Media-icmal 12.02.18

Dövlət başçısı İlham Əliyevin növbədənkənar prezident seçkilərində iştirakı ilə bağlı namizədliyinin əsaslandırılması, iqtidarın fəaliyyətinə baxış, özbaşına tikintilərin miqyasının artması bugünki (12 fevral, 2018-ci il) medianın aparıcı mövzularındandır...

Alternativsizlik məqamları

"Azərbaycan" qəzeti "Niyə məhz İlham Əliyev" sərlövhəli məqalədə bu il aprelin 11-nə təyin edilən növbədənkənar prezident seçkilərində indiki prezident İlham Əliyevin namizədliyinin irəli sürülməsini dəyərləndirir.

Müəllif xatırladır ki, iki aydan sonra Azərbaycanda Prezident seçkiləri keçiriləcək, 2016-cı il Konstitusiya islahatlarına əsasən yeni seçiləcək prezident 7 il dövlətə, xalqa ləyaqətli xidmət missiyasını yerinə yetirəcək və artıq müstəqillik dövrünün VIII Prezident seçkisinə hazırlıqlar başlayıb.

Fevralın 5-də Həmkarlar İttifaqları Konfederasiyası, fevralın 8-də isə "Yeni Azərbaycan" Partiyası təşkilatın sədri İlham Əliyevin prezidentliyə namizədliyini irəli sürüb: "Təbii ki, bu sosial sifariş təkcə adı çəkilən təşkilatların deyil, Azərbaycan xalqının mövqeyinin ifadəsi idi. Bu, İlham Əliyevin alternativsiz lider olduğunun təsdiqi idi. Çünki cənab İlham Əliyevin alternativsiz lider olması bir sıra əhəmiyyətli məqamlara söykənir".

Müəllifə görə, uzun illərdir mövcud olan ictimai-siyasi sabitlik, dövlətin nüfuzu, iqtisadi qüdrətinin yüksəlməsi, dünya siyasi arenasında söz sahibinə, Cənubi Qafqazda isə lider dövlətə çevrilməsi İlham Əliyevin müstəqil siyasətinin və gərgin əməyinin nəticəsidir.

Müəllif deyir ki, İ.Əliyevin rəhbərliyi ilə 2003-cü ildən ötən müddət ərzində həyata keçirilən islahatlar nəticəsində Azərbaycan dünyaya öz iqtisadi inkişaf modelini təqdim edib: "Hərtərəfli siyasi islahatlar ölkənin siyasi sisteminin təkmilləşməsini və müasir standartlara uyğunlaşmasını təmin edib. İnsan hüquq və azadlıqları, o cümlədən siyasi azadlıqlar, söz və mətbuat azadlığı tam təmin edilib".

Yazı müəllifi deyir ki, İ.Əliyevin rəhbərliyi ilə son 14 ildə modernləşmə ölkənin fərqləndirici xüsusiyyətinə dönüb, bu müddətdə ölkəyə 231 milyard dollar sərmayə qoyulub. Valyuta ehtiyatları 44 milyarda yüksəlib, infrastruktur, qazlaşdırma, içməli su layihələri icra edilib, ölkə iqtisadiyyatı 3,2 dəfə, qeyri-neft sektoru 2,8 dəfə, qeyri-neft ixracı 4,1 dəfə artıb.

Müəllif bu sırada vətəndaşların sosial təminatları ilə bağlı, beynəlxalq miqyaslı layihlələrin də icra olunduğunu bildirir və bunları birbaşa dövlət başçısının siyasətinin nəticəsi sayır.

Müəllif hesab edir ki, bu gün müstəqil Azərbaycan çoxəsrlik tarixində bütün sahələr üzrə ən yüksək inkişaf mərhələsindədir və bu inkişaf İlham Əliyevin fəaliyyətinin konkret əməli nəticəsidir və bundan da irəli gələrək müəllif deyir: "Əminliklə söyləyə bilərik ki, Azərbaycan xalqı aprelin 11-də İlham Əliyevə səs verməklə növbəti 7 il ərzində Azərbaycanın inkişafına, tərəqqisinə, sabitliyinə, əmin-amanlığına təminat verəcək".

Özünütərif taktikasının sonu?...

"Azadlıqinfo.az" saytında isə "Bu iqtidar ona səs verməməyi haqq edib" sərlövhəli məqalə diqqət cəlb edir.

Müəllif iddia edir ki, mövcud iqtidar ölkənin problemlərini gizlədir və ya miqyasını kiçildir, özünütərif kampaniyası aparır və nəticədə iqtidar olaraq mahiyyətini itirir: "Bu gün bu iqtidar özünütərif taktikasından o qədər istifadə edir ki, sanki ölkədə mövcud olan bütün çatışmazlıqlara cavabdeh özü yox, bir başqalarıdır. Hiss edirsən ki, idarəçilik dolayısı ilə bütün çatışmazlığı xalqın boynuna qoymaq niyyəti güdür. Bəs onda, bu idarəçilikdə hakimiyyətin işi nədən ibarətdir? Yuxulamaqdan və ya sadə insanları özündən fərqləndirməkdən?".

Müəllif iddialarını davam etdirərək deyir ki, ölkədə şəxsiyyət azadlığı, azad seçki hüququ, hüquq bərabərliyi yoxdur, ölkə vətəndaşlarının övladlarına bir qarın çörək pulu qazanmaq üçün Rusiyaya, Ukraynaya və s. ölkələrə əl açması danılmaz gerçəklikdir.

