Tanınmış hüquqçular və vəkillər son həbslərlə bağli hüquq mühafizə orqanlarina müraciət etdilər

Ölkənin bir qrup tanınmış hüquqçu və vəkilləri hüquq-mühafizə orqanlarının rəhbərliyinə müraciət ediblər. Müraciətdə aşağıdakılar göstərilib:

“Ölkədə insan haqlarının kobud şəkildə pozulması davam edir. Dünən mediada və sosial şəbəkələrdə NİDA Gənclər Təşkilatının üç üzvü – Bəxtiyar Quliyev, Məhəmməd Əzizov və Şahin Novruzlunun, Gəncədə isə Müsavat Partiyasının fəalı Mahir Bayramlının yoxa çıxması barədə məlumat yayıldı.

Bu gün əldə etdiyimiz məlumata görə, Bəxtiyar Quliyev martın 7-də təxminən saat 20 radələrində şəhərin mərkəzində mülki geyimli şəxslər tərəfindən saxlanaraq Sabunçu rayonunda yaşadığı həyət evinə gətiriblər. Həmən zaman evdə olan valideynlərinin – atası Səməndər Quliyevin və anası Səadət Məmmədovanın bildirdiyinə görə evlərinə gələnlər mülki geyimdə 10-a yaxın şəxs olub, onlar Milli Təhlükəsizlik Nazirliyinin əməkdaşları olduqlarını və evdə axtarış aparmaq məqsədilə gəldiklərini bildiriblər. Həmin şəxslər özlərini təqdim etməyiblər və axtarışın səbəbi ilə bağlı hər hansı sənəd təqdim etməyiblər. Valideynlərinin söylədiyinə görə, mülki geyimlilər B.Abdullayevin mənzilində aparılan ilk axtarışdan sonra heç nə aşkar olunmasa da, növbəti cəhddə bükülü kağız aşkar edilib və onun narkotik olduğu bildirilib. Bundan sonra evin həyətində keçirilən axtarış nəticəsində çöl qapının yanında xeyli sayda benzin şüşələri olan qutu “aşkar edilib”. Tutulanların valideynləri mənzildə həmin şeyləri olmadığını və mülki geyimli şəxslərin gəlişindən sonra peyda olduqlarını bildirirlər. Həmin şəxslər özlərini təqdim etməyiblər, amma Milli Təhlükəsizlik Nazirliyinin əməkdaşları olduqlarını bildiriblər. Mülki geyimlilər gəncin şəxsi noutbooknu, İpadni və fotoaparatını da götürüblər.

Təşkilatın digər üzvü Şahin Novruzovun evində də oxşar ssenari ilə aparılan əməliyyat nəticəsində mənzildən axtarış da içi yanacaqla dolu şüşələrin və narkotikin aşkar olunması ilə nəticələnib. Martın 7-də saat 21.00 radələrində Şahin Novruzlunun yaşadığı mənzilinə gələn və özlərini MTN əməkdaşı kimi təqdim edən mülki geyimli şəxslər atasının israrlı tələbindən sonra Səbail rayon məhkəməsinin mənzildə axtarış barədə qərarını təqdim ediblər. Qərarda evdə narkotik maddənin olması barədə məlumat olduğu qeyd olunub. Axtarış zamanı mənzildə kağıza bükülü narkotik maddə, bir neçə şüşə qabda benzin “aşkar edilib”. Gəncin valideynləri mənzildə belə şeylərin olmadığını və onların mülki geyimli şəxslər tərəfindən axtarış zamanı qoyulduğunu bildirirlər.

NİDA Vətəndaş Hərəkatının  həbs edilən üçüncü üzvü Məhəmməd Əzizovun Nizami küçəsində dörkirayədə yaşadığı mənzildə mülki geyimlilər tərəfindən nəzarətə götürülüb.

Martın 7-də saat 21.30 radələrində Əzizov Məhəmməd Rasim oğlu Nizami küçəsində 4 nəfər mülki geyimli şəxs tərəfindən saxlanaraq maşına mindirilərək naməlum istiqamətə aparılıb. Onun “Memar Əcəmi” metrostansiyası yaxınlığında yerləşən kirayədə yaşadığı mənzilə aparıldığı və yuxarıda digər iki nəfərin evində olanların təkrarlandığı güman olunur.

