Media-icmal 25.08.17

Qaçqın və məcburi köçkün olan əhalinin sosial-məişət problemlərinin həlli, ərzaq məhsullarının bahalaşa bilməsi, ölkəyə gəlmiş bəzi turistlərin aldadılması bugünki (25 avqust, 2017-ci il) medianın aparıcı mövzularındandır...

Qaçqın və köçkünlər diqqət mərkəzində

"Azərbaycan" qəzeti "Məcburi köçkünlərin sosial müdafiəsi diqqət mərkəzindədir" (http://www.azerbaijan-news.az/index.php?mod=3&id=128790) sərlövhəli məqalədə ölkədə bu kateqoriyadan olan əhalinin mənzil-məişət şəraitinin yaxşılaşdırılması istiqamətində görülən işləri dəyərləndirir.

Müəllif bu istiqamətdə Birinci vitse-prezident Mehriban Əliyevanın fəaliyyətinə xüsusi önəm verir: "Mehriban xanım Əliyevanın fəaliyyətində insanlara diqqət, qayğı, onların, o cümlədən qaçqın və məcburi köçkünlərin problemlərinin effektiv həlli hər zaman əsas istiqamətlərdən birini təşkil edib. Bunun real təsdiqi Mehriban xanım Əliyevanın Birinci vitse-prezident kimi fəaliyyətə başlamasından sonra əsas diqqəti məhz qaçqın və məcburi köçkünlərin sosial problemlərinin həllinə yönəltməsidir".

Müəllif xatırladır ki, Birinci vitse-prezident kimi Mehriban Əliyeva ilk müşavirəni Bakı və Sumqayıt şəhərlərində qəzalı binalarda ağır şəraitdə yaşayan 4 min məcburi köçkün ailəsinin mənzil şəraitinin yaxşılaşdırılmasına həsr edib.

Məqalədə bu məsələyə diqqətin sübutu kimi Lökbatan qəsəbəsi yaxınlığında məcburi köçkünlər üçün salınacaq yeni müasir yaşayış kompleksinin təməlqoyma mərasiminin keçirilməsini, qəzalı binalarda məskunlaşan məcburi köçkün ailələrinə Abşeron rayonunun Masazır qəsəbəsində yeni mənzillərin verilməsi mərasimini göstərir.

Müəllif mərasimdə çıxış etmiş xanım Mehriban Əliyevadan sitat da gətirir: "Mən öz fəaliyyətimdə sosial problemlərin, xüsusilə də qaçqın və məcburi köçkün ailələrinin problemlərinin, çətinliklərinin həllinə xüsusi diqqətlə yanaşıram. Birinci vitse-prezident vəzifəmdə ilk müşavirəm məhz bu problemlərin həllinə yönəlmişdir".

Yazı müəllifi deyir ki, bu il Masazır qəsəbəsində "Yeni Bakı" yaşayış kompleksində 164, Binəqədi Gənclər şəhərciyində 50 məcburi köçkün ailəsi yeni mənzillərlə təmin edilib.

Müəllif vurğulayır ki, bu ilin may ayında Qaradağ rayonunun Lökbatan qəsəbəsi yaxınlığında 1026 ailəlik yeni yaşayış qəsəbəsinin təməli qoyulub və son 23 ildə bu qəbildən olan insanların problemlərinin həllinə 6 milyard manatdan çox vəsait yönəldilib: "İndiyədək 96 müasir qəsəbə və çoxmərtəbəli binalardan ibarət yaşayış kompleksi salınıb. Bunun da 95 faizi son 13 ildə inşa edilib. Görülən işlər nəticəsində 50 min ailənin və ya 250 min qaçqın və məcburi köçkünün mənzil şəraiti yaxşılaşdırılıb".
Müəllif deyir ki, bu kateqoriya insanların üzləşdikləri çoxsaylı problemlər dünyaya çatdırılır və görülən işlər artıq real nəticələrini verir və yurd həsrəti ilə yaşayan insanlar tezliklə bunun da uğurlu həllini tapacağına tam əmindirlər.

Ərzaq məhsulları 5% bahalaşa bilər

"Exo" qəzeti "Azərbaycanda ərzağın qiymətinin orta hesabla 5% bahalaşacağı proqnozlaşdırılır" sərlövəhli məqalədə (http://ru.echo.az/?p=62086) müəllif ərzağın bahalaşa bilməsini ekspertlərlə müzakirə edir.

Ekspert Nəriman Ağayev deyir ki, ərzağın qiymətinin bahalaşması ümumi inflyasiyanı sürətləndirəcək və hazırda bahalanma daha çox özünü ətin, meyvə-tərəvəzin qiymətlərində göstərir.

N.Ağayev bir sıra KİV-lərdə Qurban bayramı günlərində qoyun ətinin qiymətinin 5,59 manata enəcəyi barədə informasiyaları ciddi saymadığını bildirir: "Hazırda sümüklü qoyun ətinin qiyməti ən aşağısı 7,50 manatdır, amma yenə də bu qiymətə alınan ət keyfiyyətli olmur, keyfiyyətli ətin qiyməti 10 manatdan başlayaraq artır".

Ekspert xatırladır ki, ölkədə qiymət bahalaşmasının qarşısını inzibati üsullarla almaq mümkün deyil və nə qədər nikbin informasiyalar yayılsa da, ölkədə ərzaq mallarının bahalaşması davam edir: "Bu ilin üçüncü rübündə ərzaq mallarının qitmətləri 5%-dən çox artacaq. Mövsümlə əlaqədar ucuzlaşma ancaq meyvə-tərəvəzdə ola bilər, gələn aydan xiyar, pomidor, şaftalı və armud da bahalaşacaq. Bazarda bu məhsulların həcmi azalır və bahalaşama bu səbəbdən baş verəcək".

