Media-icmal 16.11.17

Ölkədə tolerantlığın səviyyəsi, ölkə səhiyyəsindəki durum və qida təhlükəsizliyi sahəsindəki vəziyyət bugünki (16 noyabr, 2017-ci il) medianın aparıcı mövzularındandır...

Tolerantlıq nümunəsi -Azərbaycan

"Azərbaycan" qəzeti "Azərbaycanda bütün dinlərə və fərqli mədəniyyətlərə eyni qayğı ilə yanaşılır" (http://www.azerbaijan-news.az/index.php?mod=3&id=133866) sərlövhəli məqalədə ölkədəki tolerantlığı dəyərləndirir.

Müəllif deyir ki, hər il noyabrın 16-sı Azərbaycanda da qeyd olunan Beynəlxalq Tolerantlıq Günü 1995-ci ildə UNESCO-nun 50 illiyi münasibətilə təsis edilib: "Həmin gün UNESCO-ya üzv dövlətlər tolerantlıq prinsipləri haqqında Bəyannamə qəbul edib. Məqsəd qurumun da nizamnaməsində qeyd olunduğu kimi, dünyada hamını bir-birinə dözümlülük nümayiş etdirərək mehriban qonşular kimi yaşamağa çağırışdır".

Sənədə görə, dövlət səviyyəsində dözümlülük qanunçuluğa, məhkəmə-prosessual və inzibati normalara əməl edilməsi, hər bir insana heç bir diskriminasiya olmadan iqtisadi və sosial inkişaf imkanı yaradılması deməkdir.
Müəllif deyir ki, ölkədə tolerantlığın qorunub saxlanılması istiqamətində həyata keçirilən tədbirlər keçmiş prezident Heydər Əliyevin adı ilə bağlıdır:

"Ümummilli lider multikulturalizm siyasətini ölkənin demokratik inkişafının tərkib hissəsi hesab edirdi, Azərbaycan cəmiyyəti daxilində milli, dini, məzhəblərarası məsələlərə, dövlət-din münasibətlərinin tənzimlənməsinə hər zaman xüsusi diqqət yetirirdi".

Müəllif deyir ki, tolerantlıq, multikulturalizm kimi ümumbəşəri önəm kəsb edən dəyərlər məhz Azərbaycanın nümunəsində dünya miqyasında analoqu olmayan bir fenomenə dönüb.

Yazıda vurğulanır ki, milli və mənəvi dəyərlərə sadiqlik, demokratik və dünyəvi dövlət olan Azərbaycanda din-dövlət münasibətlərinin nümunəvi modeli dünyaya təqdim edilib.

Müəllif deyir ki, bu müdrik addım indi də H.Əliyev siyasi kursunun davamçısı ölkə Prezidenti İlham Əliyev tərəfindən uğurla atılır və xatırladır ki, Prezident İlham Əliyevin sərəncamı ilə 2016-cı il Azərbaycanda "Multikulturalizm ili" elan edilmişdi.

Yazıda deyilir ki, Prezident İlham Əliyevin din xadimləri ilə keçirdiyi görüşlər, Ramazan bayramında ənənəvi olaraq onlarla iftar süfrələrində bir yerdə olması və bu mərasimlərə digər dini icmaların nümayəndələrinin də qatılması ölkədə tolerant düşüncənin bərqərar olmasının göstəricisidir.

Müəllif toelrantlıqla bağlı ölkədə keçirilmiş müxtəlif yerli və beynəlxalq səviyyəli tədbirləri, ayrı-ayrı din başçılarının ölkəyə səfərlərini göstərir və hazırda ölkədə 2 mindən çox məscid, 7 yəhudi sinaqoqu, 13 xristian kilsəsinin fəaliyyətdə olduğunu deyir.

Müəllif deyir ki, Azərbaycanda bütün dinlərə və fərqli mədəniyyətlərə eyni qayğı ilə yanaşılır və ölkədə milli, irqi və dini zəmində münaqişə, qarşıdurmaların olmaması bunun əyani sübutudur.

Ən yaxşı halda formal qurum

"Azadlıqinfo.az" saytında isə "Yaradılan yeni dövlət orqanı da formal olacaq" sərlövhəli məqalə oxumaq olar (https://www.azadliq.info/206395.html) və burada aqrar sahə üzrə ekspert Vahid Məhərrəmlinin düşüncələrinə yer verilib.

Ekspert xatırladır ki, ölkədə ərzaq təhlükəsizliyi təmin olunmur: "Bu il oktyabrın 28-də keçirilən aksiyada ölkəyə idxal olunan qida məhsullarının keyfiyyətsiz olması, standartlara cavab verməməsi, xüsusən ərzaq buğdası adı ilə ölkəyə yemlik buğda gətirilməsi,həmin buğdanın unundan çörək bişirilərək əhaliyə yedizdirilməsi, ölkəyə kərə yağı adı ilə mənşəyi məlum olmayan qatqıların gətirilməsi və əhaliyə baha qiymətə satılması vurğulanmışdı".

Müəllif vurğulayır ki, hakimiyyət bu sahədə iş görüntüsü yaratmaq üçün Qida Təhlükəsizliyi Agentliyi (QTA) təsis edib və bu agentliyin əsas vəzifələrindən biri də gömrük orqanları ilə birgə idxal olunan qida məhsullarının təhlükəsiz olmasını yoxlamaqdır.

