Dərin dövlət bir daha dövriyyədə

FETÖ-nun media ayağının ən qudurğan aktyoru, şübhəsiz ki,”Taraf” qəzeti idi.İkinci dönəmində “Türk ordusu ilə haqq-hesab çəkməyi” qabağına məqsəd qoyan iqtidar, Qərbin də təlqinlərini dinləyərək,”ordunun dərsini vermək üçün”  FETÖ ilə  hərtərəfli əməkdaşlığa girmişdi.”Taraf” qəzeti orduya qarşı sənədsiz-sübutsuz  təbliğatın əsas mərkəzi  halına  gətirilmiş, sistemin darmadağın edilməsinin “vintciyi və təkərciyi” vəzifəsi o qəzetə verilmşdi.Hökumətin  FETÖ ilə münasibətlərinin 17-25 dekabrdakı iki əməliyyat cəhdiylə pozulmasından sonra “Taraf” qəzeti oxlarını hökumətə qarşı çevirsə də artıq atmağa mərmisi qalmadığı kimi,cəmiyyətdəki etibarı da sıfırlanmış,tanınmış yazar Ahmet Altan qəzetin baş redaktorluğundan ayrılmışdı.Orduya qarşı media vasitəsiylə edilən hücumlara  hərarətli  dəstək verən başqa bir tanınmış jurnalist Nazlı Ilıcak və Ahmet Altanın professor qardaşı  Mehmet Altan isə FETÖ-nun təbliğat mərkəzinin taa mərkəzinə yerləşmişdilər.

15 iyul 2016-cı ildəki hərbi çevriliş  cəhdindən sonra adını çəkdiyim adamların üçü də həbs edildi.Səbəb-FETÖ-yə media vasitəsiylə dəstək vermək idi.Bir müddətdən sonra Mehmet Altan həbsdən çıxdı,Nazlı Ilıcak və Ahmet Altan isə təxminən 3.5 il yatandan sonra 10 gün qabaq həbsdən azad edildilər.Ancaq ictimai vicdan bu iki qələm sahibinin həbsdən azad edilməsini  qəbul etmədi.Etirazlar Ahmet Altanın yenidən həbsxanaya qayıtmasına səbəb oldu.

Buraya qədər hər şey bəsit təsvirdən ibarət idi.

İndi isə Nazlı Ilıcak və Ahmet Altanın həbsdən azad edilmələrinin altında yatan xarici və daxili səbəblərə baxaq.

Xarici səbəb bundan ibarət idi ki,Qərb Nazlı Ilıcakı və xüsusilə,Ahmet Altanı jurnalist-yazar hesab etməyə davam edirdi və onların həbsdən azad edilmələri üçün Ankaraya təzyiqlərin dozası xeyli artmışdı.Təzyiqi  zəiflətmək lazım idi və hökumət məhkəməyə  bu addımı atdırdı.Qərb bunu məmnuniyyətlə qarşılayarkən Türkiyə cəmiyyətindəki narazılıq da ən yüksək səviyyəyə çıxdı (Türkiyədəki jurnalistlik fəaliyyətim boyunca bir jurnalist-yazarın həbsdən azad edilməsinə bu qədər sərt reaksiya  göstərilməsini ilk dəfə gördüm)

Ilıcak və Ahmet Altanın həbsdən azad edilməsinin daxili səbəbinin daha dərin və  gizli kökləri vardır.Belə ki,bir müddət əvvəl prezident Erdoğan keçmiş məclis sədrlərinin daxil olduğu Yüksək Məşvərət Şurası yaratmış,  bir vaxtlar iqtidar ilə əməkdaşlıq edən təriqətlə  ən  yaxın münasibətləri heç kimdə şübhə doğurmayan Bülent Arınç da Şuraya  daxil edildi.Arınçın kürəkəninin FETÖ-yə ən yaxın adamlardan biri  olduğunu prokurorluq itttihamnaməsində  ətraflı şəkildə   yer almışdı.  Ilıcak və Altanın həbsdən azad edildiyi günlərdə məhkəmə kürəkənə də bəraət verdi,Bülent bəy isə FETÖ ünsürlərini dövlət orqanlarından təmizləməyə xidmət edən və prezidentə qeyri-məhdud səlahiyyət verən Qanun Hökmundəki Qərarları açıq şəkildə tənqid etdi.Prezident Erdoğanın müdaxiləsiylə sözlərini geri alan Arınçın bu mövqeyi insanda  belə  təəssürat yaratdı ki,iqtidar ilə keçmiş ortağı olan təriqət arasındakı anlaşma lap yaxındadır,bir vaxtlar dost,indi isə qanlı-bıçaqlı olan iki tərəf də çıxıb deyəcək ki,əslində biz də bir-birimizi səhv başa düşmüşük,ictimaiyyət də bizi düz anlamayıb.Hərbi çevriliş cəhdini  başqa qüvvələr(məsələn,Kamalistlər)  etmişdi,biz müsəlman qardaşları kimi yenidən ələlə verib yolumuza davam etməliyik.

İctimaiyyətdən gələn etirazlar olmasaydı da Türkiyə məhkəməsi Ahmet Altanı yenidən həbsxana divarları arxasına göndərəcəkdi,göndərməliydi.Yoxsa  dövlət idarəçiliyində yaranmış tarazlığın yenidən alt-üst olma təhlükəsi vardı.

Bu gedişatı görən dərin dövlət həm FETÖ-nün gizli təşəbbüslərini geri püskürtdü həm də  dövlət başçısının mövqeyini bir daha gücləndirdi.

Türkiyə Cümhuriyyəti isə növbəti dəfə siyasi islam-təriqət mühasirəsinə alınmaqdan xilas oldu.

Oldumu?

Dərin dövlət öz işini görməyə davam edir...