İşıq məhbuslarına hökm oxunub

Bakı/19.08.17/Turan: Biləsuvar rayonunda məcburi köçkünlərin yaşadığı qəsəbələrdə elektrik enerjisinin kəsilməsi ilə bağlı keçirilən etiraz aksiyasında həbs olunan beş nəfərin məhkəməsi başa çatıb. Hakim Təranə Hüseynova təqsirləndirilən 5 nəfərdən 3-ünün şərti olaraq azadlığa buraxılmasına hökm verib.

Bu haqda Turana təqsirləndirilən şəxslərin vəkillərindən Elçin Sadıqov məlumat verib.

Vəkilin bildirdiyinə görə, hökm avqustun 14-də elan edilib.

Hökmə əsasən, təqsirləndirilən şəxslərdən Gülağa Alməmmədov, İlkin İskəndərov və Cəlal Quliyev şərti olaraq azadlığa buraxılıblar.

Məhkəmə digər iki nəfərin - Ülvi Quliyev və Zaur Feyruz 1 il 6 ay müddətinə azadlıqdan məhrum edilməsinə hökm verib.

E.Sadıqov hökmün hələlik onlara təqdim edilmədiyini, hökmü aldıqdan sonra yuxarı məhkəmələrə şikayət edilməsinin müvəkkilllərlə müzakirə ediləcəyini bildirib.

2016-cı il dekabrın 22-də Biləsuvarda məskunlaşan məcburi köçkünlər elektrik enerjisinin fasilələrlə verilməsinə etiraz olaraq aksiya keçiriblər. Əraziyə polis qüvvələri cəlb olunub. Vətəndaşlarla polis arasında qarşıdurma baş verdiyi bildirilir.

Rəsmi məlumata görə, toqquşmada polis əməkdaşlarına xəsarət yetirilib. Bir polis gözündən xəsarət alıb. Ancaq köçkünlər deyir ki, aksiya iştirakçılarından da xəsarət alanlar var və üstəlik, polislərin xəsarət alması ilə bağlı deyilənlər bir qədər şişirdilib.

Qəsəbədə yaşayan Cəlal Quliyev, Zaur Feyruzlu, Gülağa Əliməmmədov, Ülvi Quliyev və İlkin İsgəndərov həbs edilib. Onlara CM-in 186.2.2 (özgə əmlakını məhvetmə, partlatma və yandırma), 233 (ictimai qaydanı pozma) və 315.2 (hakimiyyət nümayəndəsinə həyat və sağlamlıq üçün təhlükəli zor tətbiqi) maddələri ilə ittihamlar verilib.

Aksiyadan sonra həmin qəsəbələrə qaz çəkilib.-06D--