İki nəfəri öldürən, iki nəfəri də yaralayan baş nazir müavininin nəvəsi həbs edilib

Bakı/07.08.17/Turan: Avqustun 3-də axşam Bakının Nərimanov rayonunda baş vermiş, iki nəfərin həlak olması, iki nəfərin yaralanması ilə nəticələnən ağır qəza faktı üzrə 263.3-cü (yol hərəkəti qaydalarının pozulması, iki və daha artıq insanın həlak olmasına səbəb olduqda) maddə ilə cinayət işi açılıb. Bu barədə ölkə DİN-in və Baş Prokurorluğun birgə məlumatında deyilir.

Söhbət Nail Allahverdiyev adlı gəncin - baş nazirin müavini Əli Həsənovun nəvəsinin dostu ilə birlikdə hədsiz sürətlə yarış təşkil etməsindən və qəza törətməsindən gedir.

"İstintaq materiallarına əsasən, "Mercedes-Gelandawagen"in sükanı arxasında 1994-cü il təvəllüdlü Nail Allahverdiyev olub. Məhkəmənin qərarı ilə o, 4 ay müddətinə həbs edilib.

İkinci avtoxuliqan, "Mazda" maşınının sürücüsü Mirməhəmməd İsmayılov inzibati qaydada 1 ay müddətinə həbs edilib.

"Dövlət başçısının xəbərdarlığına baxmayaraq, dövlət məmurlarının övladları bu cür cinayət hərəkətlərini davam etdirirlər.

DİN və Prokurorluq bildirir ki, tutduqları vəzifədən və xidmətlərindən asılı olmayaraq, qanunazidd əməllərin törədilməsində təqsirli olan dövlət məmurlarının övladlarına qarşı ən sərt tədbirlər görüləcək", deyə məlumatda bildirilir. -16D-