Rusiya eksperti prezidentlərin Peterburq görüşünün uğuruna inanmır

Peterburqdan sonra Qarabağ münaqişəsində ciddi irəliləyiş olacağı barədə ümidlər əvvəlcədən lazımınca əsaslandırılmamışdı. Bu fikri Armİnfo-ya müsahibəsində Rusiya analitiki Sergey Markedonov Ermənistan, Rusiya və Azərbaycan prezidentlərinin Peterburq görüşünün yekunlarını şərh edərkən bildirib.

Danışıqlarda İlham Əliyev status-kvonun aradan qaldırılması zərurətini qeyd edərək, bunu yalnız “Azərbaycan ərazilərinin işğaldan azad edilməsi ilə” etməyin mümkün olduğundan əminlik ifadə edib. Serj Sarkisyan Yerevanın münaqişənin sülh yolu ilə həllinə sadiqliyini növbəti dəfə elan etməklə kifayətlənib, “təəssüf ki, bir tərəfin istəyi ilə bu cür münaqişələrin həll olunmamasından” şikayətlənib. Prezidentlər növbəti dəfə bu formatda görüşləri müntəzəm olaraq keçirməyə hazır olduqlarını dilə gətiriblər, habelə təmas xəttində ATƏT müşahidəçilərinin sayının artırılması ilə razılaşıblar.

“Qarabağda “dördgünlük müharibə” cəmi iki ay əvvəl baş verib. Döyüş əməliyyatları genişmiqyaslı müharibəyə çevrilməsə də, onlar müddətsiz atəşkəs sazişinin qüvvəyə mindiyi andan etibarən 22 il ərzində ən genişmiqyaslı əməliyyatlar oldu, bu gün Yerevan və Bakı diplomatik formatda da kompromislərə və güzəştlərə sadiqlik nümayiş etdirmirlər”, deyə o qeyd edib.

Markedonov bildirib ki, Bakıda aprel müharibəsinə uğur kimi baxırlar, Qarabağ ərazisinin cüzi hissəsinin alınması isə hakimiyyət tərəfindən status-kvonun davam edəcəyi təqdirdə gələcəyə hazırlıq kimi qələmə verilir. Bu fonda analitik Azərbaycanın münaqişə zonasına bitişik əraziləri də daxil olmaqla, iyunun 19-dan 24-nə qədər ölkənin keçirdiyi hərbi təlimləri təsadüfi hesab etmir.

Bakı danışıqlardan imtina edərsə və güc variantına keçərsə, o, bunu riskli hesab edir, belə ki, böyük oyunçuların dəstəyinə ümid etmək çətin olacaq. “Bəli, nizamlanmada irəliləyiş yoxdur. Həll yerinə dondurulma var. Amma bu narahat regionda sülh üçün əsas ola biləcək düstur təklifinin olmaması da doğrudur. Təəssüf ki, “Madrid prinsipləri”ndən başqa həm RF, həm də Qərb tərəfindən dəstəklənən heç nə irəli sürülməyib”, deyə analitik fikrini tamamlayıb. -02D-