Hüquq pozuntusu faktları artıb � SMDT

Bakı/15.10.19/Turan: Seçkilərin Monitorinqi və Demokratiyanın Tədrisi Mərkəzi (SMDT) oktyabrın 14-də Azərbaycanda insan hüquqlarının durumuna dair alternativ və açıq mənbələrdən toplanmış məlumatlar əsasında 2019-cu ilin üçüncü rübünü əhatə edən xülasəni açıqlayıb.

Ölkədə 357 fakt əsasında ümumilikdə 474 insan hüquqları pozuntusu qeydə alınıb. Bu rəqəm əvvəlki rüblərlə müqayisədə daha yüksəkdir.

2019-cu ilin üçüncü rübü ərzində əvvəlki illərdə mülki və siyasi hüquq və azadlıqlara gətirilən məhdudiyyətlərin aradan qaldırılması yönündə hər hansı önəmli irəliləyiş müşahidə olunmayıb.

Rüb ərzində daha çox qeydə alınan pozuntu ədalətli məhkəmə araşdırması ilə bağlı olub. Belə ki, ötən rübdə bu kateqoriya ilə bağlı 65 pozuntu qeydə alınsa da üçüncü rübdə bu rəqəm 83 olub.

Təşkilat qeyd edir ki, siyasi motivli məhkəmələrin yol verdikləri pozuntular üçüncü rüb ərzində də müşahidə edilib. "Məhkəmələrin qəbul etdikləri qərarların ağlabatan izahını verməməsi, təqsirləndirilən şəxslər tərəfindən irəli sürülən vəsatətlərin araşdırılmadan rədd edilməsi, istintaq orqanlarının gəldikləri nəticələrin məhkəmələr tərəfindən tərəddüdsüz qəbul edilməsi, məhkəmələrdə irəli sürülən işgəncə iddialarının araşdırılmaması müşahidə edilən əsas pozuntular olub".

Rüb ərzində ən çox pozuntuya yol verən məhkəmələr Gəncə Ağır Cinayətlər Məhkəməsi və Gəncə Apellyasiya Məhkəməsi olub.

SMDT həmçinin bildirib ki, sentyabrın 10-da Ali Məhkəmə Azadlıq radiosu, Azadlıq qəzeti "Meydan" TV, "Turan" telekanalı və "Azərbaycan Saatı"nın veb saytların bloklanması ilə bağlı şikayətə baxaraq, Bakı Apelyasiya Məhkəməsinin qərarını ləğv edib və işə yenidən baxılması üçün geriyə göndərib.

Rüb ərzində sosial şəbəkələrdə yazılan fikirlərə görə fəalların polis idarələrinə çağırılması,

inzibati həbslərlə cəzalandırılması, jurnalistlərin hadisə yerini işıqlandırdığı zaman hüquq mühafizə orqanlarının əməkdaşlarının zorakılığına məruz qalması faktları da qeydə alınıb.

Müsavat Partiyasının Divan üzvü Tofiq Yaqublu Baş Prokurorluğa çağırılaraq Facebook sosial şəbəkləsində yazdığı fikirlərə görə rəsmi xəbərdərlıq edilib.

Sərbəst toplaşmaq azadlığına gəlincə təşkilat qeyd edir ki, yanvar ayından etibarən gətirilən daha ağır məhdudiyyətlər qalmaqda davam edib. Rüb ərzində sərbəst toplaşmaq azadlığının daha çox Bakı Şəhər İcra Hakimiyyəti tərəfindən pozulduğu qeyd edilib.

Rüb ərzində 5 ictimai, siyasi və vətəndaş cəmiyyəti fəalının ölkədən çıxışına tətbiq edilən qadağa qaldırılıb. "Bununla belə ölkədən çıxış qadağasının siyasi təzyiq metodu kimi istifadə edilməsi təcrübəsindən hələ də imtina edilməyib. Hal-hazırda 16 şəxs siyasi motivlərlə ölkədən çıxış qadağası altındadır.

SMDT 2008-ci ildə 2001-ci ildə yaradılmış Seçkilərin Monitorinqi Mərkəzinin (SMM) davamçısı olaraq təsis edilib. Təşkilata məşhur hüquq müdafiəçisi Anar Məmmədli rəhbərlik edir.

SMDT (SMM) 2001-ci ildən etibarən 15 seçkinin monitorinqini keçirib.

Təşkilat 14 min yerli müşahidəçinin hazırlanması üzrə 600-dən çox treninq keçirib.

SMDT ENEMO-nin (ATƏT ölkələrinin seçkilərin monitorinqi üzrə QHT şəbəkəsi), "Şərq Tərəfdaşlığı" ölkələrinin Vətəndaş Cəmiyyəti Forumunun, Avropa Demokratik Seçkilər Platformasının (EPDE) və Qlobal Yerli Müşahidəçilər Şəbəkəsinin üzvüdür. -21D06-