Qaxariya: Azərbaycan və Gürcüstan arasında həll edilməmiş problem yoxdur. Amma Gürcüstan patriarxı belə düşünmür

Bakı/09.10.19/Turan: "Baş nazir vəzifəsində ilk səfərimin Azərbaycana olması təsadüfi deyil, biz əminik ki, bu səfərlə dostlarımıza da, düşmənlərimizə də Azərbaycan və Gürcüstan arasında qardaşca, dostca həllini tapmamış problemlərin olmadığını bir daha sübut edəcəyik", bu barədə Gürcüstan baş naziri Georgi Qaxariya oktyabrın 9-da Azərbaycan prezidenti İlham Əliyevlə görüşündə bildirib.

Gürcüstan baş nazirinin rəsmi səfəri İlham Əliyevlə təkbətək görüşlə başlayıb.

Gürcüstan tərəfin məlumatına görə, tərəflərin diqqəti iki ölkə arasında strateji tərəfdaşlığın əsas istiqamətləri və regional əhəmiyyətli birgə layihələr üzərində cəmləşib. "Azərbaycan və Gürcüstan yaxın dost və tərəfdaşdır. Bizim tərəfdaşlığımız həqiqətən də regional çərçivələri aşıb və beynəlxalq səviyyəli mövzuya çevrilib, xüsusən, iqtisadi mənada, enerji daşıyıcıları, nəqliyyat və ticarət sahələrində. Gürcüstan və Azərbaycan beynəlxalq formatlarda bir-birini qətiyyətlə dəstəkləyir. Əlbəttə, bu, vacibdir və mən Gürcüstanın ərazi bütövlüyünə dəstəyə görə təşəkkür edirəm", deyə baş nazir bildirib.

Cavab sözündə İlham Əliyev bildirib ki, baş nazir qismində ilk səfərin Azərbaycana olması Gürcüstan və Azərbaycanın yaxın dost və tərəfdaş olduğunu göstərir. "Bizim üçün Gürcüstan yaxın dost, qonşu və tərəfdaşdır. Bizi tarix, coğrafiya birləşdirir və bu, münasibətlərimizin inkişafı üçün mühüm amillərdir.

Biz bir-birimizin ərazi bütövlüyünü dəstəkləyirik və beynəlxalq təşkilatlar çərçivəsində uğurla əməkdaşlıq edirik. Azərbaycan Gürcüstanın ən böyük investorlarından biridir. Neft, qaz və nəqliyyat sahəsində əməkdaşlığımız beynəlxalq səviyyəyə çıxıb", deyə Əliyev bildirib.

Qeyd edək ki, Qaxariyanın Bakıya səfəri ərəfəsində Gürcüstanın katalikos-patriarxı İkinci İliya ona David Qareci monastırı ilə bağlı məktub göndərib.

Məktubda iddia edilir ki, Gürcüstan və Azərbaycan arasında 1938-ci ilin martında və 1996-cı ilin iyununda saziş imzalanıb, ona əsasən, dövlət sərhədi 1936-1939-cu illərdə Daxili İşlər Xalq Komissarlığı tərəfindən dərc edilmiş 1:200 000 miqyasındakı xəritəyə uyğunlaşdırılmalıdır.

"Bu xəritəyə əsasən, Udabno və Çiçxituri monastırları Gürcüstan ərazisində göstərilib (Qarecinin ayrılmaz hissəsi olan, amma Azərbaycan ərazisinə düşən Bertubanidən fərqli olaraq).
Azərbaycan tərəfin 2019-cu ildən bizi faktiki olaraq Udabno və Çiçxituri monastırlarından məhrum edən və ibadət edənlərin, turistlərin, habelə dindarların onlara çıxışını tamamilə məhdudlaşdıran əməllərini qətiyyən anlamırıq. Belə çıxır ki, indiyə qədər mövcud olan reallıq bu il heç bir məntiqi olmadan dəyişdirilib, biz bununla barışa bilmirik. Delimitasiya və demarkasiya prosesi yekunlaşana qədər əvvəllər mövcud olan status-kvonun bərpa edilməsini və dindarlar və bizim mədəniyyətimizlə tanış olmaq üçün gələn turistlər üçün Udabno və Çiçxituri monastırlarını ziyarət etmək istəyi ilə əlaqədar problem yaradılmamasını tələb edirik, özü də belə bir ərazidə faktiki vəziyyətin saxlanması mütləq xarakter daşıyır, digər dövlətin razılığı olmadan, xüsusən zorakı addımlarla vəziyyətin dəyişdirilməsi isə tamamilə qəbuledilməzdir", deyə məktubda bildirilir.

Gürcüstan patriarxı Qafqaz Müsəlmanları İdarəsinin rəhbəri şeyx Paşazadəyə də buna bənzər məktub göndərib. -02D-