Yeni müxalifət alyansı yaranır

Azərbaycanı amansız avtoritar rejim idarə edir və onun dəyişdirilməsi üçün demokratik qüvvələr vahid ideya və vahid komanda ətrafında birləşməlidir. Bu gün Media Mərkəzdə ölkənin 15 siyasi partiyasının nümayəndələrinin iştirakı ilə keçirilən görüşdə səslənən əsas fikir bundan ibarət olub. Görüş iştirakçıları 2013-cü il prezident seçkiləri ərəfəsində demokratik atmosfer yaradılması, habelə seçki məcəlləsinə dəyişikliklər məsələlərini müzakirə ediblər.

“Aydınlar” partiyasının rəhbəri Qulamhüseyn Əlibəyli seçki qanunvericiliyinə islahatlarla bağlı təklifləri, o cümlədən parlamentə majoritar-proporsional seçki sisteminin bərpa edilməsi təklifini təqdim edib. Əsas ideya isə seçki komissiyalarının formalaşdırılması prinsipinin dəyişdirilməsidir. Xüsusən, bütün səviyyələrdə seçki komissiyalarının üzvlərinin seçkilərdə iştirak edən bütün siyasi partiyalar tərəfindən irəli sürülən namizədlər arasından püşk vasitəsilə seçilməsi təklif olunur.

Bundan başqa namizədlərin qeydiyyatı prosedurunu sadələşdirmək; namizədlərin qeydiyyatının ləğv edilməsi mümkünlüyünü istisna etmək; seçiciyə bir neçə namizədin xeyrinə səs verməyə icazə vermək; müşahidəçilərin təqdim etdiyi materialları qanuni dəlil kimi qəbul etmək; bütün namizədlərə seçkiqabağı təbliğat üçün bərabər imkanlar yaratmaq, elektron səsvermə sistemini təqib etmək və s. təklif edilib. Həmçinin, pozuntularla bağlı şikayətləri baxılması üçün püşkatma əsasında QHT nümayəndələrindən formalaşan müstəqil apellyasiya komissiyalarına təqdim etmək təklif olunur. 

Lakin Liberal Partiyanın İcra Komitəsinin sədri Əvəz Temirxan bu sistemin seçki komissiyalarının hakimiyyətin nəzarəti altında çıxacağına zəmanət vermədiyi haqqında fikir səsləndirib. Onun fikrincə, seçki komissiyaları son seçkilərdə 125 dairədən 61-dən çoxunda qeydiyyatdan keçmiş namizədləri olan partiyalar və ya partiya blokları tərəfindən formalaşdırılmalıdır. Apellyasiya komissiyalarının yaradılması ilə şikayətlərə baxılmasında obyektivliyə zəmanət vermir, belə ki, hakimiyyət nəzarəti altında olan çoxsaylı QHT-lərin bu qurumlarda daha çox təmsil olunmasını təmin edəcək.

Açıq Cəmiyyət Partiyasının sədri Sülhəddin Əkbərin fikrincə, ölkədə dəyişikliklərə yalnız demokratik qüvvələrin sıx birləşməsi və ciddi nizam-intizam sayəsində nail olmaq olar. “Bu gün Azərbaycanda korrupsiyaya uğramış, totalitarizm elementləri olan avtoritar rejim qurulub. Bu rejimə yalnız demokratik qüvvələrin birləşməsi alternativ ola bilər”, deyə Əkbər bildirib.

Alyansda qərarlar səs çoxluğu ilə qəbul edilməli və hamı üçün mütləq olmalıdır və bu qayda 2013-cü il prezident seçkiləri başa çatana qədər davam etməlidir.

İttifaqın əsas məqsədi seçkiqabağı demokratik atmosfer yaradılması və avtoritarizmdən demokratiyaya yumşaq keçid uğrunda mübarizə olmalıdır. İttifaq vahid siyasi komandaya, vahid seçki qərargahına, siyasi platformaya və islahatlar proqramına malik olmalıdır.

İttifaq yalnız dinc yolla “Azərbaycanın demokratikləşməsi, azad dünyaya inteqrasiya, qloballaşmaya fəal uyğunlaşma!” şüarı altında mübarizə aparmalıdır, deyə o bildirib.

Milli Birlik Partiyasının sədri Hacıbaba Əzimov demokratik qüvvələrin yeni formatının dəqiq məqsədləri olmalı olduğunu bildirib və saxta seçkilər və yüksək səviyyəli korrupsiya əsasında hakimiyyəti qəsb etməsi ilə əlaqədar prezident İlham Əliyevin istefa verməsi tələbi ətrafında birləşməyi təklif edib. O, həmçinin korrupsiya və insan hüquqlarının pozulması faktları ilə bağlı Əliyevə və digər yüksək vəzifəli məmurlara qarşı məhkəmə iddiaları qaldırmağı təklif edib.

Azad Azərbaycan Partiyasının sədri Həsən Həsənov hakimiyyətin başqa yolla, İlham Əliyevin üçüncü dəfə prezidentliyə namizədlik irəli sürməsinin konstitusiyaya zidd olduğunu elan edərək dəyişdirilməsi məsələsini qaldırmağı təklif edib.

“Böyük Azərbaycan” partiyasının sədri Elşad Musayev konstitusiya islahatlarının hazırlanması zərurətinə diqqət çəkib, belə ki, avtoritarizmi istisna edən siyasi və hüquqi sistemin dəyişdirilməsi zərurəti var.

AXCP Ali Məclisinin rəhbəri Həsən Kərimov bildirib ki, onun partiyası demokratik seçkilərin təmin edilməsinə yönələn bütün addımları dəstəkləyir.

Müzakirələrin yekunlarına görə, demokratik qüvvələrinin Məşvərət Məclisinin yaradılması ideyası təqdir edilib. Lakin qurumun təsis edilməsi haqqında yekun qərar partiyalarda müzakirələrdən sonra, tarixi hələlik müəyyən edilməyən növbəti görüşdə qəbul ediləcək.

Qeyd edək ki, görüşdə Dünyəvi partiyanın, “Aydınlar”, Açıq Cəmiyyət, Vətəndaş Həmrəyliyi, Liberal, Demokrat, “Ümid”, AXCP, Azad Azərbaycan partiyalarının, Vahid Azərbaycan Milli Birlik Partiyasının, Azadlıq, Liberal-Demokrat, İslam-Demokrat, Böyük Azərbaycan partiyalarının, Milli Müstəqillik Partiyasının, Klassik Xalq Cəbhəsi Partiyasının nümayəndələri iştirak ediblər.

İclasda bildirilib ki, Müsavat Partiyasına və İctimai Palataya da dəvət göndərilib. Lakin Müsavat Partiyasının sədr müavini Gülağa Aslanlı Turana bildirib ki, dəvət ona təqdim edilib, lakin o, texniki səbəblərdən iştirak edə bilməyəcəyi barədə xəbərdarlıq edib. -06C-