Müəllifə görə, bütün hüquqi problemləri həll etməli olan Konstitusiya gərəksizləşdirilib və bu gərəksizləşdirilmə ölkə üçün təhlükədir: "İqtidar Azərbaycan üçün təhlükəyə çevrilməkdədir,oğurlanmış Azərbaycan bu hakimiyyətin qarnındadır, siyasi komandanın beynəlxalq aləm barəsində düşüncəsi ölkədən keçən borulardır. Özünə qapanan iqtidar borulara abidə qoysa buna təəccüblənmərəm. Bu idarəçiliyə DUR!- deməyin yolu vətəndaşların 11 aprel seçkisində iştirak etməməyindən keçir".

Yazı müəllifi əlavə edir ki, mövcud iqtidar bunu haqq edib, çünki ölkədə vətəndaşlar sürünmək istəmirsə, ölkədən çıxıb getmək "azadlığı" verib.

Müəllif vurğulayır ki, indiki halda bu iqtidar xalqdan səs ala bilmək üçün 2018-ci il üçün yalanlarını danışır: "Guya, 11 apreldən sonra ölkə dönüb olacaq bir başqa məmləkət. Elə danışırlar ki, sanki nağıllardakı kimi hər sakinin qoltuğunda bir "sehirli süfrə" olacaq. 25 ildə nəyi bacardınız ki, bundan belə nə bacarasınız?"

Müəllif hesab edir ki, bu komanda səbatsızlıqdan əziyyət çəkən piyadalardır və elə ömür boyu piyada olaraq qalacaqlar da.

Yazı müəllifi xatırladır ki, bu ölkənin parlamentində üçqat,dördqat, beşqat, altıqat deputatlar var ki, hələ bir uğurlu təkliflərini belə eşidən olmayıb.

Müəllifə görə, bu şəxslərin deputat adına işləri-gücləri xarici ölkələrin qanunlarının üzünü köçürməkdir və parlamentdə otura-otura qanundan gizlənən əksər üzvlər cəmiyyətə nə verə bilərlər?

Müəllif deyir ki, parlament özünü icra hakimiyyətinin filialı kimi göstərməkdən heç çəkinmir və buna görə də təyin edilmişlər kimi görünənlərdən nə isə ummaq ən azı sadəlövhlükdür.

Prezident tapşırığına müqavimət

"Novoye Vremya" qəzetində isə "Özbaşına tikintilər problemi niyə həll edilmir?" sərlövhəli məqalə oxumaq olar.

"Özbaşına tikintilər problemi dövrü olaraq diqqət mərkəzinə gəlir. Bakının Bayıl yamacında baş verən sürüşmə isə bir daha yada saldı ki, ölkədə və ən əvvəl Bakıda bu problem həllini tapmayıb. Baxmayaraq ki, ölkə prezidenti bu barədə hələ xeyli əvvəl danışıb və hətta tapşırıqlar da verib". Müəllif özbaşına tikintilərlə bağlı paytaxtdakı durumu belə izah edir.

Müəllif xatırladır ki, 2011-ci ildə prezident Bakı Şəhər İcra Hakimiyyətində Bakı və Bakı ətrafı qəsəbələrin inkişafına dair müşavirədə əsas diqqəti sənədsiz tikintilərin rəsmiləşdirilməsinə yönəldib və dövlət baçısı neqativ hallara yol vermədən problemi həll etmək tapşırığı verib.

"Özbaşına tikintilər məsələsi meydana təsadüfən çıxmayıb. O zaman belə tkintilərin sayı 400 mindən çox olub, belə evlər adətən dəmir yolları zolaqları boyunca olan ərazilərdə, Dövlət Neft Şirkətinin ərazilərində və s. tikilib. İnsanları bu özbaşına tikilimiş evlərdən çıxarmaq çox hallarda toqquşmalarla müşaiyət edilib. Həm də aydın olub ki, problemi bu yolla həll etmək mümkün deyil, faktiki insanlar küçədə qalacaqlar". Bununla müəllif problemin yaranması və inkişafı prosesinə aydınlıq gətirir.

Müəllif bunu da vurğulayır ki, özbaşına tikintilərin bu həddə gəlib çatmasında ilk növbədə günahkar olan yerli orqanlar bunu həll etmək gücündə deyil və məsələ ilk növbədə qanunvericilik yolu ilə həllini tapmalıdır.

Məqalədə yada salınır ki, bu məsələ ilə bağlı sənəd 2011-ci ilin noyabrında Milli Məclisə təqdim edilib, amma məsələyə baxış nəticəsiz başa çatıb, indiyə kimi də şəhərin ortasında 100-lərlə sənədsiz ev mövcud olmaqda davam edir.

Müəllif diqqəti vətəndaşların evlərini rəsmiləşdirməmələri üzərinə cəmləyərək deyir ki, əgər vətəndaşlar hətta qanuni yolla getsələr belə, məmurlar onlardan sıravi vətəndaşın gücü çatmayan pul tələb edəcək: "Ona görə də təxmin etmək olar ki, indiki status-kvo bu məsələdə şəxsi maraqları olan dövlət orqanları rəhbələrini təmin edir. Belə ki, özbaşına tikintilərin sakinləri daim onların tilovundadır və onlardan daim pul qoparmaq olar".

Digər tərəfdən özbaşına tikintilərin sahiblərinin çoxu evlərinin tikintisi barədə icra hakimiyyətlərini və ya bələdiyyələri məlumatlandırıblar, çünki bu orqanlardan xəbərsiz nəinki ev, heç "quşxana" da tikmək olmaz.

Amma məsələ bununla bitmir, yeni-yeni özbaşına tikintilər meydana çıxır və yenə də buna görə heç bir məmur məsuliyyət daşımır.

Müəllifə görə, bu məsələyə müqavimət çox güclüdür, yoxsa ötən 7 il ərzində prezidentin tapşırığını yerinə yetirməməyə heç kəs cürət etməzdi...