SƏYYARƏ HEYDƏROVA 1 İL MÜDDƏTİNƏ ŞƏRTİ HƏBS CƏZASI ALIB

    Çərşənbə günü Suraxanı rayon məhkəməsində Nurəddin Mustafayevin sədrliyi ilə ikinci qrup əlil Səyyarə Heydərova barəsində hökm oxunub. O, 3 il müddətinə azadlıqdan məhrumetmə cəzasına məhkum edilib. Lakin ilkin istintaq zamanı o, 4 ay 15 gün həbsdə keçirib. Buna görə cəza müddəti qısaldılıb. Heydərovanın 2-ci qrup əlil olması və himayəsində yaşlı anası olduğu nəzərə alınaraq, hakim CM-in 1 il sınaq müddəti ilə şərti cəza haqqında 70-ci maddəsini tətbiq edib. Bu o deməkdir ki, əgər 1 il ərzində Heydərova başqa cinayət və ya hüquqazidd əməl törətməsə, cəzasının qalan hissəsindən azad ediləcək. 1 il ərzində Heydərovanın müvafiq orqanları xəbərdar etmədən yaşadığı yeri dəyişmək hüququ yoxdur. Beləliklə, məhkəmə Heydərovanı 4 kişini döyməkdə təqsirli bilib. Onlardan biri polis kapitanıdır. Qeyd edək ki, Heydərova özü artıq iki həftədir ki, hüquqlarının pozulmasına etiraz əlaməti olaraq aclıq aksiyası keçirir. Dünən onu məcburi olaraq polisin nəzarəti ilə təcili tibbi yardım maşınında məhkəməyə aparıblar. Məhkəmənin qərarını şərh edən vəkil Məmməd Dadaşlı bildirib ki, nə ilkin istintaq, nə məhkəmə təhqiqatı Heydərovanın təqsirini sübuta yetirməyib. Məhkəmə qərəzli olub və Heydərovaya bəraət verilməsi məqsədilə apellyasiya şikayəti veriləcək, deyə vəkil qeyd edib. Qeyd edək ki, dövlət ittihamçısı Heydərova üçün CM-in 221-ci (xuliqanlıq) maddəsi ilə 4 il yarım müddətinə azadlıqdan məhrumetmə cəzası istəyib. * Heydərovanı 2006-cı ildə Əhmədli qəsəbəsində yaşadığı binanın həyətindəki ərazini qanunsuz olaraq zəbt etmiş inşaatçılarla münaqişəsindən sonra təqib etməyə başlayıblar. O, polis və inşaatçılarla münaqişəyə girərək, qanunsuz tikintiyə yol verməməyə çalışıb. 2006-cı ildə Apellyasiya Məhkəməsi bu işə baxıb və onun təkrar istintaqa göndərib. Bir müddət sonra iş bərpa edilib və gənc qadını həbs ediblər. Heydərova hüquqlarının pozulmasına etiraz əlaməti olaraq aclıq aksiyasına başlayıb. Nəticədə onu həbsdən azad ediblər, lakin iş bağlanmayıb.