, Ermənistana yeni Rusiyapərəst hakimiyyət gələcək, imzalanmış sənədin təhlükəli tərəfi bundan ibarətdir.

Siyasi mühacir, analitik Rauf Mirqədirov 10 noyabr 2020-ci ili tariximizdə qara gün adlandırılıb. O hesab edir ki, İ.Əliyev Azərbaycanın tarixinə xilaskar kimi daxil olmayacaq, çünki Rusiyanı Azərbaycana qaytarır.

“Siyasət mümkünlük sənətidir, bu gün biz maksimum mümkün olanı aldıq. Amma hələ münaqişənin sonu deyil və biz Azərbaycanın ölkənin bütün ərazisi üzərində tam suverenliyinin bərpası uğrunda mübarizəni davam etdirəcəyik”, - keçmiş xarici işlər naziri Tofiq Zülfüqarov sosial şəbəkədə yazıb.—0—