Azərbaycan neft hasilatının azadılmasını dəstəkləyib

Bakı/02.07.19/Turan: İyulun 1-də Vyanada "OPEC plus" Nazirlərinin Monitorinq Komitəsinin 15-ci iclasında Azərbaycanın Energetika naziri Pərviz Şahbazov neft hasilatının azadılması müddətinin uzadılması barədə təklifi dəstəkləyib.

Tədbirdə mövcud kvotaları dəyişmədən neft hasilatının azaldılmasına dair "Əməkdaşlıq bəyannaməsi"nin müddətinin daha 9 ay uzadılması təklif edilib. Bu təklif bu gün OPEC Nazirlər Şurasının 176-cı iclasında da müzakirə ediləcək. Sabah qərarın qəbulu gözlənilir.

P.Şahbazov öz çıxışında qeyd edib ki, hasilatın azaldılması üzrə öhdəliklərin yerinə yetirilməsi nəticəsində neftin qiymətinin kəskin enməsinin qarşısı alınıb. Lakin may ayının sonlarından başlayaraq qiymətin enmə tendensiyasını müşahidə edirik. Bu il qlobal neft tələbatının ötən illə müqayisədə 1 mln.140 min barel artması ilə bağlı proqnozlara rəğmən, bazarda həddindən artıq neft ehtiyatı var. İqtisadi Əməkdaşlıq və İnkişaf Təşkilatı (OECD) ölkələrində neft ehtiyatları artmaqda davam edir. Növbəti illərdə də qlobal neft tələbatının təklifi üstələyəcəyi gözlənilir. Ona görə də neft hasilatının məhdudlaşdırılması ilə bağlı razılaşmanın müddətinin uzadılmasına ehtiyac var, nazir deyib.

Xatırladaq ki, 2016-cı ililn fevralında OPEK neft hasilatını sutkada 280 min barelədək azaldıb. Bundan öncə Rusiya, Səudiyyə Ərəbistanı, Nigeriya, Qətər və Venesuela yanvarın 11-dən neftin hasilatının göstəriciyə uyğun olaraq dondurulmasına qərar vermişdilər.-0-