TÜRK ORDUSUNUN BAKINI AZAD ETMƏSİNİN 92-ci İLDÖNÜMÜ

    Bu gün Bakının «Sentrokaspi diktaturası» eser-menşevik-daşnaq hökumətinin silahlı qüvvələrindən azad edilməsinin 92-ci ili tamam olur.
     15 sentyabr 1918-ci ildə Türkiyə İslam Qafqaz Korpusunun qüvvələri Bakını eser və menşevik və «Daşnaksütun» erməni milli partiyasının dəstələrindən azad ediblər. Sonuncular həmin ilin mart-aprel aylarında Sovnarkomun dəstələri ilə birlikdə Bakıda və Azərbaycanın bir sıra əyalətlərinin azərbaycanlı əhalisi arasında kütləvi qətllər və soyqırım törədiblər.
     Türk ordusunun gəlişi ilə azərbaycanlı əhalinin təhlükəsizliyi bərpa edilib. Bakının azad edilməsi 28 may 1918-ci ildə elan edilmiş Azərbaycan Xalq Cümhuriyyəti hökumətinə Gəncədən paytaxta köçməyə imkan verdi.
     Qaçılmaz məğlubiyyətlə üzləşən «Sentrokaspi diktaturası» hökuməti İranda olan Britaniya Ekspedisiya Korpusunun hissələrini Bakıya çağırdı. Lakin ingilislər kiçik dəstə göndərdilər, vəziyyətlə yaxından tanış olduqdan sonra bu dəstə Bakını tərk etdi.
     1918-ci ilin sentyabr hadisələri Azərbaycan tarixində əlamətdar tarixə çevrildi. 1991-ci ildə ölkənin müstəqilliyi bərpa edildikdən sonra Bakının dağlıq hissəsindəki Şəhidlər Xiyabanında 1918-ci ildə türk hərbiçilərinin dəfn edildiyi yerdə onların xatirəsinə abidə ucaldıldı.
     Hər il Azərbaycan ictimaiyyətinin və siyasi partiyaların nümayəndələri türk hərbiçiləri abidəsinin önünə gül qoyurlar. Son illərdə ölkənin türk ordusunun döyüşdüyü regionlarında da analoji abidələr ucaldılıb.