Yazıda deyilir ki, Əsasnamə ilə agentliyin qarşısına 46 vəzifə qoyulub, amma bir oliqarx-nazirin verdiyi qərar agentlik rəhbərliyi üçün əsas vəzifə olacaq və həmin məmurun sözü qanunu üstələyəcək: "Necə ki, ölkədə rüşvətxorluq, korrupsiya tuğyan edir, müstəqil, ədalətli məhkəmə sistemi yoxdur, yeni yaradılan institutlar da mövcud sistemə xidmət edəcək. Ən yaxşı halda isə formal fəaliyyət göstərəcək".

Müəllif xatırladır ki, ölkədə aqrar sahə məhsullarının istehsalını, emalını, keyfiyyətini artırmaq, dövlət vəsaitlərindən səmərəli istifadəni təmin etmək, əhalinin sosial rifah halını yaxşılaşdırmaq, ərzaq məhsullarının satın alınmasını mərkəzləşdirilmiş qaydada həyata keçirmək məqsədilə 2016-cı ilin aprelində Ərzaq Məhsullarının Tədarükü və Təchizatı ASC yaradıb.

Bundan irəli gələrək, müəllif deyir ki, bu qurumun yaradılması da ötən bir il ərzində ölkə bazarlarında məhsul bolluğuna, keyfiyyətin yaxşılaşmasına və ya qiymətlərin ucuzlaşmasına səbəb olmayıb.

Müəllif Prezidentin sərancamında əksini tapan kənd təsərrüfatı məhsulları istehsalçılarının inkişafının da və eləcə də dövlət vəsaitlərindən səmərəli istifadənin də təmin olunmadığını xüsusi olaraq vurğulayır.

Son olaraq isə bütün bu qurumların qida təminatı sahəsində hər hansı müsbət sonuca nail ola bilməyəcəyini deyən müəllif görülənlərə mənasız addımlar kimi yanaşır və bildirir: "Nə isə... Gülməlidir, deyilmi?"

Bəraət axtarmayın, nəticə çıxarın

"Novoye Vremya" qəzetində dərc olunan "Əgər səhiyyə "xəstədirsə", nə etməli?" (http://www.novoye-vremya.com/w111467/.../#.WgyCSkpl_IU) sərlövhəli məqalədə bu suala cavab axtarılır.

Müəllif səhiyyə sahəsində durumun yaxşılaşmadığını deyir, əksinə, son vaxtlar bu sahədə durum o qədər pisləşib ki, xarici ölkələrin də diqqətini cəlb edir: "Belə ki, ötən həftə bununla bağlı ABŞ Dövlət Departamenti Azərbaycandakı vətəndaşlarına bizim ölkədə əməliyyat olunmamaq və apteklərdən dərman preparatları almamaq çağırışı edib".

Müəllifə görə, Azərbaycan səhiyyəsi hansı vəziyyətə düşüb ki, xarici dövlətlər öz vətəndaşlarına belə çağırışlar edə bilir.

Məqalə müəllifi deyir ki, Dövlət Departamentinin bu tövsiyəsi bütünlükdə Azərbaycan səhiyyə sisteminə tam etimadsızlığın nümayişidir: "Deyək ki, Dövlət Departamenti böhtan atır, adamın dili dönməz, çünki Azərbaycan səhiyyəsində baş verənlərlə ölkə əhalisi təkcə sözdə tanış deyil. Bu tövsiyə elə-belə verilməyib. Yəqin ki, Azərbaycan xəstəxanalarında, eləcə də tibbi əməliyyatlar zamanı ölüm hallarının yüksək olması haqda kifayət qədər əsaslı informasiya var".

Ölkə səhiyyəsində sağ ayağın yerinə sol ayağın kəsilməsi kimi biabırçı əməliyyat olmasını xatırladan müəllif deyir ki, bunlar ayrı-ayrı hallar deyil, müntəzəm baş verən hadisələrdir, odur ki, bundan o yana yol yoxdur və səhiyyə sistemində dəyişikliklər olması zərurətdir.

Müəllif son vaxtlar ölkədə müasir tibbi avadanlıqlarla təchiz edilən 10-larla tibbi müəssisənin açılmasını xatırladır, amma bunun tibbi xidmətin yüksək səviyyədə dəyərləndirilməsinə uyğun gəlmədiyini söyləyir: "Maraqlıdır ki, tibb müəssisələri nə qədər təmtəraqlıdırsa, sadə vətəndaşlar üçün o qədər də əlçatmazdır, Konstitusiyaya görə isə, dövlət müəssissələrində tibbi xidmət pulsuz olmalıdır".

Müəllif deyir ki, Azərbaycan vətəndaşı da yerli səhiyyəyə etibar etmir, ildə 100 minlərlə vətəndaşların, hələ məmurların da, müalicə üçün xarici ölkələrə üz tutduqları heç kəsə sirr deyil.

Müəllif vurğulayır ki, ölkədə peşəkar həkim olmadığını demək olmaz, amma aşağı olan maaş və səhiyyədəki qüsurlar bu peşəkarlığı heçə endirir və buna görə də bacarıqlı mütəxəssislər Azərbaycanı tərk edərək xaricə gedirlər.

Yazı müəllifi deyir ki, önəmli olan tibb klinikalarının sayı yox, tibbi xidmətin yüksək səviyyədə olmasıdır, ancaq belə halda Azərbaycan səhiyyəsini biabır edən tövsiyələrlə rastlaşmayacağıq.

Müəllifə görə, Səhiyyə Nazirliyi rəhbərliyi isə özünə bəraət axtarmamalı, bu tövsiyədən nəticə çıxarmalıdır.--0--