Media-icmal 12.12.20

“Azərbaycan” qəzeti “Koronavirusdan xilas yolu məsuliyyətli olmaqdan keçir” Müəllif deyir ki, dünyada koronavirusa yoluxanların sayı durmadan artır, bütün qitələrə yayılmış virusdan xilas yolları araşdırılır, konkrt nəticənin olmaması vəziyyətin ciddi nəzarətə alınmasını tələb edir.

Müəllifə görə, son rəqəmlər də ürəkaçan deyil, Azərbaycanda gündəlik yoluxma 5 min nəfərə yaxınlaşır.

Məqalədə deyilir ki, hələ əldə edilməyən vaksin haqqında da birmənalı fikir söyləyən yoxdur, amma dünyada təxminən 35 laboratoriya koronavirus əleyhinə vaksin hazırlamağa çalışır.

Çin və Rusiyada klinik tədqiqatlar mərhələsinin başa çatmasını gözləmədən vaksini tətbiq etməyi qərara aldılar, amma hər iki ölkə vaksinlərinin əlavə təsirlərinin olmadığını bildirirlər.

Hələliksə, tibb mütəxəssislərinin fikrincə, profilaktik tədbirlər düzgün aparılsa, bu vəziyyətdən çıxmaq olar, odur ki, virusun ölkədə son vaxtlar daha geniş yayılmasını nəzərə alaraq, ölkə vətəndaşları daha ayıq-sayıq olmalıdırlar.

“Mətbuat.az” saytı “Köhnə yaşayış binaları ''kömək'' istəyir - ekspertdən təklif” sərlövəhli məqalədə istismar müddəti keçən,qəzalı durumda olan  köhnə beşmərtəbəli binaların hələ də sökülməməsinin səbəbləri və bundan çııxş yolu araşdırılır.

Müəllif deyir ki, bir zamanlar belə binaların sökülməsi intensivləşmişdi, amma son vaxtlar iqtisadi durğunluq səbəbindən bu proses dayandırılıb. Ona görə hazırda ümumi mənzərə ondan  ibarətdir ki, pilot layihələr çərçivəsində köhnə binaların söküntüsü dayandırılıb.

Əmlak məsələləri üzrə ekspert Elnur Fərzəliyev hesab edir ki, belə binaların vaxtından öncə qəzalı vəziyyətə düşməsinə səbəb baxımsız qalması, zirzəmilərdən obyekt kimi istifadə edilməsi üçün aparıcı divarların sökülməsidir. Amma ekspertlər bunu da vurğulayırlar ki, pandemiya səbəbindən tikinti sistemində də böhran yaşanır, hündürmərtəbəli binalarda mənzil satışı aşağı düşdüyü üçün köhnə binaların sökülməsi prosesi də dayanıb.

Əmlak mütəxəssisləri bu binalarda su sisteminin yenilənməsini vacib sayırlar, çünki 50 il öncə çəkilmiş su xətləri sıradan çıxıb, fəlakət mənbəyinə dönüb. Ümumiyyətlə, keçmişdən qalan mənzil və ev fondunun qorunmasına diqqət yetirilməlidir. Ekspertlər hesab edirlər ki, bu gün tikinti bazarında yaşanan durğunluq hələ uzun müddət davam edəcək, odur ki, köhnə binaları mənzil fondu kimi qorumaq üçün həmin binalarda dövlət tərəfindən bərpa işləri aparılmalıdır.

“Yenisabah.az” saytı isə “Viza rejiminin aradan qalxması Türkiyəyə işçi axınını artıracaq” - iqtisadçı ekspert” sərlövhəli məqalədə Türkiyə ilə Azərbaycan arasında vizanın qaldırılmasının mümkün nəticələrini qiymətləndirir.   

Bu il dekbarın 10-da Türkiyə ilə Azərbaycan arasında razılaşmaya əsasən hər iki ölkə vətəndaşlarının şəxsiyyət vəsiqələri ilə qarşılıqlı səyahət etməsi mümkün olacaq.

Məsələ ilə bağlı şərh verən iqtisadçı-ekspert Akif Nəsirli deyir ki, hazırda Türkiyədə kifayət qədər Azərbaycan vətəndaşı olan əməkçilər var və viza rejiminin aradan qalxması bu sayı daha da artıracaq. Ekspert Azərbaycandan Türkiyəyə sadə əməkçilərin daha çox axınının olacağını deyir və bunu Azərbaycanda əmək bazarındakı problemlərlə əlaqələndirir.

Türkiyə vətəndaşlarının Azərbaycanda biznes qurmasına ekspert şübhə ilə yanaşır və bunu Azərbaycan iqtisadiyyatının problemli olması ilə əlaqələndirir.

Ekspertlər hesab edirlər ki, həmin problemlər həllini tapmayınca Azərbaycanda iş yerləri çoxalmayacaq. Bu problemlərdən biri əmlaka və mülkiyyətə zəmanət verilməməsidir, müstəqil məhkəmə sisteminin olmamasıdır.  

Ekspertlərə görə, Azərbaycan investisiya üçün unikal ölkədir, amma iqtisadiyyatdakı problemlər o unikallığı öz çətiri altında gizlədir.

“Modern.az” saytı isə “Koronavirus getdikcə daha öldürücü olur – bədbin açıqlama” sərlövhəli məqalədə koronvirusa yoluxma sahəsindəki vəziyyəti dəyərləndirir.

Tibb professoru, virusoloq Tərlan Məmmədov deyir ki, bəziləri bir müddət öncə koronavirusun mutasiya olaraq insan üçün təsirsiz ötüşəcəyini deyirdilər,  amma onlar  deyəsən yanılıblar, çünki indiki zamanda koronavirus daha çox can alır.

T.Məmmədova görə, virusların mutasiyaya uğraması müxtəlif istiqamətlərdə baş verir, ya aradan çıxır, ya da daha aktiv ola bilər.

Virusoloq vurğulayır ki, indiki vəziyyətdə yeni koronavirusda daha ciddi təsirlərə malik olan mutasiyalar əmələ gəlir, bu səbəbdən koronavirusdan qurtulmaq üçün tədbirlər görülməlidir. Maska taxılması, insanlar arasında sosial məsafənin gözlənilməsi, topluluq olan yerlərə getməmək belə tədbirlərdən sayılır.