2 aprel hərbi əməliyyatlarının əsas yekunu vətənpərvərlik ruhunun artmasıdır

  Aprelin 12-də Müsavat Partiyasının himayəsilə “Qarabağ savaşının 2 aprel mərhələsi: Qazandıqlarımız və itirdiklərimiz” mövzusunda “dəyirmi masa” keçirilib.

Dinləmələr aprelin 2-4-də Qarabağ münaqişəsi zonasının təmas xəttində baş vermiş və düşmənə mənəvi zərbə vurmaqla bir neçə əsas yüksəkliyi alan Azərbaycan ordusunun bəzi uğurları ilə yadda qalan hərbi əməliyyatlara həsr olunub.

Çıxışçılar üçgünlük qarşıdurmanın əsas nəticəsi kimi vətənpərvərlik ruhunun artmasını və işğal edilmiş ərazilərin qaytarılmasına əminliyi göstəriblər.

Erməni ordusunun müdafiə sisteminin keçilməz olması barədə mif dağıdıldı, politoloq Elxan Mehdiyev bildirib.

Ancaq digər natiqlər kimi o da Silahlı Qüvvələr rəhbərliyinin hərbi uğurların inkişafından imtina etməsini başa düşmədiyini bildirib.

Hərbi analitik Üzeyir Cəfərov qeyd edib ki, Talış kəndini və digər yerləri azad edən milli ordunun bölmələri itkiyə baxmayaraq, böyük qəhrəmanlıq göstərməklə qarşıya qoyulan vəzifəni yerinə yetiriblər.

Beynəlxalq vasitəçilərin roluna toxunan çıxışçılar ümumilikdə Qarabağ nizamlanmasında və aprelin ilk günlərində Rusiyanın rolunu və mövqeyini mənfi qiymətləndiriblər.

“Rusiya münaqişədə maraqlı tərəf kimi çıxış edir, Ermənistanda rejimi silahla təmin edir və Azərbaycan ərazilərinin işğalını hər vəchlə dəstəkləyir”, - “Düşüncə” Analitik Mərkəzinin rəhbəri İsa Qəmbər bildirib.

Eyni zamanda Müsavat Partiyasının sədri Arif Hacılı bildirib ki, Azərbaycan xalqı üçün bu sınaq anı bir daha göstərdi ki, Türkiyə Azərbaycanın sadiq və ardıcıl müttəfiqi olaraq qalır.

Həmçinin qeyd olunub ki, hərbi balansın dəyişməsi ATƏT-in Minsk Qrupunu öz vasitəçilik səylərinə düşəliş etməyə sövq etməlidir. Belə ki, yaranmış reallıq göstərir ki, əgər erməni tərəfi konstruktiv danışıqlardan imtina etməsə Azərbaycan sözdə deyil, əməldə də öz ərazilərini hərbi yolla işğaldan azad etməyə hazırdır.

Lakin politoloq Toğrul Cuvarlı son hadisələrin yüksək qiymətləndirilməsindən ehtiyat edərək onları regiondakı daha geniş proseslərlə və böyük dövlətlərin maraqları ilə əlaqələndirib. “Biz gələcəkdə ölçülüb-biçilmiş qərarlar qəbul etmək üçün erməni tərəfi də daxil olmaqla, oyunçuların bütün hərəkətlərini izləməli və nəzərə almalıyıq”, - o vurğulayıb. 

Turan İnformasiya Agentliyinin direktoru Mehman Əliyevin fikrincə, Qarabağ münaqişəsinin nizamlanması prosesi sürətlənir ki, bu da Avrasiya məkanının cənub cinahında – Yaxın Şərq, Cənubi Qafqazda hərbi münaqişələrdə dönüşlə əlaqədardır. Dünya böyük iqtisadi partlayışın astanasındadır və regionun bütün əsas oyunçuları Qarabağ kimi münaqişələrin tezliklə həllində maraqlıdır.

Müzakirələrin yekunlarına əsasən “dəyirmi masa”nın qətnaməsi qəbul edilib. Sənəd vəziyyətin qiymətləndirilməsini və təklifləri, o cümlədən “Ərazi bütövlüyü uğrunda” ümummilli konsepsiyanın hazırlanmasını əhatə edir. —0—