Media-icmal 15.03.19

VII Bakı Qlobal Forumunun mahiyyəti, "Sovetski" sakinlərinin kompensasiya narazılığı, uşaqpulu ödənişinin bərpası müzakirələri və s. məsələlər bugünki (15 mart 2019-cu il) medianın aparıcı mövzularındandır...

Bakıda beynəlxalq müzakirə platforması

"Azərbaycan" qəzeti "İlham Əliyevdən dünyaya sülh, ədalət və əməkdaşlıq çağırışı" sərlövhəli məqalədə VII Qlobal Bakı Formunu dəyərləndirir.

Xatırladaq ki, bu dəfəki mövzusu "Dünyanın yeni xarici siyasəti" olan Forumun martın 14-dən başlayıb, martın 16-da başa çatacağı gözlənilir, tədbirə 55 ölkədən 550-dən artıq nümayəndə qatıldığı deyilir.

Müəllifə görə, Azərbaycan təkcə bölgənin lideri kimi, dünyada söz sahibi və müstəqil siyasətilə deyil, həm də beynəlxalq təşəbbüslərilə, dünyanın diqqət mərkəzində olan qlobal məsələlərin müzakirə olunduğu siyasi, iqtisadi və humanitar mərkəz kimi tanınır.

Müəllif vurğulayır ki, Bakı Beynəlxalq Humanitar Forumu, Mədəniyyətlərarası Dialoq Forumu və digər tədbirlər məhz Azərbaycanda keçirilir, Azərbaycanın təşəbbüsü ilə yaranan Bakı Prosesi qlobal hərəkata çevrilib və BMT tərəfindən dəstəklənir.

Məqalədə deyilir ki, Bakı bu təşəbbslərilə dünyada sülh və təhlükəsizliyə, milli və ümumbəşəri dəyərlərin, multikulturalizm ənənələrinin inkişafına, problemlərin həllinə dəyərli töhfələr verir.

"Qlobal Forumun Bakı şəhərində keçirilməsi də dünya ictimaiyyətinin Azərbaycana olan hörmətinin, etimadının, ölkəmizin dünya siyasətində, beynəlxalq münasibətlər sistemində yerinə və roluna, habelə siyasi və humanitar dialoqun inkişafına töhfələrinə verilən qiymətin real ifadəsidir", müəllif Forumun Bakıda keçirilməsinin mahiyyətini belə dəyərləndirir.

Müəllif Forumun açılışında Prezident İlham Əliyevin nitqinə istinadən deyir ki, Forum artıq dünyada cərəyan edən vacib proseslərin müzakirəsi üçün beynəlxalq platformaya çevrilib.

Yazıda vurğulanır ki, İ.Əliyev dünyada sabitlik üçün yeni siyasət hədəfi olaraq multikulturalizmin təşviqini göstərib: "Bu gün Azərbaycan nümayiş etdirir ki, yalnız multikulturalizmin təşviqi ilə dünya irəli gedə, gərginlik azala bilər", - deyə dövlət başçısı Azərbaycanı multikulturalizm nümunəsi kimi təqdim edib.

Buna qədər keçirilmiş 6 Forum barədə məlumat verilən məqalənin sonunda isə oxuyuruq: "Bütün bunlar göstərir ki, Qlobal Bakı Forumu səmərəli diskussiya və dialoq məkanıdır. Bu diskussiyalara görkəmli dövlət xadimləri, tanınmış siyasətçilər qoşulurlar. Ona görə də bu qlobal platformanın dövlətlərarası əməkdaşlığa, siyasi münasibətlərə konstruktiv töhfə verdiyi, qarşılıqlı siyasi dialoq üçün əlverişli şərait yaratdığı şübhəsizdir".

Tarixə dönən "sovetski"nin kompensasiya narazılıqları

"Yeni Müsavat" qəzetində isə "Sovetski sakinlərinin kompensasiya dərdi -mənzillər bahalaşıb, təzminat məbləği isə dəyişməyib" sərlövhəli məqalə oxumaq olar.

Müəllif Bakının tarixi "sovetski" məhlləsindəki söküntülər, sakinlərin verilən kompensasiyaların azlığı ilə bağlı narazılıqlarını gündəmin müzakirəsinə daşıyır.

Müəllif deyir ki, hazırda bu məhəllədə söküntü işləri davam edir, bu ərazi ilə bağlı Bakı rəhbərliyi, təfərrüatını açıqlamasa da, xüsusi plan hazırlandığını bildirir.

Buradan köçürülən sakinlərə verilən kompensasiyaya gəlincə, müəllif vurğulayır ki, hər kvadratmetrə görə sakinlərə 1500 manat pul ödənilib.

Müəllifin sözlərinə görə, hazırda evləri söküntüyə düşəcək sakinlərin əksəriyyəti verilən kompensasiyanın azlığından şikayət edir və bildirirlər ki, dövlət kompensasiya məsələsinə yenidən baxmalıdır: "Onlardan öyrəndik ki, köçürülmənin üçüncü mərhələsində də narazı sakinlər olub. Belə ki, sakinlərin sözlərinə görə, kompensasiya ödənilən zaman evin artırılmış hissəsinə heç bir məbləğ ödənilməyib", deyə müəllif kompensasiyadan hələ də narazılıqların qaldığını vurğulayır.

