Dövlətə xəyanətdə günahlandırılan hərbçilərin valideynləri aksiya keçiriblər

Bakı/12.04.19/Turan: Dövlətə xəyanətdə günahlandırılaraq həbs olunan və işgəncələrə məruz qalan hərbçilərin bir qrup valideyni aprelin 12-də Prezident Administrasiyası qarşısında aksiya keçirib. Aksiya iştirakçıları övladlarına irəli sürülən ittihamların məhkəmələrdə sübut olunmadığını bildiriblər. Onlar övladlarının istintaq dövründə işgəncə ilə öldürülməsinə düzgün hüquqi qiymətin verilməsini tələb ediblər.

"Biz istəyirik ki, prezident İlham Əliyev və ya birinci vitse-prezident Mehriban Əliyeva bizi qəbul etsin. Biz istəyirik ki, cavab versinlər ki, hansı səbəbdən bizim balalarımızın günahı olmadığı halda 18-20 illik həbsə atıblar", - əlində oğlunun fotosunu, kürəyində çoxsaylı qançır izlərinin görüntüsünü nümayiş etdirən ana bildirib. O, oğlunun istintaq zamanı döyüldüyünü iddia edir.

"Oğlumu istintaq zamanı o qədər döymüşdülər ki, komada qalmışdı. Sonra hərbi hospitala yerləşdirdilər. Bundan sonra azad buraxdılar. Daha sonra yenidən həbs etdilər. Oğlumun günahı varsa sübut etsinlər", - ana qeyd edib.

Digər valideyn deyib ki, onun övladının günahı olmadığı halda 16 il həbs veriblər.

"Oğlumu o qədər döyüblər ki, əsəb sistemi pozulub. Prezidentdən xahiş edirəm. Bu oğlanlar haqsız yerə həbs edilib. Günahkarlar azadlıqdadır, günahsızlar həbsdədir," - ana qeyd edib.

Altay Quliyev həbsdə olan Natiq Quluzadənin atasıdır.

"Mənim ailəm beş nəfərdən ibarətdir. Əgər istintaq oğlumun günahını sübut etsə, bütün ailə üzvlərimin cəzalandırılmasına razıyam," - o qeyd edib.

Valideynlər aprelin 11-də Ali Məhkəmənin kassasiya şikayətinə baxdığını və aşağı məhkəmənin hökmlərini qüvvədə saxladığını bildirib.

"Biz, valideynlər Ali Məhkəmədən öncə hərbi prokurorun qəbulunda olduq. Hərbi prokuror dedi ki, Ali Məhkəmə açıq olacaq və günahı olmayanlar barədə aşağı məhkəmənin qərarını dəyişəcək. Lakin aprelin 11-də Ali Məhkəmə qapalı keçirildi və heç nə dəyişmədi. Ali Məhkəmə 7 nəfərin barəsində yarım saat ərzində qərar qəbul etdi. Yarım saata 7 nəfər barədə qərar olarmı?" - valideyn sual edib.

2017-ci il mayın 7-də Azərbaycan Baş Prokurorluğu, Dövlət Təhlükəsizliyi Xidməti, Müdafiə və Daxili İşlər nazirliklərinin birgə yaydığı bəyanatda deyilir ki, Ermənistanın xüsusi xidmət orqanlarına casusluqda günahlandırılan bir qrup hərbçi və mülki şəxs tutulub.

Məlumatda vurğulanır ki, Ermənistan Silahlı Qüvvələrinin kəşfiyyat, xüsusi xidmət orqanları Azərbaycan ordusunun Tərtər rayonu istiqamətində yerləşən bölmələrinə və yaşayış məntəqələrinə qarşı genişmiqyaslı təxribat fəaliyyəti hazırlayıb.

Bu məqsədlə bir qrup hərbi qulluqçu və mülki şəxs Ermənistan kəşfiyyatçıları ilə məxfi əməkdaşlığa cəlb edilərək müxtəlif vaxtlarda öz maddi maraqları naminə hərbi sirr təşkil edən məlumatları əldə etməklə qarşı tərəfə ötürüblər.