N.Ağayev xəbərdarlıq edir ki, bundan başqa, konserv və makaron məmulatlarının, günəbaxan və kərə yağlarının, pendir və balığın qiymətləri artacaq, habelə ərzaq malları ilə yanaşı, qeyri-ərzaq mallarının da qiymətlərinin artımı gözlənilir.

Ekspert vurğulayır ki, manatın sabitləşən məzənnəsi fonunda qiymət artımı dayanmalı idi, amma bu, baş vermir və ərzaq mallarının bahalaşmasının əsas səbəbi inflyasiya ilə bağlıdır.

N.Ağayev daha bir cəhətə diqqət yetirir ki, bu da daxili bazarda məhsulun keyfiyyətinə aidiyyatı dövlət qurumları tərəfindən nəzarətin pis təşkil olunmasıdır və bundan irəli gələrək bazarda çox sayda yetişdirilməsi və saxlanması zamanı kimyəvi əlavələr edilən məhsullar olduğunu bildirir.

Müəllif BMT Ərzaq və kənd təsərrüfatı malları təşkilatının açıqlamasına əsasən xatırladır ki, 2017-ci ilin iyulunda ərzağın qiyməti yenə də artım göstərib, belə ki, ərzaq qiymətləri iyun ayına nisbətdə 2,3% bahalaşıb.

BMT-nin adı çəkilən təşkilatı bu sahədə illik göstərici ifadəsində bahalaşmanın 10,2% təşkil etdiyini, qiymət artımının dənli bitkilərin, şəkər və süd məhsullarının bahalaşması ilə bağlı olduğunu bildirir.

Turist: Məni aldadırlar...

"Bizim Yol" qəzeti "Bakının taksi sürücülərinin aldatdığı turist danışdı" sərlövhəli (http://www.bizimyol.info/az/news/16768.html) məqalədə Azərbaycana gələn turistlərin bu və ya digər xidmət sahəsindəki bəzi şəxslər tərəfindən aldadılmaları mövzusunu müzakirə edir.

Müəllif deyir ki, bu ilki turizm mövsümü Azərbaycana turistlərin daha çox axın etməsi ilə yadda qaldı, hələ də turizm bölgələrində, istirahət mərkəzlərində sıxlıq yaşanmaqda davam edir.

Müəllif vurğulayır ki, turist axını bəzi neqativlərə də yol açıb ki, bu da daha çox özünü turistlərə göstərilən xidmətdəki qiymətlərdə göstərir: "Tələbatın artması qiymətlərin yüksəlməsinə təsir etməklə yanaşı, turistlərin aldadılması hallarının artmasına da yol açıb. Bu cür amillər restoran biznesində, oteldə, suvenir satışında da müşahidə edilir. Hətta fotoqraflar turistlərin şəkillərini çəkdikdə belə artıq qiymət deyirlər".

Məqalədə deyilir ki, neçə illərdir ki, şişirdilmiş qiymətlərin və turistlərin aldadılması hallarının ölkənin adına ləkə gətirdiyini bildirərək, mütəxəssislər bu istiqamətdə ictimai nəzarətin güclənməsini və maarifləndirmə işlərinin həyata keçirilməsini tövsiyə edirlər.

Yazı müəllifi deyir ki, bütün bu səylərə baxmayaraq, turistlərə münasibətdə milli heysiyyata toxunan əməllər hələ də davam edir.

Müəllif məsələni daha da konkretləşdirir və haqqında danışılan məsələlərlə bağlı sayta müraciət edən Türkiyə vətəndaşı Əmrə Qayanın şəxsində Azərbaycana turist kimi səfər edənlərin burada arzuolunmaz münasibətlə qarşılaşdığını bildirir.

Ə.Qaya xarici turistlərin Bakıda aldadıldığından və onlara göstərilən xidmətlərə görə qiymətlərin dəfələrlə şişirdilməsindən şikayət edir: "Mən azərbaycanlı xanım Gülşən Rəhimova ilə evlənmişəm. Bakıya tez-tez olmasa da, davamlı olaraq səfər edirəm. Azərbaycan vətəndaşı olmadığımı bilən kimi məni aldadırlar. Xüsusən, sərnişini olduğum taksi sürücüləri məni dəfələrlə aldadıblar. Məsələn, taksi sürücüləri Beynəlxalq Hava Limanından Azərbaycan vətəndaşlarını Bakıdan Sumqayıta 15-20 manata daşıyırsa, məndən 60 manat istəyirlər. Paytaxtdan Sumqayıta taksi sürücüləri sərnişinləri 1 manata aparırsa, məndən 3 manat alırlar. Hər səfərimdə məni aldadırlar".

Türkiyədən olan tusit Əmrə Qaya xarici turistlərin belə aldadılmasının Azərbaycanın imicinə xələl gətirdiyini vurğulayaraq, həm də turizmin inkişafına zərbə vuran işbazları qınayıb.

Müəllif xatırladır ki, turistlərin aldadılması hallarına xarici ölkələrdə də çox rast gəlinir, amma Azərbaycanda turistlərə şişirdilmiş hesablar təqdim olunması həm də qanun pozuntusudur.