Hazırda gənclərin harada saxlandığı bəlli deyil. Dünəndən bəri onların valideynlərinin, vəkillərin, vətəndaş cəmiyyəti qurumlarının gənclərin harada və nəyə görə saxlanması ilə bağlı məlumat əldə etmək cəhdləri uğursuzluqla nəticələnib. Hər üç gənc martın 10-da Bakıda keçiriləcək əsgər ölümlərinə etiraz toplantısı ilə bağlı fəallığı ilə seçilirdilər.

Dünən həmçinin Gəncədə daha bir gənc fəal Mahir Bayramov həbs edilib. O da Gəncədə əsgər ölümünə etirazla bağlı dinc toplantının keçirilməsinin təşəbbüskarlarındandır və sosial şəbəkələrdə xüsusi fəallığı ilə seçilirdi. Həyat yoldaşı Gülbəniz Bayramovanın verdiyi məlumata görə, dünən axşam saat 7-də Gəncə Polis İdarəsindən 2 nəfər onların evinə gələrək həyat yoldaşını aparıblar. Bundan sonra çoxsaylı cəhdlərinə baxmayaraq həyat yoldaşı ilə bağlı yerli hüquq-mühafizə orqanlarından dəqiq məlumat ala bilmirlər. Bu gün ona zəng edilərək bildirilib ki, həyat yoldaşı polisə müqavimətə görə 5 sutka inzibati həbs olunub.

Biz təəssüf hissi ilə bildiririk ki, həbslərin əsgər ölümlərinə etirazla bağlı təyin olunmuş etiraz toplantısından öncə həyata keçirilməsi, tutulanların yaşadıqları evlərdə həyata keçirilən axtarışın vəkilin iştirakı olmadan, kobud qanun pozuntuları ilə müşayiət olunması həbslərin siyasi xarakterli olduğuna şübhə yeri qoymur.

Biz narahatlıq hissi ilə bildiririk ki, son dövrlərdə ölkədə kütləvi tədbirlər ərəfəsində insanların polisə müqavimət, ictimai asayişin pozulması, üstündən narkotik tapılması və digər pozuntularla həbs olunması praktikasının geniş yayılıb. Əksər hallarda bu cür həbslər istirahət günləri öncə həyata keçirilir və hüquq-mühafizə orqanları iş günü olmaması əsası ilə hər hansı məlumat almaq mümkünsüz olur. Həmçinin Milli Təhlükəsizlik Nazirliyinin, Daxili İşlər Nazirliyinin və Baş Prokurorluğun nəzdindəki qaynar xətlər də bu cür işlərlə bağlı müraciətlərə hər hansı məlumat verməkdən imtina edirlər.

Qüvvədə olan qanunvericilik şəxsin tutulan andan özünün seçdiyi vəkilin xidmətlərindən istifadə etmək, tutulmasının səbəbləri, o cümlədən yaxınlarına tutulması və harada saxlanması ilə bağlı məlumat verilməsi hüququnu nəzərdə tutur. Amma bu hüquqlar uzun illərdir ki, hüquq-mühafizə orqanları tərəfindən kobud şəkildə pozulur. Tutulan şəxslər barədə məlumatlar yaxınlarından, vəkillərindən və ictimaiyyətdən uzun müddət gizli saxlanılır, tutulan şəxslərlə yanaşı onların vəkillərinin hüquqları kobud surətdə pozulur.

Biz ictimai fəallığın yatırılması, siyasi opponentlərin sıradan çıxarılması məqsədilə saxta ittihamlar əsasında həyata keçirilən həbslərə son qoyulmasını tələb edirik.

Biz gənclərin tutulmalarının səbəbləri, harada saxlanmaları, tutulmanı həyata keçirən mülki geyimli şəxslərin kimliyi, Milli Təhlükəsizlik Nazirliyinin əməkdaşlarının bu prosesdə iştirakını zəruri edən şərtlər barədə ictimaiyyətə ətraflı məlumat verilməsini tələb edirik.

İmzalar:

İntiqam Əliyev

Ənnağı Hacıbəyli

Vidadi Mirkamal

Əsabəli Mustafayev

Xalid Bağırov

Əlaif Həsənov

Erkin Qədirli

Fuad Ağayev

Samir İsayev

Akif Əlizadə

Namizəd Səfərov

Anar Qasımlı

Rəşid Hacılı

Əlövsət Əliyev

Yalçın İmanov

Qurban Məmmədov

Rəşid Hacılı

Cavad Cavadov

Hafiz Həsənov

Ələsgər Məmmədli