IRFS
Mehman Hüseynovun şikayətləri Avropa Məhkəməsində
Bakı/06.08.17/Turan:Həbsdəki bloqqer Mehman Hüseynovun həbsdən öncə işgəncəyə məruz qalması və inzibati qaydada cərimə edilməsi ilə bağlı şikayətləri artıq Avropa İnsan Haqları Məhkəməsində icraata qəbul edilib.
Bu haqda AzadlıqRadiosuna açıqlamasında bloqqerin vəkili Elçin Sadıqov bildirib.
Vəkilin sözlərinə görə, M.Hüseynovun sözügedən işlərlə bağlı şikayəti yerli və Böyük Britaniyadan olan vəkillər tərəfindən hazırlanıb. Şikayətlər bloqqerin qanunsuz olaraq inzibati qaydada cərimə edilməsi və onun işgəncə iddiasının effektiv araşdırılmaması ilə bağlıdır. Məhkəmədən pozuntuların tanınması və kompensasiya edilməsi tələb olunur. Məhkəmə artıq həmin şikayətləri icraatına qəbul edib.
Avqustun 5-də 14 Saylı Cəzaçəkmə müəssisəsində Mehman Hüseynovla görüşən vəkil həmçinin bloqqerin Ali Məhkəmənin onun şikayətinə baxışı yubatmasından narazılıq etdiyini bildirib.
"Biz M.Hüseynovun böhtana görə, həbs edilməsi işindən hələ may ayının əvvəlində kassasiya şikayəti vermişik. Ali Məhkəmə şikayətimizi may ayının 15-də qeydə alıb. Ancaq hələ də şikayətə nə zaman baxılacağı ilə bağlı bizə bilgi verilməyib. M.Hüseynov şikayətə baxışın yubanmasından narazıdır", vəkil bildirib.
Vəkil bloqqerin saxlanma şəraitindən narazı olmadığını, ancaq sağlıq durumundakı problemlərin qalmaqda olduğunu ifadə edib.
"Saxlanma şəraitindən narazılığı yoxdur. Bununla belə səhhətindəki probemlər qalır. Müraciətlərimizin olmasına rəgmənm, tibbi yardım edilmir, əməliyyat edilməsi təmin olunmur", vəkil əlavə edib.
Mehman Hüseynov 2017-ci il martın 3-də Suraxanı rayon Məhkəməsinin qərarı ilə 2 il azadlıqdan məhrum edilib. Buna qədərisə onun yanvarın 9-da oğurlandığı güman edilirdi.
Yalnız yanvarın 10-da məhkəmə önünə çıxarkən onun Nəsimi Rayon Polis İdarəsinin 22 saylı Polis Bölməsində saxlandığı məlum olmuşdu. Nəsimi rayon Məhkəməsinin qərarı ilə M. Hüseynov polisə tabe olmamaqda təqsirli bilinərək, 200 manat cərimə edilib.
Jurnalistlər önünə çıxan bloqqer polisdə saxlandığı müddətdə işgəncələrə məruz qaldığını söyləyib. Vəkili isə işgəncə şikayətinin araşdırılmasından ötrü Bakı Şəhər Prokurorluğuna müraciət etmişdi. Nəsimi Rayon Polis İdarəsinin rəisi Musa Musayev də M.Hüseynovun işgəncə ilə bağlı dediklərini polisə böhtan sayaraq, xüsusi ittiham qaydasında iddia qaldırıb. Həmin iddia əsasında M.Hüseynov 2 il azadlıqdan məhrum edilib.
Müdafiə tərəfi isə prokurorluğun işgəncə şikayəti ilə bağlı cinayət işi açmamasından məhkəməyə müraciət etmişdi. Səbail rayon və Bakı apellyasiya məhkəmələri də müdafiə tərəfinin istəyini geri çevirmişdi.
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz