Rusiyanın birmənalı dəstəyi Azərbaycana ziyan vurur - Rəsul Cəfərov

Bakı/28.06.19/Turan: İyunun 26-da 116 parlamentari Rusiyanın AŞPA-ya qayıtmasının lehinə səs verib, 62 deputat bunun əleyhinə səs verib, 15 nümayəndə bitərəf qalıb. Beləliklə, Rusiya nümayəndə heyəti Avropa Şurası Parlament Assambleyasında işə qayıdıb.

Hüquq müdafiəçisi Rəsul Cəfərov Turan agentliyinə Rusiyanın AŞPA-ya qayıdışının nəticələrini şərh edib.

- Rusiyanın bu təşkilata qayıtmasının leyihə səs verən Azərbaycan nümayəndə heyətinin bu addımını necə qiymətləndirirsiniz?

- İlk baxışda Azərbaycan nümayəndə heyətinin səs verməsi siyasi cəhətdən doğru addım kimi görünür. Yəni bu, bizim bütün Avropa ölkələrinin AŞPA-da təmsil olunmasını istədiyimiz haqqında mesajdır, insanlar müharibə etməkdənsə, parlament binasında mübahisə etsinlər. Amma AŞPA-nın Rusiya ilə münaqişəsi Moskvanın Ukraynanın ərazi bütövlüyünü pozması ilə əlaqədar yaranıb. Məhz buna görə AŞPA RF nümayəndə heyətini səs hüququndan məhrum edib.

Azərbaycan dünya ictimaiyyətini ərazi bütövlüyünün və sərhədlərin toxunulmazlığının müqəddəsliyinə inandırmaqdan əl çəkmir. Amma Ukraynanın əleyhinə səs verən Azərbaycan özü bu prinsipi pozur, qeyri-ciddi tərəfdaş imici yaradır.

- Analoji vəziyyət yenidən sərhədlərinin pozulması ilə əlaqədar Rusiya ilə münaqişə edən Gürcüstana da aiddir. Azərbaycan bu münaqişəyə mövqe bildirməyib. Bizim susma siyasətimiz Ermənistana xal qazandırır?

- Rəsmi Bakının Gürcüstan-Rusiya münaqişəsinə münasibətində də eyni vəziyyətdir. Təəssüf ki, bizimlə eyni vəziyyətə düşmüş ölkələrlə həmrəyliyimiz çatışmır, baxmayaraq ki, biz öz maraqlarımıza uyğun real addım kimi həmrəylik nümayiş etdirə bilərdik.

- Müdafiə naziri Z.Həsənov bildirib ki, beynəlxalq şərait Qarabağın azadlığı uğrunda müharibəyə başlamağa imkan vermir. Prezident İ.Əliyev isə deyib ki, beynəlxalq hüquq ölüb. Azərbaycan bu reallıqda hər şeydə Ermənistanı dəstəkləməli deyil?

- Beynəlxalq hüquq tamamilə ölsəydi, Azərbaycan tamamilə işğal edilərdi və yəqin ki, neft və qaz layihələri həyata keçirə bilməzdi. Mənim üçün o arqument aydındır ki, Rusiya ilə ehtiyatlı olmaq lazımdır, amma milli maraqlarımızın müdafiəsi şərtilə.

- Sizcə, Ermənistanla müharibəyə başlamaq lazımdır, yoxsa beynəlxalq şəraitin bizim xeyrimizə dəyişməsini gözləmək?

- Müharibə etməzdən əvvəl ölkədə demokratik institutları bərpa etmək, korrupsiya və iqtisadiyyatda inhisarı aradan qaldırmaq lazımdır. Bu tədbirləri görmədən bizim müharibə aparmağımıza icazə verməyəcəklər.--0--