Narkotik maddələrin qanunsuz dövriyyəsi bütün cinayətlərin 12,9%-ni təşkil edib

Bakı/07.08.17/Turan: 2017-ci ilin birinci yarısında Azərbaycanda törədilmiş 13182 cinayətin 1694-ü və ya 12,9%-i narkotik vasitələrin və psixotrop maddələrin qanunsuz dövriyyəsi ilə əlaqədar olub. Bu barədə Dövlət Statistika Komitəsi DİN-ə istinadən bildirib.

Həmin faktların 63,9%-i narkotik maddələrin şəxsi istehlak miqdarından artıq miqdarda əldə etmə və ya saxlama, 28,2%-i narkotik maddəni satış məqsədilə saxlama, 6,1%-i narkotik bitkilərin qanunsuz kultivasiyası, 1,8%-i güclü təsir edən və ya zəhərli maddələrin qanunsuz dövriyyəsi ilə əlaqədardır.

Bu cinayətləri 1302 nəfər törədib. Onların 89,6%-ni heç yerdə işləməyən və oxumayanlar, 39,4%-ni əvvəllər cinayət məsuliyyətinə cəlb olunmuş şəxslər təşkil edib.

Cinayət törətmiş şəxslərin 0,2%-i yetkinlik yaşına çatmayanlar, 8,6%-i 18-24 yaşlı, 13,9%-i 25-29 yaşlı gənclər, 77,3%-i 30 və yuxarı yaşlı şəxslərdir.

Hesabat dövründə müsadirə edilmiş 639,2 kiloqram narkotik maddənin 55,2 kiloqramını heroin, 426,9 kiloqramını marixuana, 119,5 kiloqramını tiryək, 2,5 kiloqramını həşiş, 35,1 kiloqramını isə digər narkotik vasitələr təşkil edib.-71D-