Aİ Azərbaycanlı tələbələrə siyasətçi olmağın yollarını öyrədir

Bakı/11.02.18/Turan: Bakıda Avropa İttifaqı (Aİ) Modelinin son vaxtlar bir çox beynəlxaq tədbirlərin gündəliyindən çıxmayan miqrasiya probleminə həsr olunmuş Baş Assambleyası keçirilib. Görüş üçün Avropa siyasətçilərinin, parlamentarilərinin və nazirlərinin Brüsseldən Azərbaycan paytaxtına gəlməsinə ehtiyac olmayıb. Vebinarların təşkili üçün istifadə olunan skype-a da ehtiyac olmayıb.

Yüksək vəzifəli Qərb məmurları rolunda məskəklərinə yeni başlayan Azərbaycan hüquqşünasları, iqtisadçıları, idarəçiləri, diplomatları və hətta universitet tələbələri və məktəblilər uğurla çıxış ediblər. Təqlid olunan Baş Assambleya Avropa Gənclər Parlamentinin (AGP) Bakı ofisinin təşəbbüsü ilə keçirilən yeni layihənin yekun mərhələsi oldu. Layihənin ideyası Aİ-nin Azərbaycan nümayəndəliyinin dəstəyini aldı.

Bu təşəbbüsə maraq olduğunu Aİ-nin Azərbaycandakı səfiri və eyni zamanda bu təşkilatın nümayəndə heyətinin başçısı Kestutis Yankauskasın bazar günü səhər tezdən (səhər saat 5) Bakıya gəlməsinə baxmayaraq, layihə iştirakçıları ilə şəxsən görüşməyi, müasir dünya qurulmasında və ölkələrinin inkişafında gənclərin rolu haqqında danışmağı mühüm və mütləq hesab etməsi faktı göstərir. Buna görə təyin edilmiş vaxtda - saat 9.30-da diplomat Landmark otelinin Lahıc zalına daxil olaraq, qısa salamlama nitqi ilə çıxış edib. O, Aİ-nin yaradılması və inkişafı tarixi, onun strukturu, təşkilata üzv ölkələr arasında siyasi və iqtisadi sazişlər haqqında danışıb.

Qeyd etmək lazımdır ki, Avropa İttifaqı Modeli rol oyunu və rol oyunlarının aparıcı beynəlxalq təşkilatların işini təqlid edən formatını inkişaf etdirən tədris konfransıdır. Aİ Modeli oyununun prinsipi daha çox yayılmış və obyektiv səbəblərdən daha asan olan BMT Modelinə bənzəyir. İlk modelləşdirmə konfransları hələ 1970-ci illərdə, əsasən Latın Amerikası ölkələrində yaranıb. Rusiyada ilk cəhd MDBMİ bazasında olub. Sonradan estafeti digər ali məktəblər alıb. Eksperimentin nəticəsi orijinal bir oyun oldu, burada Aİ institutları ilə yanaşı, ictimai qurumların - kütləvi informasiya vasitələrinin, maraqlar qrupu nümayəndələrinin, transmilli şirkətlərin və ictimai birliklərin işi də modelləşdirilir.

Layihənin koordinatoru Milana İbrahimovanın Turan-a verdiyi məlumata görə, AGP dünyanın 40 ölkəsində, o cümlədən Gürcüstan, Rusiya, Ukraynada mövcud olan gənclər platformasıdır. Bizim ölkəmizdə o, 2011-ci ildən fəaliyyət göstərir. Onun tərəfdaşları dövlət təşkilatları və QHT-lərdir. Bu layihə bu yaxınlarda, daha doğrusu 2017-ci ilin dekabrında start götürüb, bir neçə mərhələdən ibarətdir. Əvvəlcə layihə iştirakçıları üçün treninqlər keçirilib, onlar Aİ-nin qurulması və inkişafı, inteqrasiya və genişlənmə prosesləri və s. haqqında ətraflı məlumatlandırılıb. Daha sonra layihə iştirakçılarını mövzu müəyyən ediblər və müzakirə ediblər, onların hər birinə Aİ və Avropa Parlamentindən yüksək vəzifəli məmur rolu ayrılıb. Sənədin bütün Aİ dövlətlərinin mövqeyini əks etdirən layihəsi hazırlanıb. Bu gün "Aİ Baş Assambleyasında" miqrantların Aİ hüdudlarında yerləşdirilməsi üzrə qətnamə qəbul edilməlidir. Hər bir Aİ VƏ AP "nümayəndəsi" "öz ölkəsinin" maraqlarından irəli gələrək miqrasiya böhranından çıxmağın yollarının səmərəliliyi haqqında öz fikrini bildirməlidir.

Bu arada, 35 azərbaycanlı gənc qız və oğlanın əyləşdiyi dəyirmi masada canlı debatlar olub. Səməd Mirzəyev Belçikanı, Səbiyə Əliyeva Finlandiyanı, Maqsud Həsənov Fransanı, Murad Abdullayev Fransanı təmsil edirdi. Tədbirin işçi dili, Aİ-də olduğu kimi, ingilis dili idi. Kimsə miqrasiya axınını İttifaq üzvü olan ölkələr arasında bərabər şəkildə paylaşdırmağı təklif edir, digəri ölkənin iqtisadi imkanlarına istinad edərək, bu variantın qəti əleyhinə çıxırdı. Həqiqətən, Almaniya və Fransanın büdcəsini və ərazisini Sloveniya və Çexiyanın resursları ilə müqayisə etmək olmaz.

Fasilələrdə Avropa siyasətçiləri, nazirləri rolunu ifa edən gənclər onların dünya görüşü, psixologiyası ilə mübahisələri, "öz ölkələrinin" maraqlarını müdafiə etməkdə davam edirdilər.

Bəs Aİ Modeli çərçivəsində bu cür rol oyunları, müzakirələr, mübahisələr gənclərə praktiki olaraq nə verir? Pərvin Paşazadə BDU-nun hüquq ixtisası üzrə bakalavr, "beynəlxalq münasibətlər" ixtisası üzrə magistratura pilləsini bitirib. O, layihə haqqında məlumatı İnternetdə oxuyub, onda iştirak etməyi qərara alıb. Onun sözlərinə görə, Aİ-nin təqlid olunan iclasları zamanı onlar Aİ iclaslarında bu və ya digər məsələlərin real müzakirəsi mühitinə düşüblər. Bu məşğələlər İttifaq qurumlarının fəaliyyət formalarını, onların vəzifələrini, qərar qəbul edərkən öz prinsiplərindən imtina etməməyin, bu və ya digər siyasi əməllərin məntiqini anlamağın yollarını göstərib.

Ceyran Cəfərova ADA Universitetinin "beynəlxalq münasibətlər" ixtisası üzrə tələbəsidir. Gələcək diplomatın fikrincə, bu layihədə iştirak ona çox şey öyrədib, ilk növbədə, o, siyasi danışıqlar və debatlar aparmaq, rəqibləri yola gətirmək, onları öz tərəfinə çəkmək, ölkəsinin maraqlarını müdafiə etmək bacarığı qazanıb.

Müzakirələrin sonunda Aİ Modeli Baş Assambleyasında miqrantlar üzrə qətnamə bəzi əlavə və dəyişikliklərlə qəbul edilib. -0-