Media-icmal 18.12.19

Azərbaycanın dünyanın güclü dövlətləri arasında yer alması, istixana sahibkarlarının qaz borcu ilə bağlı güzəştlər istəməsi, obyektlərin sığortalanması sahəsindəki problemlər və s. məsəllər medianın aparıcı mövzuları sırasındadır...

Güclülər arasında yer alan Azərbaycan       

“Azərbaycan” qəzeti “Ən güclülər sırasındakı ən islahatçı ölkə” sərlövhəli məqalədə Azərbaycanın qüdrətli dövlətlər arasında yer almasını dəyərləndirir.

Müəllif deyir ki, Azərbaycan buna dayanıqlı inkişaf və tərəqqi, yüksələn reytinq və qazanılan iqtisadi-siyasi dividendlər, sistemli islahatlar və onun uğurlu nəticələrilə layiq olub.

Müəllif əlavə edir ki, bu uğurları beynəlxalq iqtisadi forumların, reytinq təşkilatlarının hesabatları da təsdiqləyir.

“Azərbaycanın qüdrətli dövlətlər arasında qərarlaşmasının ABŞ tərəfindən elan olunması Prezident İlham Əliyevin tam müstəqil siyasətinə verilən növbəti yüksək dəyərdir”, deyə müəllif bildirir.

Müəllif bir sıra beynəlxlaq miqyaslı təşkilatların, forumların, fondların adlarını çəkərək, bu uğurların həmin qurumlar tərəfindən də təsdiqləndiyini vurğulayır.

“Təbii ki, Azərbaycanın yüksək mövqelərdə qərarlaşması hər hansı reytinqlə bağlı deyil. Reytinq və hesabatlarda ölkəmizin mühüm yer tutması sadəcə bu gün Azərbaycana xaricdən baxışın necə olduğunun göstəricisidir”, deyə müəllif diqqətə çatdırır.

Yazı müəllifi Amerikanın "U.S.News & World Report” jurnalında dərc edilən dünyanın ən güclü ölkələrinin reytinq siyahısında Azərbaycanın 80 ölkə arasında 45-ci yerdə qərarlaşmasını da növbəti uğur adlandırır.

Müəllifə görə, siyahı tərtib edilən zaman ölkələrin iqtisadi vəziyyəti, hərbi gücü, siyasi təsir dairəsi, dünyada liderliyi, habelə beynəlxalq təşkilatlara üzvlük və iştirakı daxil olmaqla, bir sıra amillər nəzərə alınıb.

Müəllif vurğulayır ki, son 15 ildə Azərbaycan iqtisadiyyatı 3,2 dəfə, qeyri-neft iqtisadiyyatı isə 2,8 dəfə artıb, Azərbaycan hərbi qüdrətinə görə də dünyanın ən güclü ordularından birinə sahibdir və dünyanın 50 ən güclü orduları sırasındadır: “Göründüyü kimi, bütün bu uğurlar Prezident İlham Əliyevin məqsədyönlü və prinsipial siyasətinin bəhrəsidir və reytinq sıralaması da bu siyasətə verilən nöbvəti beynəlxalq dəyərdir”, deyə müəllif uğurların səbəblərini göstərir.

Yazının sonunda isə oxuyuruq: “Əminliklə deyə bilərik ki, cənab İlham Əliyevin davamlı islahatları ilə Azərbaycan növbəti reytinq hesabatlarında mövqeyini daha da yaxşılaşdıracaq”.

İstixana sahiblərinin güzəşt tələbi

“Marja.az”da isə “İstixana rəhbərləri borclarla bağlı güzəşt istəyirlər” sərlövhəli məqalə diqqət çəkir.

Müəllif deyir ki, bu günlərdə bir sıra qurum rəbərlərləri ilə Salyan rayonunda istixanalar işlədən sahibkarlar arasında görüş olub.   

Müəllif əlavə edir ki, Salyan rayon İcra Hakimiyyətində baş tutan görüşdə Kənd Təsərrüfatı nazirinin müavini İlham Quliyev, “Azəriqaz” İstehsalat Birliyinin baş direktoru Ruslan Əliyev, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov, Salyan rayonunun İcra Hakimiyyətinin başçısı Sevindik Hətəmov və meyvə-tərəvəz istehsalı ilə məşğul olan 50-yə yaxın istixana sahibi iştirak edib.

Müəllifin sözlərinə görə, görüşdə meyvə-tərəvəz istehsalı ilə məşğul olan istixana sahiblərinin problemləri dinlənilib, çıxış edən sahibkarlar borclarla bağlı güzəştlər tətbiq olunması, qaz sayğacı tənzimləyicilərinin yerinin dəyişdirilməsi və s. məsələlərlə bağlı təkliflər səsləndiriblər.

Müəllif “Azəriqaz” İstehsalat Birliyinin baş direktoru Ruslan Əliyevə istinadən deyir ki, bundan əvvəl Şəmkir rayonunda və Bakı şəhərinin Xəzər rayonunda müzakirələr aparılıb.

R.Əliyev deyib ki, sayğac tənzimləyicilərinin yerinin dəyişdirilməsi ilə bağlı müraciətləri “Azəriqaz” İB öz hesabına yerinə yetirəcək.

Bundan baqşa, borclu sahibkarların fəaliyyətinə köməklik göstərilməsi məqsədilə və s. məqamlarla bağlı məsələlərin həlli üçün tapşırıqlar verilib.

Müəllifin sözlərinə görə, tədbirdə sahibkarlığın daha da inkişaf etdirilməsi istiqamətində fikir mübadiləsi aparılıb, fermerlərin təklifləri qeydiyyata alınıb.

Yazı müəllifi vurğulayır ki, sahibkarların müraciətlərinin bir qismi həllini tapıb, qaldırılan bəzi məsələlər isə araşdırılması üçün nəzarətə götürülüb.

Məqalə müəllifi deyir ki, müzakirələrin sonunda bu formatda görüşlərin davam etdiriləcəyi, qaldırılan məsələlərin həlli istiqamətində görülən işlər barədə fermer və sahibkarların məlumatlandırılacağı bildirilib.

Sığorta sahəsində ciddi problemlər

“Redaktor.az”da isə “Ticarət obyektlərinin sığortalanması ilə bağlı ciddi problemlər var” sərlövhəli məqalə oxumaq olar.

Müəllif ticarət obyektlərinin sığortalanması sahəsinsəki problemlərlə bağlı iqtisadçı ekspert Natiq Cəfərli ilə söhbətləşir.

Natiq Cəfərli isə sayta daşınmaz əmlakın, ticarət obyektlərinin sığortalanması ilə bağlı ciddi problemlərin olduğunu bildirir.

Müəllif həm də əlavə edir ki, N.Cəfərli son zamanlar bəzi ticarət mərkəzlərində baş vermiş yanğın hadisələrinin iqtisadiyyata təsirlərinə münasibət bildirib.

Ekspertin sözlərinə görə, bu tip obyektlərin sahibi ilə işlədənlər fərqli şəxslər olduğu üçün sənədləşmə ilə bağlı problemlər yaşanır:

“Yəni, obyektlərin sahibi başqa insanlar (çox zaman məmurlar) olur və onlar da icarəyə verirlər. Ticarət obyektlərinin sığortalanmamasının əsas səbəbi icarəyə verənlə icarəyə götürən arasında hüquqi şəkildə icarə müqaviləsinin olmamasıdır.

Burada mülkiyyətlə bağlı problemlərin həll olunması vacibdir. Çünki icarə müqavilələri çox zaman bağlanmır, tərəflər arasında sadəcə şifahi razılaşma olur. Bu da həm vergidən yayınma, həm də qanunvericilik şəklində icarəyə verənlə icarəyə götürən arasında münasibətlərin təmzimlənməsində problemlər yaşadır”.

N.Cəfərli hesab edir ki, müqavilə mədəniyyəti formalaşsa, icarəyə verənlə icarəyə götürən arasında müqavilə öhdəlikləri yazılsa, o zaman obyektlərin sığortalanması məcburiyyəti də qeyd oluna bilər.

Ekspert vurğulayır ki, burada ya icarəyə götürən, ya da icarəyə verənin qarşılıqlı razılığı əsasında obyektin sığortalanması ilə bağlı öhdəlik götürülə bilə, odur ki, ilkin olaraq müqavilə mədəniyyətinin formalaşması üçün ciddi nəzarət və təşviqedici addımlar lazımdır”.

N.Cəfərli müqavilələrin imzalanmamasının səbəblərinə də aydınlıq gətirib: “Çünki icarə müqaviləsinə görə 14 faizlik vergi müəyyənləşdirilib və bu vergi həddindən artıq yüksəkdir. Ona görə də çox zaman müqaviləsiz çalışmağa üstünlük verirlər. Ola bilər ki, bu vergi dərəcəsinin dəyişdirilməsi ilə bağlı təkliflər səsləndirilməlidir və bu təkliflər qəbul edilməlidir. İlkin mərhələdə bunu 2 dəfə azaltmaq lazımdır ki, ən azından icarəyə verənlə icarəyə götürən arasında məsələlərin hüquqi müstəvidə müqavilə şərtləri çərçivəsində həll olunmasına şərait, imkan yaransın. O zaman sığorta məsələsi də öz həllini tapa bilər”.