Yazı müəllifi deyir ki, sakinlər kompensasiya ödənişi həcminin artırılmasını 2015-ci il devalvasiyasından sonra manatın dollara nisbətdə iki dəfədən çox dəyər itirməsilə əsaslandırırlar: "Camaata 1500 manat veriləndə 1 dollar 78 qəpik idi, bazarda məhsullar ucuz idi. İndi, necə olur ki, bütün hər şey bahalaşır, kompensasiya isə yerində qalır. Ya köçürməsinlər, ya da normal pul versinlər ki, biz də özümüzə ev ala bilək", deyə müəllif sakinlərə istinadən bildirir .

Müəllif bunu da vurğulayır ki, sakinlər söküntülərlə bağlı tez-tez kommunal problemlər yaşadıqları üçün buradan köçmək istəyirlər.

Müəllifin sözlərinə görə, millət vəkilləri qəzalı vəziyyətdə olan və sökülməsi nəzərdə tutulan "sovetski"də manatın inflyasiyası nəzərə alınmaqla evlərin kompensasiya məbləğinin heç olmasa, 2 min manata çatdırılması, ya da ev sahiblərinə pul əvəzinə yeni tikilən binalarda hazır mənzillər verilməsi barədə Nazirlər Kabinetinə təkliflər səsləndiriblər.

Müəllif isə Nazirlər Kabinetinin 2018-ci il hesabatına istinadən bildirir ki, müstəqil qiymətləndirmə ekspertləri mənzilin əsas və köməkçi sahələrinin hər kvadratmetri üçün son hədd olaraq 1500 manat təklif edir və bu məlumata əsasən, "Sovetski" sakinlərinin kompensasiyanın artırılması istəklərinin gerçəkləşdirilməyəcəyini bildirir.

Deputat: Mən buna tərəfdaram

"Oxu.az" saytında isə "Uşaq pulu ilə sosial müavinət fərqlidir? - Deputat aydınlıq gətirdi" sərlövhəli məqalə diqqət çəkir.

Müəllif son vaxtlar ölkə mediasının gündəmini zəbt edən uşaqpulu ödənişinin bərpa olunması müzakirəsinin hələ də aktuallığını saxladığını deyir və bu barədə deputat Musa Quliyevin məsələyə münasibətini təqdim edir.

Deputat "Oxu.az"a bildirir ki, uşaqpulu özü də sosial müavinət növüdür, sadəcə, sovet dönəmində "uşaqpulu" adı ilə təqdim olunurdu və bu baxımdan uşaqlarla bağlı sosial müavinətlərin, uşaqpulunun bərpasının tərəfdarıdır.

Milli Məclisin (MM) Əmək və sosial siyasət, həmçinin, Səhiyyə komitəsinin üzvü Musa Quliyev bu məsələdə şərt olaraq bunu göstərir ki, bu müavinətin öncədən maliyyə tutumu, neçə il ərzində və nə qədər veriləcəyi ilə bağlı məsələlər tam araşdırılmalı, sonra qərar verilməlidir.

Deputat xatırladıb ki, ötən əsrin 90-cı illəri və 2000-ci illərin lap əvvəllərində Azərbaycanda uşaq pulu çox cüzi idi: "Əslində, ona uşaq pulu da demək olmazdı, həmin pul heç nəyə yaramırdı. Ona görə də 2000-ci illərdə uşaq pulu ləğv olundu və o, ünvanlı sosial yardımla əvəzləndi. Daha doğrusu, maddi imkanları aşağı olan insanlar ünvanlı sosial yardım alarkən bu məsələ də onun içində həllini tapdı".

M.Quliyev deyir ki, sovetlər dövründə və ondan bir qədər sonra uşaqpulları 0-6 yaş arasında olan uşaqlara verilirdi, indi 0-3 yaş arasında uşaqlarla bağlı məsələ gündəmdədir və çox gözəl ideyadır: "Mən onu dəstəkləyirəm. Amma ola bilər ki, bu məsələ həllini tapacağı təqdirdə, o, 0-3 yox, 0-6 yaşlarında və ya ondan bir qədər yuxarı yaş həddində müəyyənləşdirilməlidir. Bu isə aparılacaq hesablamalardan, məsələnin maliyyə tutumunun müəyyənləşdirilməsindən və müvafiq qərarın, fərman və ya sərəncamın verilməsindən sonra məlum olacaq. İndidən bu barədə konkret nəsə demək çətindir".

Deputat deyir ki, bunu həll etməklə bir daha dövlət öz vətəndaşına, öz gələcəyi olan nəslə, uşaqlara sahib çıxmış olduğunu göstərəcək: "Bu baxımdan, uşaqpulunun bərpası, sosial müavinətin artırılması dövlətin öz gələcəyinə sahib çıxmasını bir daha açıq şəkildə ortaya qoyur", deputat mövqeyini belə ifadə edib.

M.Quliyev hesab edir ki, əgər bu məsələ həllini taparsa, ünvanlı sosial yardım alan ailələrin uşaqları da bu hüquqdan yararlanmalıdır, yəni onlar həm sosial müavinət, həm də ünvanlı sosial yardım almalı və hər iki məsələ birlikdə həllini tapmalıdır, uşaqpulu ailələrin gəlir səviyyəsindən asılı olmayaraq, bütün uşaqlara verilməlidir.

Rəy yaz

Cəmiyyət

Чего добивается Россия в Армении, и что обещали Еревану на трехсторонней встрече в Брюсселе? - беседа с Тиграном Хзмаляном в программе "Çətin sual"



InvestPro Azerbaijan Baku & Turkiye Istanbul 2024 – two conferences in one shot


Bizi sosial şəbəkələrdə izləyin

Xəbər lenti