Hakimiyyət Qarabağ problemi ilə əlaqədar cəmiyyətin qütbləşməsindən və radikallaşmasından qorxur

Bakı/29.05.19/Turan: Azərbaycan əhalisi Dağlıq Qarabağ münaqişəsinin nizamlanmasının gedişatı haqqında həddindən artıq az məlumatlıdır, bu, sülh prosesi yolunda kifayət qədər əhəmiyyətli maneədir. Mayın 29-da Azərbaycanın paytaxtında keçirilən "Bakıda və regionlarda Dağlıq Qarabağ münaqişəsinin həlli haqqında məlumatlılıq səviyyəsi" mövzusunda konfransın yekunlarından belə nəticə çıxır.

Konfransın təşkilatçısı, Humanitar Araşdırmalar Cəmiyyətinin sədri Əvəz Həsənov bildirib ki, "hakimiyyət Qarabağ prosesi haqqında müzakirələri inhisarlaşdırıb, bu mövzuya gizli qadağa qoyub. Bu, Qarabağ problemi haqqında çox kiçik marjinal, müzakirə olunan hadisələrə təsiri olmayan ekspertlər qrupunun fikir bildirməsinə gətirib çıxarıb. Baş verənlər mətbuatın məlumatsızlığına və əhalinin Dağlıq Qarabağ probleminə marağının azalmasına gətirib çıxarıb".

Münaqişə haqqında rəsmi məlumat yayılması strategiyası Azərbaycanın ictimai xadimlərini qane etmir. Onlar deyirlər ki, Qarabağ probleminin müzakirəsində cəmiyyətin qütbləşməsi və radikallaşması hakimiyyəti qorxudur, buna görə təkcə kütlələr arasında deyil, kiçik peşəkar dairələrdə belə açıq müzakirələr yoxdur. Əhaliyə yalnız protokol məlumatı verilir. Eyni zamanda Ermənistanda alternativ fikrin yolu açıqdır, deyə Həsənov əlavə edib.

O qeyd edib ki, 2016-cı il aprel müharibəsi günlərində Azərbaycan oxucuları hərbi əməliyyatlar barədə Azərbaycan saytlarının Ermənistan KİV-lərinin məlumatlarından gətirdikləri sitatlardan məlumat almaq məcburiyyətində qalıblar.

"Amma ATƏT səviyyəsində son bəyanatlar ictimai müzakirələrin və iki xalq - Azərbaycan və Ermənistan xalqı arasında sülh dialoqu imkanları mövzusunda alternativ fikrin alternativinin olmadığını göstərib", deyə Həsənov bildirib.

O, indi açıq elan edilən DQ problemi haqqında ictimai müzakirə imkanlarının naməlum səbəbdən 25 il ərzində qapalı olduğuna təəccübünü bildirir.

Həsənov qeyd edir ki, atəşkəsdən ötən illər ərzində Azərbaycanda dəfələrlə Qarabağ problemindən çıxış yollarının axtarışı üzrə açıq müzakirələr aparılıb. İlk müzakirə Milli Məclisdə eks-prezident Heydər Əliyevin rəhbərliyi altında keçirilib. Qarabağ nizamlanmasının prinsipləri haqqında yeganə sənədin - 600-dən çox ölkə xadimi tərəfindən imzalanmış "Qarabağ nizamlanması xartiyası"nın H.Əliyevin keçmiş köməkçisi Eldar Namazovun təşəbbüsü ilə 2004-cü ildə tərtib edildiyini, deyən Həsənov təəssüflə vurğulayıb ki, ATƏT-in Minsk Qrupunun həmsədrləri ölkənin bütün siyasi liderlərinin bir dəyirmi masa ətrafında görüşünü təşkil etməyib.

Ölkə rəhbərliyinin siyasətinin yekunu olaraq əhali Qarabağ münaqişəsi məsələsində məlumatsız və süstdür. Xalq estrada müğənnilərini politoloqlardan daha yaxşı tanıyır, - deyə Əvəz Həsənov qeyd edib.

Ondan sonra çıxış edən araşdırmaçı jurnalist Asəf Quliyev KİV-də Qarabağ problemi haqqında məzmunun 2018-ci ildə aparılmış təhlili haqqında məlumat verib. Dörd məşhur internet-nəşrin dərc etdiyi 1489 materialdan cəmi 66 (4,6 %) məqalə və məlumat eksklüziv idi. Qalanları başqalarının materiallarının surəti idi.

Jurnalistika sahəsində ekspert Seymur Kazımov hesab edir ki, əhalinin Qarabağ prosesi haqqında məlumatlılığının az olması problemi Azərbaycan jurnalistlərinin peşəkarlıq səviyyəsinin aşağı olmasından və Azərbaycanda KİV-lərin maliyyə müstəqilliyinin olmamasından irəli gəlir. Misal kimi o, Vyana hadisəsini göstərib, bu zaman Azərbaycan auditoriyası Azərbaycan və Ermənistan dövlət başçılarının görüşünün nəticələrini Ermənistan KİV-lərindən öyrənib. -0-