Meşə yanğınlarının səbəbi insan faktorudur - FHN rəhbəri

Bakı/02.09.22/Turan: "Qlobal istiləşmənin təsirindən əlavə, yanğınların baş verməsinin əsas səbəbi insan faktoru olaraq qalır".

Bu barədə fövqəladə hallar naziri, general-polkovnik Kəmaləddin Heydərov FHN-də meşələrdə yanğın təhlükəsizliyi ilə bağlı məsələlərin müzakirəsinə həsr olunmuş müşavirədə çıxışında deyib.

Onun sözlərinə görə, bəzi insanların sadə yanğın təhlükəsizliyi qaydalarına etinasız münasibəti və məsuliyyətsiz davranışı meşələrdə yanğınların baş verməsinə, onilliklər ərzində formalaşmış meşə fonduna, flora və faunaya ziyan vurulmasına gətirib çıxarır.

"Odur ki, meşə yanğınlarının qarşısının vaxtında alınması üçün bütün aidiyyəti qurumların əlaqəli şəkildə fəaliyyət göstərməsi mühüm əhəmiyyət kəsb edir".

Nazir, yanğınların qarşısının alınması məqsədilə həyata keçirilən tədbirlərin davam etdirilməsinin vacibliyini bildirib, həmçinin meşələrdə yanğın təhlükəsizliyi ilə bağlı normativ hüquqi aktlarda müvafiq dəyişikliklərin edilməsi ilə əlaqədar təkliflərin hazırlanması barədə Nazirliyin aidiyyəti struktur bölmələrinin rəhbərlərinə tapşırıqlar verib.

Qeyd edək ki, avqust ayından başlayaraq Azərbaycanın şimal, şimal-şərq, qərb  regionlarında meşə yanğınları baş verir. Azərbaycanın Şabran rayonunda (Bakıdan 116 kilometr şimal) meşədə yanğın insanların heyvan və evlərinə ziyan vurub. Hazırda Zaqatalada yanğınların baş verdiyi deyilir.

  Sentyabrın 2-də Fövqəladə Hallar Nazirliyinin  açıqladığı  məlumata görə, Zaqatala rayonunun Yuxarı Tala kəndi, Qəbələ rayonunun Tikanlı kəndi, Oğuz rayonunun Başdaşağıl kəndi və İsmayıllı rayonunun Bəhliyan kəndi yaxınlığında  baş vermiş yanğınlarla mübarizə tədbirləri davam etdirilir.

  Astara rayonunun Şəvqo kəndi yaxınlığında baş vermiş yanğın söndürülüb. Qeyd edək ki, bütün göstərilən yanğınlar mürəkkəb relyefli dağlıq-meşəlik ərazilərdə baş verib.

  Azərbaycanın yerli ekoloq ekspertləri bu yanğınların qəsdən törədildiyini qeyd edirlər. Ekoaktivist Cavid Qara öz facebook səhifəsində meşə yanğınları ilə mübarizə haqqında fikirlərini bölüşüb.

"Meşə yanğınlarını yanğın zolağında söndürmək selin qarşısını kəsməyə çalışmaq kimi bir şeydir. Yanğınla mübarizə romantikanı sevmir, ağac fetişizminin, ekofanatiklərin yeri yoxdur burda. Yanğının miqyasını, istiqamətini, küləyin hazırki və proqnozlaşdırılan istiqamətini, yanğınsöndürməyə cəlb edilən resursun ölçüsünü və xarakterini nəzərə alıb plan qurmalısan. Buna uyğun yanmasını qəbul edəcəyin hissəni təyin edib qarşıdakı ilk uyğun zolağı təyin edirsən. Aşırım, çay yatağı, yol və s zolaq ola bilər. O hissədə meşəni qırıb, ağacları kəsib aşırıb, meşə döşənəyini (xəzan, çırçırpı, çürüntü) təmizləyib torpağa çıxıb ayırıcı zolaq yaradırsan. Və hətta bəzən zolaq yaratdıqdan sonra hissə hissə nəzarət altında əks istiqamətdə yanğın başladırsan. Əsas yanğın nəzarət altında yandırılmış ərazini "keçə bilmir" və yanğınlar toqquşub boğulur. Tək tək ağacları qorumağa çalışarkən daha çox meşənin yanmasını seyr etməli ola bilərsən. Yanğın söndürmə böyük bir logistikadır. Ən xırda detalına qədər hazırlıq və loqistika tələb edir. Yanğın söndürənlərin içməli su təminatı kimi incə bir detal var. Yanğın ərazisinə içməli su daşınmalıdır. Yanğınsöndürənlər yüksək temperaturda ağır iş rejimində tez-tez susayırlar. Gətirilən su da qısa müddətdə istidən qaynar suya çevrilir. Susuzluğu yatıra bilmir. Sadəcə sərin heç olmasa normal temperaturda yetərli içməli su təminatı işin sürətinə ciddi təsir edə bilir. Su təminatı olmayan yanğınsöndürən tapşırıq ərazisini tərk etmək məcburiyyətində qalır.

Yanğınsöndürən mütəxəssislərdən xahiş edirəm, oxuyub fikir bildirsinlər, səhvlərimi düzəltsinlər". 16D