2017-ci il mayın 3-də Azərbaycan Hərbi Prokurorluğunda Cinayət Məcəlləsinin 274-cü maddəsi (dövlətə xəyanət) ilə cinayət işi başlanıb. Prokurorluq, Müdafiə, Daxili İşlər nazirlikləri və Dövlət Təhlükəsizliyi Xidmətinin əməkdaşlarından ibarət birgə istintaq-əməliyyat qrupu yaradılıb.

"Aparılmış təxirəsalınmaz istintaq-əməliyyat tədbirləri nəticəsində Ermənistan tərəfinin Bakı şəhərində ictimai yerlərdə həyata keçirməyi planlaşdırdığı təxribat və terror fəaliyyətinin qarşısı alınıb. Məxfi əməkdaşlığa cəlb olunmuş bir qrup hərbi qulluqçu və mülki şəxslər cinayət məsuliyyətinə cəlb edilərək barələrində həbs qətimkan tədbiri seçilib", - bəyanatda bildirilir.

Hüquq müdafiəçisi Oqtay Gülalıyevin məhkəmə hökmlərinə istinadən hazırladığı hesabatda deyilir ki, məhkəmə hökmlərində "Tərtərdə yerləşən köhnə qərargah binasının 2-ci mərtəbəsində işgəncə cihazları ilə təmin edilmiş xüsusi otaqlarda azərbaycanlı əsgər və zabitlərə dövlətin adından və gücündən istifadə edərək bir qrup yüksək vəzifəli şəxsin necə xüsusi amansızlıq və qəddarlıqla işgəncə verərək onları öldürməsi açıq və təfsilatlı şəkildə qeyd olunur."

"Oxuduqca dəhşətə gəlirəm və sona qədər oxumaq olmur. Məhkəmənin hökmündə qeyd olunur ki, işgəncə verən vəzifəli şəxsin birinin rütbəsi ədliyyə mayorudur, N saylı hərbi hissənin rəhbərliyində təmsil olunur. Yüzlərlə əsgər və zabitə bir qrup vəzifəli şəxs tərəfindən gözləri və qolları bağlı şəkildə, paltarları soyundurulmuş halda verilmiş ağır işgəncələr nəticəsində azı 8 nəfər işgəncəyə dözməyərək vəfat edir. Sonradan onların 4-ü bəraət alır və işgəncə verən şəxslər həbs olunub," o bildirib.

O.Gülalıyev təəssüflə qeyd edib ki, məhkəmələr "ən azı 8 hərbi qulluqçunu xüsusi qəddarlıq və amansızlqla qətlə yetirən şəxslərə 6 il həbs cəzası verib, amma siyasi məhbus ailələrinə maliyyə dəstəyi göstərən Saleh Rüstəmova 7 il 3 ay, "əsgər ölümlərinə son" dediyi üçün İlkin Rüstəmzadəyə 8 il cəza verib."

"Budurmu ədalət? Ədalətsizlik, ayri-seçkilik və məkrli niyyət göz qabağındadır", - hüquq müdafiəçisi qeyd edib.

Hüquq müdafiəçisinin müraciətində deyilənlərlə bağlı Müdafiə Nazirliyindən və hüquq- mühafizə orqanlarından şərh almaq mümkün olmayıb.

Eyni zamanda son vaxtlar istintaq zamanı müəmmalı şəraitdə ölən və həbs edilən bəzi hərbçilərin qohumları rəsmi qurumlar qarşısında etiraz aksiyaları keçirir. Onlar övladlarından işgəncə altında ifadə alındığını və öldüyünü bildiriblər.

Bununla yanaşı, Azərbaycan rəsmiləri bir qayda ölkədə fundamental hüquqların tam təmin edildiyini, insanların qanun qarşısında bərabər olduğunu bəyan edirlər. Rəsmi Bakı qanunsuz həbslər, işgəncələr, istintaq zamanı insanların öldürülməsi ilə bağlı tənqidləri qəbul etmir və qərəzli sayır.-03B-