Ələsgər Məmmədlinin həbsxanadan Qurban Bayramı təbriki

Əziz həmvətənlər, dəyərli dostlar!

Hər birinizin Müqəddəs Qurban Bayramını səmimi qəlbdən təbrik edir, ölkəmizə, millətimizə və bütün müsəlmanlara xeyirli olmasını diləyirəm!

Təqvimlərdə olan bəzi günlər insanların öz-özü ilə hesablaşması üçün bir fürsətdir. Həmin hesablaşma günlərindən biri də Qurban Bayramıdır. Qurban Bayramında dini rituallar, əməllər başqalarına nümayiş etdirildiyi kimi daxili müsahibə də özünlə aparılmalıdır. Daxili müsahibəni başqasına göstərmək mümkün deyil, amma faydası həm özünə həm də özgələrə olur.   

Ölkəmizin bir fərdi olaraq, təəssüf ki, bayram əhval-ruhiyyəsində deyiləm. Bu üzüntüm yalnız Bayramları doğmalarımdan kənarda həbsxanada keçirdiyimə, sağlamlığımdakı problemlərə, ədalətsiz və qanunsuz aqibətlə üzləşməyimə görə deyil. 
Torpaqlarımızın işğaldan azad edilməsinin mutluluğunu doyunca yaşamaq haqqı olan xalqımızın məruz qaldığı çətinlikləri görmək çox cansıxıcıdır. Ölkəmizin minlərlə gəncəcik övladlarının təqsirsiz, şərlənərək həbslərdə çürüməsini seyr etmək çox ağırdır. Ölkə hüquq sistemi öz vətəndaşının ləyaqətini və təhlükəsizliyini qorumaq, şuluq vətəndaşlarını islah etmək əvəzinə sanki onların talelərini puç etmək yolu tutub. 

Toplumun məsuliyyətini üzərinə götürənlərin bir an öncə özü ilə daxili müsahibə etməsi zəruridir. Oturub etdiklərini qarşılarına qoyub, haqq-hesab çəkmələri, nədən bu qədər kindar, bu qədər öz toplumuna etimadsız olduqlarını düşünmələri və yolun sonuna varmadan dönüş etmələri lazımdır. Bu günlər daha da sərtləşməkdə olan idarəçiliyin fəsadları onların icraçılarına və gələcək nəsillərə sarsıdıcı təsirlər miras qoyacaq.

Bu bayram günü toplumun qaranlıqdan aydınlığa çıxmasında mayak rolunu üstənən özgüvənli dəyərli insanları, məsləyinin peşəkarı olan jurnalistləri, sivil toplum nümayəndələrini, ictimai-siyasi fəalları, vəkilləri, hüquq müdafiəçilərini, aydınları təbrik edirəm. Xüsusən də azadlığa buraxılmağıma çağırış edən, səhətimlə bağlı narahatlığını dilə gətirən minlərlə dəyərli insana təşəkkür edirəm. Dəstəyiniz mənəvi-psixoloji gücümüzü artırır. 

Bir daha hamınızı təbrik edirəm, özəlliklə də suçsuz həbsə atılmış bütün insanları, gənc jurnalistləri, siyasi və vicdan məhbuslarını bir an öncə azad etməyə çağırıram. Tezliklə ailələrinə, valideynlərinə, körpə övladlarına qovuşmasını diləyirəm. 
Sayğılarla, hüquqşünas, media eksperti Ələsgər Məmmədli.